Miyerkoles sa Ikanapulo'g Tulo nga Semana sa Ordinaryong Panahon

PAGBASA GIKAN SA BASAHON NI PROPETA AMOS

Am. 5: 14-15. 21-24

Paningkamot kamo pagbuhat sa matarong, dili sa dautan, aron mabuhi kamo. Unya ang Ginoong Dios nga Labing Gamhanan makig-uban gayod kaninyo, ingon sa inyong gipamatud-an. Likayi ang dautan ug mahala ang maayo, ipatunhay ang hustisya diha sa mga hukmanan, basin pa kaluy-an sa Ginoo ang katawhan nga nahibiling buhi niining nasora. Miingon ang Ginoo, "Gidumtan ko ang inyong mga pista ug wala ko kahimut-i ang inyong mga pangilin! Sa dihang dad-an ako ninyog halad aron sunogon ug mga halad nga pagkaon, dili ko kini dawaton. Ug dili ko usab dawaton ang mananap nga pinatambok nga inyong dad-on kanako ingon nga halad sa pasalamat. Hunonga ang inyong masaba nga awit; dili ko buot mamati sa inyong mga tulonggon. Paagaya hinoon ang hustisya ug katarong sama sa suba nga dili gayod mohubas."

SALMO RESPONSORYO

Ps. 50: 7. 8-9. 10-11. 12-13. 16-17

Sa matarong akong ipakita ang makaluluwas nga gahom sa Dios.

"Pamati kamo lungsod ko ug mosulti ako; Israel mosaksi ako batok kanimo; Ako ang Dios, ang imong Dios."

Sa matarong akong ipakita ang makaluluwas nga gahom sa Dios.

Dili tungod sa imong mga sakripisyo gibadlong ko ikaw, kay ang imong mga halad nga sinunog ania kanunay sa akong atubangan. Wala ako magkuha og toro gikan sa imong balay, ni mga kanding gikan sa imong panon.

Sa matarong akong ipakita ang makaluluwas nga gahom sa Dios.

Kay ako ang tanang mga mananap sa kalasangan, ang linibo nga kahayupan diha sa akong kabukiran. Nakaila ako sa tanang mga langgam sa kahanginan, ug bisan unsay molihok diha sa kapatagan, akoa man.

Sa matarong akong ipakita ang makaluluwas nga gahom sa Dios.

Kon gutomon ako, dili ko ikaw tug-anan, kay ako ang kalibutan ug ang kapuno niini. Mokaon ba god ako sa unod sa kusganong toro, o moinom ba ako sa dugo sa mga kanding?

Sa matarong akong ipakita ang makaluluwas nga gahom sa Dios.

"Nganong giasoy mo man ang akong kasugoan, ug gibungat mo ang akong kasabutan sa imong ba-ba, bisan kontra nimo ang disiplina ug gisalikway mo ang akong mga pulong?"

Sa matarong akong ipakita ang makaluluwas nga gahom sa Dios.

PAGBASA SA SANTOS NGA EBANGHELYO SUMALA NI SAN MATEO

Mt. 8: 28-34

Unya miadto si Jesus sa yuta sa mga taga-Gadara didto sa tabok sa lanaw, ug gitagbo siyag duha ka tawo nga nanggula sa mga langob nga gihimong lubnganan. Giyawaan kining mga tawhana ug pintas kaayo. Ug kay gikahadlokan man sila, walay nangahas sa pag-agi niadtong dalana. Ug misinggit sila, "Anak sa Dios, unsa may imong tuyo kanamo? Mianhi ka ba aron pagsakit kanamo bisag dili pa panahon?" Dili layo didto, may usa ka panon sa mga baboy nga nanibsib. Mihangyo ang mga yawa kang Jesus, "Kon abugon mo kami, pasudla kami nianang panon sa mga baboy." "Hala, panulod kamo," miingon si Jesus; ug nangadto sila ug nanulod sa mga baboy. Unya ang tibuok panon mihaguros pagdulhog sa pangpang ug nangambak sa lanaw ug nangalumos. Ang mga nag-atiman sa mga baboy nanagan ngadto sa lungsod aron pagsugilon sa nahitabo, ingon man sa gidangatan sa mga giyawaan. Tungod niini nanggula ang tanang tawo niadtong lungsora aron pagsugat kang Jesus, ug sa ilang pagkakita kaniya, nangamuyo sila nga mobiya siya sa ilang kayutaan.