ANTIPONA SA PAGSUGOD
Ang Dios mao ang kusog sa iyang katawhan. Diha kaniya, kita nga iyang mga pinili, nagpuyo nga walay kahadlokan. Luwasa kami, O Ginoo, nga nagaambit sa imong kinabuhi ug hatagi kami sa imong panalangin; pagpakahimo nga among magbalantay hangtod sa kahangturan.
PAGBASA GIKAN SA IKADUHANG BASAHON SA MGA HARI
2 Kgs. 25: 1-12
Sa ikasiyam ka tuig sa ikanapulo ka adlaw sa ikanapulo ka bulan sa paghari ni Sedekias, misulong si Hari Nabucodonosor sa Jerusalem uban sa tanan niyang kasundalohan, ug gilikosan nila kini. Nagbuhat silag mga trensera libot niini. Gilikosan nila ang siyudad hangtod sa ikanapulog-usa ka tuig sa paghari ni Sedekias. Sa ikasiyam ka adlaw sa ikaupat nga bulan, grabe na kaayo ang gutom sa siyudad ug wala nay makaon ang mga tawo. Unya gibuslotan nila ang kuta sa siyudad. Ug pagkagabii miikyas ang hari uban sa tanang sundalo niya agi sa pultahan tungatunga sa duha ka kuta duol sa tanaman sa hari, bisag gilibutan sa mga taga-Babilonia ang siyudad. Didto sila padulong sa Araba. Apan ang hari gigukod sa mga taga-Babilonia ug hiapsan siya didto sa Kapatagan sa Jerico. Ang iyang kasundalohan nagkatibulaag pagpanagan. Unya hidakpan ang hari ug gidala nila siya ngadto sa Ribla diin didto si Nabucodonosor, ang hari sa Babilonia, ug gisilotan siya ni Nabucodonosor. Gipatay nila ang mga anak ni Sedekias sa atubangan gayod niya ug gilugit nila ang iyang mata ug gigapos siyag kadena ug gibihag ngadto sa Babilonia. Sa ikalimang tuig sa ikapitong adlaw sa bulan, nga mao ang ikanapulog-siyam ka tuig sa paghari ni Nabucodonosor sa Babilonia, si Nebusaradan, ang kapitan sa mga guwardiya sa hari sa Babilonia, miadto sa Jerusalem. Gisunog niya ang Templo sa Ginoo ingon man ang palasyo sa hari ug ang tanang balay sa Jerusalem. Ug gilumpag sa mga taga-Babilonia nga kuyog ni Nebusaradan ang mga kuta nga naglibot sa Jerusalem. Ang mga tawo nga nahibilin sa siyudad ug ang mga sundalo nga mitipon sa kasundalohan sa hari sa Babilonia ug ang uban pang mga tawo gidala ni Nebusaradan ngadto sa Babilonia. Apan gibilin ni Nebusaradan ang mga kabus kaayo aron maoy mag-atiman sa mga parasan ug aron maoy mag-uma.
ANG PULONG SA GINOO.
SALMO RESPONSORYO
Ps. 137: 1-2. 3. 4-5. 6
T. Dili unta makasulti ang akong dila, kon ugaling hikalimtan ko ikaw.
Sa daplin sa mga suba sa Babilonia nagalingkod kami ug nagahilak, sa among paghinumdom sa Sion. Didto sa mga kahoy niadtong yutaa gisab-ong namo ang among mga alpa.
T. Dili unta makasulti ang akong dila, kon ugaling hikalimtan ko ikaw.
Bisan ang mga mananakop kanamo naghangyo nga bungaton namo ang mga titik sa among mga awit. Ug ang mamimihag kanamo nag-awhag kanamo nga maglipay: "Awiti kami sa mga awit sa Sion."
T. Dili unta makasulti ang akong dila, kon ugaling hikalimtan ko ikaw.
Unsaon man namo pag-awit sa usa ka awit sa Ginoo diha sa yuta nga langyaw? Kon hikalimtan ko ikaw, O Jerusalem, hikalimtan unta ang akong tuong kamut.
T. Dili unta makasulti ang akong dila, kon ugaling hikalimtan ko ikaw.
Motapot unta ang akong dila sa akong alingagngag kon dili ako mahinumdom kanimo, kon dili ko palabihon ang Jerusalem labaw sa akong kalipay.
T. Dili unta makasulti ang akong dila, kon ugaling hikalimtan ko ikaw.
BERSO SA DILI PA ANG EBANGHELYO
Aleluya! Ako mao ang kahayag sa kalibutan, nag-ingon ang Ginoo; ang tawo nga magsunod sa akong kabubut-on makabaton sa kahayag sa kinabuhi. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 8: 1-4
Si Jesus milugsong sa bungtod ug misunod kaniya ang bagang panon sa katawhan. Unya may usa ka sanlahon nga miduol kaniya, miluhod sa iyang atubangan, ug miingon, "Sir, kon buot ka, mahimo mo ang pag-ayo kanako." Gihikap siya ni Jesus ug giingnan, "Buot ko; mamaayo ka!" Ug dihadiha naayo siya. Unya miingon si Jesus kaniya, "Pamati! Ayaw isugilon kini kang bisan kinsa, kondili adtoa dayon ang pari ug pagpahiling kaniya; unya paghalad sumala sa gisugo ni Moises aron ang tanan mahibalo nga naayo ka na."
ANG EBANGHELYO SA GINOO.
ANTIPONA SA PANGALAWAT
Ang mga mata sa tanan, nagtan-aw kanimo, ug gihatagan mo sila og kalan-on sa hustong panahon.