ANTIPONA SA PAGSUGOD
Ang Dios mao ang kusog sa iyang katawhan. Diha kaniya, kita nga iyang mga pinili, nagpuyo nga walay kahadlokan. Luwasa kami, O Ginoo, nga nagaambit sa imong kinabuhi buhi ug hatagi kami sa imo imong panalangin; pagpakahimo nga among magbalantay hangtod sa kahangturan.
PAGBASA GIKAN SA BASAHON SA MGA PAGBANGOTAN
Lam. 2: 2. 10-14. 18-19
Ang tanang balangay sa Juda sa walay kukaluoy gigun-ob sa Ginoo; gilumpag niya ang mga kuta ug gipakaulawan ang gingharian ug ang mga pangulo niini. Sa yuta nanglingkod nga walay timik ang mga kadagkoan sa Sion; gibuboan nilag bunbon ang ilang ulo ug nagbisti silag sako; mitikubo sa yuta ang mga dalaga sa Jerusalem. Namula ang akong mga mata sa pagpunayg hilak; naguol ug naluya ang kasingkasing ko, kay nalaglag man ang akong katawhan, mga masusu ug gagmayng kabataan gipanguyapan sa kadalanan sa siyudad. Nangayo sila sa ilang inahan og makaon ug mainom, samtang gipanguyapan sila sama sa mga tawong samdan, ug nabugtoan sila sa gininhawa diha sa mga bukton sa ilang inahan. Unsa may ikasulti ko kanimo, O Jerusalem? Unsaon ko man paglipay kanimo nga ingon man kalapad sa dagat ang imong kadaot, ug walay nag-antos sama kanimo? Kinsa may makatabang kanimo? Pulos bakak ang gisulti kanimo sa imong mga propeta; wala ka nila pakit-a sa imong sala aron mahiagom ka gayod sa kadaot, gipahunahuna ka nila nga wala ka magkinahanglan sa paghinulsol. Sangpita ang Ginoo, O Jerusalem! Pabahaa daw suba ang imong mga luha adlaw ug gabii! Ayaw pag-undang og hilak! Bangon sa gabii ug pakitabang sa Ginoo! Ibubo daw tubig ang tanan mong pagbati atubangan sa Ginoo! Dangop kaniya inisa ang imong kamut, tungod sa imong kabataan nga nangaluya na sa kagutom diha sa kadalanan.
ANG PULONG SA GINOO.
SALMO RESPONSORYO
Ps. 74: 1-2. 3-5. 5-7. 20-21
T. Ginoo, ayaw hikalimti ang kinabuhi sa imong mga kabus.
Ngano, O Ginoo, nga imo man kami nga gisalikway hangtod sa kahangturan? Nganong nahaling ang imong kasuko batok sa karnero sa imong panon? Hinumdomi ang imong panon nga imong gipundok kanhi, ang kaliwat nga imong gitubos nga imong kabilin, sa bukid sa Sion, diin ikaw magpuyo.
T. Ginoo, ayaw hikalimti ang kinabuhi sa imong mga kabus.
Idulong ang imong mga lakang ngadto sa mga naguba; ngadto sa tanang kadaut nga nahimo sa kaaway didto sa santuwaryo. Ang imong mga kaaway naninggit nga madaugon didto sa imong alampoanan; gipabarog nila didto ang mga timaan sa ilang kadaugan. Sama sila sa mga tawo nga nagdalag mga wasay aron iputol sa mga kahoy.
T. Ginoo, ayaw hikalimti ang kinabuhi sa imong mga kabus.
Ginamit ang tigib ug martilyo gilankat nila ang tanang bungbong sa santuwaryo. Giduslitan nila ang imong alampoanan; ang dapit diin nagpuyo ang imong ngalan ilang giguba ug gipanamastamasan.
T. Ginoo, ayaw hikalimti ang kinabuhi sa imong mga kabus.
Tan-awa ang imong kasabutan, kay ang mga lungib sa yuta ug ang kapatagan napuno sa kaguliyang. Hinaut unta nga ang mapaubsanon dili mosibog nga maulawan; hinaut unta nga ang nasakit ug ang kabus magadayeg sa imong ngalan.
T. Ginoo, ayaw hikalimti ang kinabuhi sa imong mga kabus.
BERSO SA DILI PA ANG EBANGHELYO
Aleluya! Ang akong mga karnero mamati sa akong tingog; nakaila ako kanila ug sila nagsunod kanako. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 8: 5-17
Sa pagsulod ni Jesus sa Capernaum, usa ka opisyal nga Romanhon mitagbo kaniya ug nagpakitabang. Siya miingon, "Sir, nasakit ang akong sulugoon ug atua sa akong balay naghigda; dili siya makalihok, ug nag-antos pag-ayo." Si Jesus miingon, "Moadto ako ug ayohon ko siya." Ang opisyal mitubag, "Ayaw lang pag-adto, Sir, kay dili ako angay nga mopadayon kanimo sa akong balay. Isulti lamang ug mamaayo ang akong sulugoon. Ako mismo ubos sa pagbuot sa labawng mga opisyal, ug aduna akoy mga sundalo nga ubos sa akong pagmando; kon sugoon ko kining tawhana sa paglakaw, molakaw siya; ug kon sugoon ko kanang tawhana sa pag-ari, moari siya; ug kon sugoon ko ang akong ulipon sa pagbuhat og bisan unsa, mobuhat siya." Natingala si Jesus sa iyang pagkabati niini, ug miingon siya sa mga tawo nga mikuyog kaniya, "Sultihan ko kamo nga wala ako makakitag pagtuo dinhi sa Israel nga sama kadako niini. Hinumdomi kini: daghan ang mangabot gikan sa sidlakan ug sa kasadpan ug makigsalo kang Abraham, kang Isaac, ug kang Jacob didto sa Gingharian sa langit. Apan sila nga adto unta sa Gingharian itambog ngadto sa kangitngitan sa gawas diin maghilak sila ug magkagot ang ilang ngipon." Ug miingon si Jesus sa opisyal, "Pauli sa inyo; mahimo ang imong gituohan." Ug ang sulugoon sa opisyal naayo niadtong taknaa. Unya miadto si Jesus sa balay ni Pedro ug didto nakita niya ang ugangang babaye ni Pedro nga naghigda nga gihilantan. Gihikap niya ang kamut sa masakiton ug gihuwasan siya sa hilanat. Unya mibangon siya ug misilbi kaniya. Sa pagkasawomsom na, gidala sa mga tawo ngadto kang Jesus ang daghang mga giyawaan. Gipagula ni Jesus ang daotang mga espiritu pinaagi sa pulong lamang ug giayo niya ang tanang masakiton. Gihimo niya kini aron matuman ang giingon ni propeta Isaias, "Siya gayod maoy nag-ayo sa atong mga balatian ug mga sakit."
ANG EBANGHELYO SA GINOO.
ANTIPONA SA PANGALAWAT
Ang mga mata sa tanan, nagtan-aw kanimo, ug gihatagan mo sila og kalan-on sa hustong panahon.