ANTIPONA SA PAGSUGOD
Si Pedro apostol ug si Pablo magtutudlo sa mga hentil, kini sila nagtudlo kanamo sa imong balaod, Ginoo.
PAGBASA GIKAN SA MGA BUHAT SA MGA APOSTOLES
Acts 3: 1-10
Usa niana ka adlaw, si Pedro ug si Juan miadto sa Templo sa alas tres sa hapon, ang takna sa pag-ampo. Sa ganghaan nga ginganlag Matahom nga Ganghaan, may usa ka tawo nga bakol sukad sa iyang pagkahimugso. Kada adlaw gihatod siya ngadto sa Templo aron magpakilimos. Sa pagkakita niya kang Pedro ug kang Juan nanulod sa Templo, nagpalimos siya kanila. Mitutok sila kaniya ug unya miingon si Pedro, "Tan-awa kami!" Busa mitan-aw ang bakol kanila ug nagpaabot nga hatagan siyag limos. Ug si Pedro miingon, "Wala akoy kuwarta, apan hatagan ko ikaw niining ania kanako: sa ngalan ni Jesucristo nga Nazaretnon, lakaw!" Unya gigunitan ni Pedro ang tuong kamut sa bakol ug gitabangan siya pagpatindog. Dihadiha nalig-on ang tiil ug buolbuol sa bakol; milukso siya, mibarog ug milakaw. Unya mikuyog siya kanila ngadto sa Templo, nga naglakaw ug nagluksolukso ug nagdayeg sa Dios. Ang mga tawo nakakita kaniya nga naglakaw ug nagdayeg sa Dios, ug dihang nailhan nila nga siya mao diay ang makililimos nga naglingkoran didto sa ganghaan sa Templo nga ginganlag Matahom nga Ganghaan, natingala pag-ayo silang tanan sa nahitabo kaniya.
ANG PULONG SA GINOO.
SALMO RESPONSORYO
Ps. 19: 2-3. 4-5
T. Ang ilang mensahe migula latas sa tibuok kalibutan.
Ang mga langit nagpadayag sa himaya sa Dios, ug ang kahitas-an magasangyaw sa buhat sa iyang kamut. Ang adlaw nagasulti ngadto sa sunod adlaw, ug ang gabii nagapahibalo sa sunod gabii.
T. Ang ilang mensahe migula latas sa tibuok kalibutan.
Walay pulong ni usa ka pakigsulti kansang tingog wala madungog; latas sa tibuok yuta milanog ang ilang tingog; Ug ngadto sa kinatumyan sa kalibutan, miabot ang ilang mensahe.
T. Ang ilang mensahe migula latas sa tibuok kalibutan.
PAGBASA GIKAN SA SULAT NI SAN PABLO NGADTO SA TAGA-GALACIA
Gal. 1: 11-20
Mga igsuon, tugoti ako pagsulti kaninyo niini: ang Ebanghelyo nga akong giwali dili minugna og tawo. Wala ko kini madawat gikan kang bisan kinsa ni may nagtudlo niini kanako, kondili gipadayag kini kanako ni Jesucristo. Gisuginlan na kamo sa akong pagkinabuhi sa nagsunod pa ako nga mainiton sa tinuohan sa mga Judio. Gilutos ko sa walay kukaluoy ang simbahan sa Dios, ug gihimo ko ang tanan aron paglaglag niini. Labaw ako kamatinumanon sa tinuohan sa mga Judio kay sa kadaghanan sa mga Judio nga akong mga talirongan. Labi pa akong mainiton sa akong pagsunod sa mga gikabilinbiling mga pagtulon-an sa atong mga katigulangan. Apan ang Dios, tungod sa iyang grasya, nagpili kanako sa wala pa gani ako matawo, ug nagtawag kanako aron pag-alagad kaniya. Ug sa dihang gipadayag niya kanako ang iyang Anak aron iwali ko siya ngadto sa mga dili Judio, wala ako magpakitambag ni bisan kinsa, ni miadto ako sa Jerusalem aron pagpakigkita sa nahimong mga apostoles una kanako. Hinonoa, miadto ako dayon sa Arabia ug unya mibalik ako sa Damasco. Milabay ang tulo ka tuig una ako moadto sa Jerusalem aron pagpakigkita kang Pedro, ug nagpabilin ako uban kaniya sulod sa duha ka semana. Walay laing apostol nga akong gipakigkitaan gawas kang Santiago, ang igsuon sa Ginoo. Matuod kining akong gisulat, ug nasayod ang Dios nga wala ako mamakak.
ANG PULONG SA GINOO.
BERSO SA DILI PA ANG EBANGHELYO
Aleluya! Ginoo, nasayod ka sa tanan, nasayod ka nga gihigugma ko ikaw! Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 21: 15-19
Si Jesus mipakita sa iyang kaugalingon ngadto sa iyang mga tinun-an: human sila makakaon, miingon si Jesus kang Simon Pedro, "Simon, anak ni Juan, gihigugma mo ba ako labaw sa imong paghigugma sa uban?" Siya mitubag, "Oo Ginoo, nasayod ka nga gihigugma ko ikaw." Si Jesus miingon kaniya, "Atimana ang akong mga nating karnero." Unya miingon na usab si Jesus kaniya, "Simon, anak ni Juan, gihigugma mo ba ako?" Si Simon mitubag pag-usab, "Oo, Ginoo, nasayod ka nga gihigugma ko ikaw." Si Jesus miingon kaniya, "Atimana ang akong mga karnero." Unya sa ikatulong higayon, si Jesus miingon, "Simon, anak ni Juan, gihigugma mo ba ako?" Si Pedro nasubo tungod kay gipangutana man siya ni Jesus sa makatulo kon siya gihigugma ba niya, ug si Pedro miingon kaniya, "Ginoo, nasayod ka sa tanan; nasayod ka nga gihigugma ko ikaw!" Si Jesus miingon kaniya, "Atimana ang akong mga karnero. Sultihan ko ikaw: sa batan-on ka pa, ikaw ra ang nagbakos sa imong kaugalingon ug nakaadto ka sa bisan diin nga gusto mong adtoon; apan inigkatigulang na nimo, idupa mo ang imong mga kamut ug lain na ang magbakos kanimo, ug dad-on ka sa dapit nga dili mo gustong adtoan." (Sa pagsulti niya niini gipasabut ni Jesus kon unsang paagiha si Pedro mamatay aron paghimaya sa Dios.) Unya miingon si Jesus kaniya, "Sunod kanako!"
ANG EBANGHELYO SA GINOO.
ANTIPONA SA PANGALAWAT
Simon, anak ni Juan, nahigugma ka ba kanako labaw kay kanila? Ginoo, nahibalo ka sa tanan. Nasayod ka, Ginoo, nga nahigugma ako kanimo.