ANTIPONA SA PAGSUGOD
Pamakpak kamong tanang mga nasod, singgit kamo sa tingog sa kalipay ngadto sa Dios.
PAGBASA GIKAN SA IKADUHANG BASAHON SA MGA HARI
2 Kgs. 4: 8-11. 14-16
Usa ka adlaw niana, si Eliseo miadto sa Sunam diin magpuyo ang usa ka babaye nga dato. Giagda siya sa babaye sa pagkaon. Busa matag agi niya niadtong dapit mohapit gayod siya sa balay sa babaye aron pagkaon. Ug ang babaye miingon sa iyang bana, "Nasayod na ako karon nga ang tawo nga kanunayng moagi dinhi usa ka balaang tawo. Maghimo kitag paga-paga ug butangan ta kinig higdaan, lamesa, silya ug suga aron nga inig-anhi niya makapahulay siya." Usa ka adlaw niana, mihapit ang propeta ug misulod sa lawak. Ug si Eliseo miingon, "Unsa may mahimo nato alang kaniya?" Si Gihasi mitubag, "Wala siyay anak ug tigulang na ang iyang bana." Si Eliseo miingon, "Tawga siyag balik." Sa diha na ang babaye, si Eliseo miingon, "Sumad karon magkugos ka nag anak nga lalaki" Ang babaye mitubag, "Dili kana mahimo, sir. Propeta sa Dios, ayaw akog tiawi!".
ANG PULONG SA GINOO.
SALMO RESPONSORYO
Ps. 89: 2-3. 16-17. 18-19
T. Mag-awit ako sa kaayo sa Ginoo hangtod sa kahangturan.
Gisangyaw ko ang imong katarong diha sa bagang katawhan; wala ko pugngi ang akong mga ngabil ingon sa imong hibaw-an, O Ginoo. Kay miingon ikaw, "Ang akong kaluoy hangtod sa kahangturan"; diha sa langit imong gilig-on ang imong kamatinumanon.
T. Mag-awit ako sa kaayo sa Ginoo hangtod sa kahangturan.
Bulahan ang lungsod nga nasinati sa masadya nga singgit; diha sa kahayag sa imong nawong, O Ginoo, naglakat sila. Sa imong ngalan nagasadya sila sa tibuok adlaw, ug pinaagi sa imong katarong gibayaw sila.
T. Mag-awit ako sa kaayo sa Ginoo hangtod sa kahangturan.
Kay ikaw ang kasanag sa ilang kusog, ug tungod sa imong kaluoy gibayaw ang among gahom. Kay ang Ginoo mao ang among taming, ug iyaha sa Balaan sa Israel, ang among hari.
T. Mag-awit ako sa kaayo sa Ginoo hangtod sa kahangturan.
PAGBASA GIKAN SA SULAT NI SAN PABLO NGADTO SA TAGA-ROMA
Rom. 6: 3-4. 8-11
Nasayod kamo nga sa pagbunyag kanato nahiusa kita kang Cristo Jesus, busa nahiusa kita sa iyang kamatayon. Tungod niini, sa pagbunyag kanato gilubong kita uban kaniya ug miambit sa iyang kamatayon, aron ingon nga si Cristo gibanhaw sa mahimayaong gahom sa Amahan, kita usab magpuyo diha sa bag-ong kinabuhi. Kon mamatay kita uban kang Cristo, gituohan nato nga mabuhi usab kita uban kaniya. Kay nasayod kita nga si Cristo gibanhaw ug dili na gayod siya mamatay pag-usab, ug ang kamatayon wala nay gahom kaniya. Ang kamatayon niya mao ang kamatayon sa pagpakasala, sa makausa alang sa tanan; ug nagkinabuhi siya karon alang lamang sa Dios. Busa isipa ang inyong kaugalingon nga patay na sa pagpakasala apan buhi alang sa Dios, hiniusa kang Cristo Jesus.
ANG PULONG SA GINOO.
BERSO SA DILI PA ANG EBANGHELYO
Aleluya! Sulti, Ginoo, kay namati ang imong sulugoon; anaa kanimo ang mga pulong sa kinabuhing walay katapusan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 10: 37-42
Si Jesus miingon sa iyang mga tinun-an: "Ang nagmahal sa iyang amahan o sa iyang inahan labaw kanako, dili angay kanako; ug kadtong nagmahal sa iyang anak labaw kanako, dili angay kanako. Ang dili mopas-an sa iyang krus ug mosunod kanako, dili angay kanako. Ug kadtong mag-amping sa iyang kinabuhi, kawad-an hinoon niini; apan ang kawad-an sa iyang kinabuhi tungod kanako, makabaton niini." "Ang modawat kaninyo, modawat usab kanako; ug ang mudawat kanako, modawat usab kaniya nga nagsugo kanako. Ang modawat sa sinugo sa Dios tungod sa iyang pagkasinugo sa Dios, gantihan usab sa ganti nga madawat sa sinugo; ug ang modawat sa tinuod nga maayong tawo, tungod sa iyang pagkamaayong tawo, gantihan usab sa ganti nga madawat sa maayong tawo. Ug hinumdomi kini: kadtong magpainom bisan na lag bugnawng tubig sa labing ubos sa akong mga sumusunod, tungod kay siya akong sumusunod, gantihan gayod."
ANG EBANGHELYO SA GINOO.
ANTIPONA SA PANGALAWAT
Dayga ang Ginoo, kalag ko, ug ang tanan nga ania kanako magdayeg unta sa iyang santos nga ngalan.