[F] Santo Tomas, apostol
ANTIPONA SA PAGSUGOD
Dios ko ikaw, ug nagapasalamat ako kanimo. Dios ko ikaw, ug nagadayeg ako kanimo; nagapasalamat ako kanimo, kay nagluwas ka man kanako.
PAGBASA GIKAN SA SULAT NI SAN PABLO NGADTO SA TAGA-EFESO
Eph. 2: 19-22
Busa kamong mga dili Judio dili na mga langyaw o mga dumuduong kondili mga katagilungsod na sa katawhan sa Dios, ug mga sakop sa iyang banay. Gitukod kamo diha sa sukaranan nga gipahimutang sa mga apostoles ug sa mga propeta, ug ang bato nga gisukaran nga mao si Cristo Jesus. Siya mao ang nagsagang sa tibuok balay hangtod mahimo kining templo nga balaan sa Ginoo. Uban sa tanang magtutuo kamo usab nga nahiusa kaniya gihimong usa ka balay diin nagpuyo ang Dios pinaagi sa iyang Espiritu.
ANG PULONG SA GINOO.
SALMO RESPONSORYO
Ps. 117: 1. 2
T. Panglakaw kamo sa tibuok kalibutan, ug isangyaw ang Maayong Balita.
Dayga ang Ginoo, kamong tanang mga nasod; himayaa siya kamong tanang katawhan.
T. Panglakaw kamo sa tibuok kalibutan, ug isangyaw ang Maayong Balita.
Kay makanunayon ang iyang kaluoy alang kanato, ug ang kamatinud-anon sa Ginoo nagalungtad sa kahangturan.
T. Panglakaw kamo sa tibuok kalibutan, ug isangyaw ang Maayong Balita.
BERSO SA DILI PA ANG EBANGHELYO
Aleluya! Mituo ka ba Tomas, tungod kay nakakita ka kanako? Bulahan kadtong mituo bisan wala makakita kanako! Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 20: 24-29
Si Tomas (nga ginganlag Kaluha), usa sa napulog-duha ka tinun-an, wala mahiuban kanila sa pag-anha ni Jesus. Busa gisuginlan siya sa ubang mga tinun-an, "Nakita namo ang Ginoo!" Si Tomas miingon kanila, "Gawas kon makita ko ug ikatapion ang akong tudlo sa inagian sa mga lansang diha sa iyang kamut, ug mahikap ko ang samad sa iyang kilid, dili ako motuo." Human milabay ang usa ka semana, nagtigom na usab ang mga tinun-an sulod sa lawak, ug nahiuban na kanila si Tomas. Gitrangkahan ang mga pultahan, apan mitungha si Jesus ug mibarog taliwala kanila ug miingon, "Mainyo unta ang kalinaw." Unya miingon siya kang Tomas, "Tan-awa ang akong kamut ug hikapa kini, hikapa usab ang samad sa akong kilid. Tuo ug ayaw na pagduhaduha!" Si Tomas miingon kaniya, "Ginoo ko ug Dios ko!" Unya miingon si Jesus kaniya, "Mituo ka ba tungod kay nakakita ka kanako? Bulahan kadtong motuo bisan wala makakita kanako!"
ANG EBANGHELYO SA GINOO.
ANTIPONA SA PANGALAWAT
Itapion ang imong tudlo diri ug tan-awa ang akong mga kamut, hikapa usab ang samad sa akong kilid. Tuo ug ayaw na pagduhaduha.