Huwebes sa Ikanapulo'g Tulo nga Semana sa Ordinaryong Panahon

ANTIPONA SA PAGSUGOD

Pamakpak kamong tanang mga nasod, singgit kamo sa tingog sa kalipay ngadto sa Dios.

PAGBASA GIKAN SA BASAHON NI PROPETA AMOS

Am. 7: 10-17

Unya si Amasias, ang pari sa Betel, mitaho kang Jeroboam, hari sa Israel, "Si Amos naglaraw pagpatay kanimo taliwala sa katawhan sa Israel. Ang iyang mga pakigpulong makabungkag sa nasod. Mao kini ang iyang giingon, "Si Jeroboam mamatay sa panggubatan, ug mabihag ang katawhan sa Israel." Ug si Amasias miingon kang Amos, "Igo na, propeta! Balik ngadto sa yuta sa Juda ug panginabuhi didto pinaagi sa imong pagpanagna. Ayaw na panagna dinhi sa Betel, kay mao kini and dapit diin mosimba ang hari ug ania dinhi ang nasudnong templo." Si Amos mitubag, "Dili ako mao ang matang sa propeta nga managna aron suholan. Magbalantay ako sa mga hayop, ug tig-atiman sa mga kahoyng igera. Apan gikuha ako sa Ginoo gikan sa akong pagkamagbalantay sa karnero ug gisugo ako pagsulti ngadto sa iyang katawhan, ang Israel. Busa pamati kamo sa isulti sa Ginoo. Gidid-an mo ako sa pagwali batok sa katawhan sa Israel ug sa mga kaliwat ni Isaac. Tungod kay miingon ka man niana, Amasias, ang Ginoo nag-ingon kanimo, 'Ang imong asawa mahimong dautang babaye diha sa siyudad, ug ang imong anak mamatay sa panggubatan. Mabahinbahin ang imong yuta ug ihatag sa laing mga tawo, ug ikaw mismo mamatay didto sa yuta sa mga pagano. Ang katawhan sa Israel mobihag ngadto sa laing nasod.'"

SALMO RESPONSORYO

Ps. 19: 8. 9. 10. 11

T. Ang mga hukom sa Ginoo matuod, ug silang tanan matarong.

Ang balaod sa Ginoo hingpit, nagalipay sa kalag; Ang kasugoan sa Ginoo kasaligan, nagahatag og kinaadman sa tawo nga yano.

T. Ang mga hukom sa Ginoo matuod, ug silang tanan matarong.

Ang mga sugo sa Ginoo matarong, nagalipay sa kasingkasing; Ang mga sugo sa Ginoo matin-aw, nagahatag og kahayag sa mata.

T. Ang mga hukom sa Ginoo matuod, ug silang tanan matarong.

Ang kahadlok sa Ginoo malinis, nagalungtad sa kahangturan; Ang mga gimbut-an sa Ginoo matuod, silang tanan matarong.

T. Ang mga hukom sa Ginoo matuod, ug silang tanan matarong.

Labaw sila kabililhon kay sa bulawan, labaw sa usa ka pudyot sa labing lunsay nga bulawan; Mas matam-is usab kay sa anibal o sa dugos gikan sa kaba.

T. Ang mga hukom sa Ginoo matuod, ug silang tanan matarong.

BERSO SA DILI PA ANG EBANGHELYO

Aleluya! Ang tanan nimong mga balaod malig-on, O Ginoo, gipabarog hangtod sa kahangturan. Aleluya!

PAGBASA SA SANTOS NGA EBANGHELYO SUMALA NI SAN MATEO

Mt. 9: 1-8

Misakay si Jesus sa usa ka sakayan, ug mibalik pagtabok sa lanaw, ug miabot sa lungsod niya. Ug may usa ka paralitiko nga naghigda sa duyan nga gihatod sa pipila ka tawo ngadto kaniya. Nakita ni Jesus ang kadako sa ilang pagsalig kaniya, ug miingon siya sa paralitiko, "Anak, ayaw kahadlok kay gipasaylo na ang imong mga sala." Unya may pipila ka magtutudlo sa Balaod nga miingon, "Nagpasipala sa Dios kining tawhana!" Nasayod si Jesus sa ilang gihunahuna ug miingon siya, "Nganong naghuna-huna man kamo nianang mga huna-hunang daotan? Hain may sayon, ang pag-ingon ba, 'Gipasaylo na ang imong mga sala,' kon ang pag-ingon ba, 'Bangon ug lakat'? Karon ipakita ko kaninyo nga ang Anak sa Tawo may gahom dinhi sa yuta sa pagpasaylo sa mga sala." Busa miingon siya sa paralitiko, "Bangon, dad-a ang imong gihigdaan, ug pauli sa inyo!" Ug mibangon ang paralitiko ug mipauli. Sa pagkakita sa mga tawo niini, nangahadlok sila, ug gidayeg nila ang Dios tungod sa paghatag niya niining gahoma ngadto sa mga tawo.

ANTIPONA SA PANGALAWAT

Dayga ang Ginoo, kalag ko, ug ang tanan nga ania kanako magdayeg unta sa iyang santos nga ngalan.