ANTIPONA SA PAGSUGOD
Mao kini sila nga sa pagbuntog sa kahuyang nga tawhanon, mitanum sa Simbahan pinaagi sa ilang dugo: miinum sa kalis sa Ginoo, ug nangahimong mga higala sa Dios.
PAGBASA GIKAN SA MGA BUHAT SA MGA APOSTOLES
Acts 12: 1-11
Niining panahona si Hari Herodes misugod paglutos sa pipila ka mga sakop sa simbahan. Gipapatay niya pinaagi sa espada si Santiago nga igsuon ni Juan. Sa pagkasayod niya nga nakapahimuot kini sa mga Judio, iya usab nga gipadakop si Pedro. (Nahitabo kini sa Pangilin sa Pan nga Walay Patubo.) Human siya dakpa, gipreso si Pedro ug gipabantayan ug upat ka pundok sa mga guwardiya nga tagup-at ka sundalo matag pundok. Naglaraw si Herodes pag-imbistigar kaniya inigkaliwas sa Pangilin. Busa gipreso si Pedro didto sa karsel, apan ang mga sakop sa simbahan nag-ampo nga mainiton ngadto sa Dios alang kaniya. Sa gabii sa dayon na siya itugyan ni Herodes ngadto sa katawhan, natulog si Pedro nga gitaliwad-an og duha ka guwardiya. Gigapos siyag duha ka kadena ug labot pa may mga guwardiya nga nagbantay sa ganghaan sa presohan. Ug sa kalit mitungha didto ang usa ka anghel sa Ginoo ug may kahayag nga midan-ag sa karsel. Unya ang abaga ni Pedro giyugyog sa anghel, gipukaw siya ug giingnan, "Bangon dayon!" Ug dihadiha nangatangtang ang kadena sa iyang kamut. Unya ang anghel miingon kaniya, "Pagbakos ug pagsapatos." Gituman kini ni Pedro ug ang anghel miingon, "Pagkupo ug nunot kanako." Minunot si Pedro kaniya paggula sa karsel. Apan wala siya masayod kon tinuod ba gayod ang gibuhat sa anghel, kay abi niyag nakakita siyag panan-awon. Miagi sila sa unang mga guwardiya ug unya sa ikaduha, ug nahiabot sila sa ganghaang puthaw nga padulong sa siyudad. Ang ganghaan naabli sa iyang kaugalingon ug nanggula sila subay sa usa ka dalan, ug ang anghel kalit nga mibiya kang Pedro. Unya nakaamgo si Pedro sa tinuod nga nahitabo kaniya ug miingon siya, "Karon nasayod ako nga tinuod nga ang Ginoo nagpadala sa iyang anghel ug nagluwas kanako gikan sa gahom ni Herodes ug sa tanang butang nga buot buhaton sa mga Judio."
ANG PULONG SA GINOO.
SALMO RESPONSORYO
Ps. 34: 2-3. 4-5. 6-7. 8-9
T. Ang anghel sa Ginoo magluwas kanila nga mahadlokon kaniya.
Daygon ko ang Ginoo sa tanang mga panahon; ang iyang pagdayeg maania kanunay sa akong ba-ba. Pahimayaa ang akong kalag diha sa Ginoo; ang mapaubsanon makadungog kanako ug malipay.
T. Ang anghel sa Ginoo magluwas kanila nga mahadlokon kaniya.
Himayaa ang Ginoo uban kanako, mag-ambahan kita aron pagbayaw sa iyang ngalan. Gipangita ko ang Ginoo ug gitubag ako niya ug giluwas ako sa tanan kong gikahadlokan.
T. Ang anghel sa Ginoo magluwas kanila nga mahadlokon kaniya.
Paglaum kamo kaniya aron mosanag kamo sa kasadya, ug ang inyong mga nawong dili manglipaghong sa kaulaw. Sa pagsangpit sa nasakit nga tawo, namati ang Ginoo. Ug giluwas siya sa tanan niyang kagul-anan.
T. Ang anghel sa Ginoo magluwas kanila nga mahadlokon kaniya.
Ang anghel sa Ginoo nagalibot kanila nga mahadlokon kaniya ug nagapalingkawas kanila. Tagamtama ug tan-awa unsa kamaayo ang Ginoo. Bulahan ang tawo nga nagadangop kaniya.
T. Ang anghel sa Ginoo magluwas kanila nga mahadlokon kaniya.
PAGBASA GIKAN SA IKADUHANG SULAT NI SAN PABLO NGADTO KANG TIMOTEO
2 Tm. 4: 6-8. 17-18
Bahin kanako, miabot na ang takna nga iula ang akong dugo; panahon na nga mobiya ako niining kinabuhia. Gihimo ko kutob sa akong maabot ang pagpakiglumba, ug natapos ko gayod kini; giampingan ko ang akong pagtuo. Ug karon gitagana alang kanako ang ganti sa kadaogan, ang purongpurong sa pagkamatarong nga niadto unyang adlawa iganti kanako sa Ginoo, ang matarong nga Maghuhukom ug dili kanako lamang kondili sa tanan gayod nga nagpaabot sa iyang pagpadayag. Apan ang Ginoo miunong kanako ug mihatag kanakog kusog aron ikasangyaw ko ang tibuok mensahe ngadto sa mga dili Judio, ug giluwas ako gikan sa ba-ba sa liyon. Ug luwason ako sa Ginoo gikan sa tanang kadautan ug dad-on ngadto sa iyang langitnong Gingharian. Kaniya ang himaya hangtod sa kahangturan. Amen.
ANG PULONG SA GINOO.
BERSO SA DILI PA ANG EBANGHELYO
Aleluya! Ikaw Pedro nga bato, tukoron ko ang akong Simbahan, ug bisan gani ang kamatayon dili makabuntog niini. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 16: 13-19
Unya miabot si Jesus sa yuta duol sa lungsod sa Cesarea Filipo, ug didto nangutana siya sa iyang mga tinun-an, "Sumala sa mga tawo, kinsa man ang Anak sa Tawo?" Sila mitubag, "May nag-ingon nga siya mao si Juan nga Magbubunyag, ang uban nag-ingon nga siya mao si Elias; samtang ang uban nag-ingon nga siya mao si Jeremias o laing propeta." Si Jesus nangutana kanila, "Apan kamo, unsa may inyong ikasulti? Kinsa man ako?" Ug mitubag si Simon Pedro, "Ikaw mao ang Mesiyas, ang Anak sa Dios nga buhi." Giingnan siya ni Jesus, "Simon, anak ni Jonas, bulahan ka gayod kay kining maong kamatuoran wala moabot kanimo gikan sa bisan kinsang tawo, kondili gihatag kanimo sa akong Amahan nga atua sa langit. Busa sultihan ko ikaw: ikaw si Pedro ug ibabaw niining bato tukoron ko ang akong Simbahan, ug bisan gani ang kamatayon dili gayod makabuntog niini. Ihatag ko kanimo ang mga yawi sa Gingharian sa Langit: ang imong idili dinhi sa yuta, idili usab didto sa langit; ug ang imong itugot dinhi sa yuta, itugot usab didto sa langit."
ANG EBANGHELYO SA GINOO.
ANTIPONA SA PANGALAWAT
Miingon si Pedro kang Jesus: Ikaw si Cristo, Anak sa Buhing Dios. Mitubag si Jesus: Ikaw si Pedro, ug ibabaw niining bato tukoron ko ang akong Simbahan.