Ikanapulo'g Upat nga Dominggo sa Ordinaryong Panahon

ANTIPONA SA PAGSUGOD

Sulod sa imong Templo, O Dios, gihandum namo ang imong mahigugmaong kaluoy. Sumala sa imong ngalan, mao usab ang pagdayeg kanimo nga miabot hangtod sa kinatumyan sa yuta; ang imong tuong kamut puno sa katarungan.

PAGBASA GIKAN SA BASAHON NI PROPETA ZACARIAS

Zec. 9:9-10

Pagmaya pag-ayo, O katawhan sa Sion! Singgit, O katawhan sa Jerusalem! Moanhi kanimo ang imong hari, moanhi nga madaugon ug mapaubsanon nga magkabayog asno- sa nati sa asno. Ipahilayo niya sa Efraim ang karwahe ug sa Jerusalem ang mga kabayong iggugubat. Balion niya ang mga pana, ug hatagag pakigdait ang kanasuran. Ang iyang gingharian maglakip sa tänang kadagatan, sukad sa Suba sa Eufrates ngadto sa tanang suok sa kalibutan.

SALMO RESPONSORYO

Ps. 145: 1-2. 8-9. 10-11. 13-14

T. Daygon ko ang imong ngalan sa kahangturan, akong hari ug akong Dios.

Ibayaw ko ikaw, O Dios ug Hari ko, ug daygon ko ang imong ngalan hangtod sa kahangturan. Matag adlaw daygon ko ikaw, ug himayaon ko ang imong ngalan hangtod sa kahangturan.

T. Daygon ko ang imong ngalan sa kahangturan, akong hari ug akong Dios.

Ang Ginoo maayo ug maluluy-on, dugay nga masuko ug dako sa kaluoy. Ang Ginoo maayo alang sa tanan ug maluluy-on sa tanan niyang mga binuhat.

T. Daygon ko ang imong ngalan sa kahangturan, akong hari ug akong Dios.

Papasalamata kanimo, O Ginoo, ang tanan mong mga buhat ug padayega kanimo ang imong buotang mga alagad. Pahisgota sila bahin sa himaya sa imong gingharian ug pasultia sila mahitungod sa imong gahom.

T. Daygon ko ang imong ngalan sa kahangturan, akong hari ug akong Dios.

Ang Ginoo matinumanon diha sa tanan niyang mga pulong ug balaan diha sa tanan niyang mga buhat. Ang Ginoo nagpabangon sa tanan nga napukan ug nagapatindog sa tanan nga nangalipay.

T. Daygon ko ang imong ngalan sa kahangturan, akong hari ug akong Dios.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 8: 9. 11-13

Wala na kamo magkinabuhi nga minandoan sa tawhanong kinaiya kondili sa Espiritu, kon tinuod man ugaling nga ang Espiritu sa Dios anaa na sa inyong kasingkasing. Kadtong walay Espiritu ni Cristo, dili iya ni Cristo. Kon nagpuyo sa inyong kasingkasing ang Espiritu sa Dios nga nagbanhaw kang Jesus, siya nga nagbanhaw kang Cristo mohatag usab ug kinabuhi sa inyong mga lawas pinaagi sa iyang Espiritu nga anaa kaninyo. sa Busa, mga igsuon, aduna kitay katungdanan apan dili pagkinabuhi sumala sa tawhanong kinaiya. Kon magkinabuhi kamo minandoan sa tawhanong kinaiya, mamatay gayod kamo; apan kon pinaagi sa Espiritu patyon ninyo ang tawhanong binuhatan, mabuhi gayod kamo.

BERSO SA DILI PA ANG EBANGHELYO

Aleluya! Sulti, Ginoo, kay namati ang imong sulugoon; anaa kanimo ang mga pulong sa kinabuhing walay katapusan. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 11: 25-30

Unya si Jesus miingon, "O Amahan, Ginoo sa langit ug sa yuta! Nagpasalamat ako kanimo kay gipadayag mo man ngadto sa mga walay kahibalo ang imong gililong sa mga maalamon ug sa mga makinaadmanon. Oo, Amahan, natuman kini kay mao may imong gusto ug pagbuot." "Ang akong Amahan naghatag kanako sa tanang butang. Walay nakaila sa Anak gawas sa Amahan, ug walay nakaila sa Amahan gawas sa Anak ug kadtong mga tawo nga buot sa Anak nga makaila sa Amahan." "Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo." "Isangon ang akong yugo ug sunda ninyo ako, kay malumo ako ug mapaubsanon sa espiritu, ug makapahulay kamo. Sayon ang yugo nga akong ihatag kaninyo, ug gaan ang ipapas-an ko kaninyo."

ANTIPONA SA PANGALAWAT

Tagamtama ug tan-awa unsa kamaayo ang Ginoo; bulahan ang nagalaum sa Dios.