ANTIPONA SA PAGSUGOD
Ang Dios mao ang kusog sa iyang katawhan. Diha kaniya, kita nga iyang mga pinili, nagpuyo nga walay kahadlokan. Luwasa kami, O Ginoo, nga nagaambit sa imong kinabuhi ug hatagi kami sa imong panalangin; pagpakahimo nga among magbalantay hangtod sa kahangturan.
PAGBASA GIKAN SA IKADUHANG BASAHON SA MGA HARI
2 Kgs. 24: 8-17
Napulog-walo ang panuigon ni Joaquin sa paghari niya sa Juda, ug naghari siya sa Jerusalem sulod lamang sa tulo ka bulan. Si Nehosta maoy iyang inahan, anak ni Elnatan nga taga-Jerusalem. Dautan usab ang iyang kinabuhi atubangan sa Ginoo sama sa iyang katigulangan. Niadtong panahona misulong sa Jerusalem ang kasundalohan ni Nabucodonosor, hari sa Babilonia, ug gilibotan nila ang siyudad. Si Hari Nabucodonosor miadto sa siyudad, ug miampo si Joaquin kaniya, ingon man ang iyang inahan ug mga opisyal sa kasundalohan lakip ang mga prinsipe ug mga opisyal sa palasyo. Gibihag siya sa hari sa Babilonia sa ikawalong tuig sa iyang paghari, ug gidala usab ang tanang bahandi sa Templo sa Ginoo ug sa palasyo sa hari. Gipamuak ang tanang galamiton nga bulawan sa Templo nga hinimo ni Salomon, hari sa Israel. Nahitabo kini sumala gayod sa gipasidaan sa Ginoo. Gibihag niya ang tanang molupyo sa Jerusalem lakip ang mga prinsipe ug ang mga isog ug bantugang mga tawo. Napulo ka libo silang tanan lakip ang mga tawong batid sa paghimo sa nagkalainlaing butang, ug ang mga platero. Ang mga kabus ra gayoy gibilin. Gibihag ni Nabucodonosor si Joaquin ngadto sa Babilonia, ingon man ang inahan sa hari, ug ang iyang mga asawa, ug ang mga opisyal ug ang mga kadagkoan sa nasod. Gibihag usab niya ang pito ka libo ka maisog nga mga tawo ug usa ka libo katawo nga batid sa pagpanggama sa nagkalainlaing butang, ug ang mga platero. Silang tanan angay mahimong sundalo. Ang uyoan ni Joaquin nga si Matanias maoy gihimong hari ni Nabucodonosor, ug giilisan ang iyang ngalan og Sedekias.
ANG PULONG SA GINOO.
SALMO RESPONSORYO
Ps. 79: 1-2. 3-5. 8. 9
T. Tungod sa himaya sa imong ngalan, O Ginoo, luwasa kami.
O Dios, ang mga nasod miabot ngadto sa imong kabilin; ilang gipasipad-an ang imong balaang templo, ilang gigun-ob ang Jerusalem. Ilang gipanghatag ang mga patayng lawas sa imong mga sulugoon ingog kalan-on sa kalanggaman sa langit, ang unod sa imong buotang mga sulugoon ngadto sa mga mananap sa yuta.
T. Tungod sa himaya sa imong ngalan, O Ginoo, luwasa kami.
Gibubo nila ang ilang dugo daw tubig libot sa Jerusalem ug walay usa nga maglubong kanila. Nahimo kamig talamayon sa among mga silingan, giyam-iran ug gibugalbugalan sa nanaglibot kanamo. O Ginoo, hangtod kanus-a? Mapungot ka ba kanamo hangtod kahangturan? Modilaab ba ang imong kasilag ingog kalayo?
T. Tungod sa himaya sa imong ngalan, O Ginoo, luwasa kami.
Ayaw hinumdomi batok kanamo ang mga kalapasan sa nangaging panahon; moabot unta kanamo ang imong kaluoy sa walay langan, kay nabanlud kami sa kahiladman.
T. Tungod sa himaya sa imong ngalan, O Ginoo, luwasa kami.
Tabangi kami, O Dios among manluluwas, tungod sa himaya sa imong ngalan. Luwasa kami ug pasayloa ang among kasal-anan tungod sa imong ngalan.
T. Tungod sa himaya sa imong ngalan, O Ginoo, luwasa kami.
BERSO SA DILI PA ANG EBANGHELYO
Aleluya! Ang imong mga pulong, Ginoo, espiritu ug kinabuhi, ikaw naghupot sa mga pulong sa kinabuhi nga walay katapusan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 7: 21-29
Si Jesus miingon sa iyang mga tinun-an, "Dili ang tanan nga magtawag kanako 'Ginoo, Ginoo,' makasulod sa Gingharian sa langit, kondili kadto lamang nagtuman sa kabubut-on sa akong Amahan nga atua sa langit. Kon moabot na ang Adlaw sa Paghukom, daghan unya ang moingon kanako, 'Ginoo, Ginoo, dili ba sa imong ngalan nagsangyaw man kami sa mensahe sa Dios, ug pinaagi sa imong ngalan gihinginlan namo ang mga yawa, ug naghimo kamig daghang mga milagro? Apan ako moingon unya kanila, Wala ako makaila kaninyo. Pahawa kamong makasasala!" "Busa ang tanan nga nakadungog sa akong gisulti ug dili magtuman niini, mahisama sa usa ka tawong buangbuang nga nagtukod sa iyang balay diha sa balas. Sa dihang mibundak ang ulan, ug mibaha ang mga suba, ug ang hangin mihapak ug mikusokuso niadtong balaya, natumba kini ug nagun-ob!" Sa pagkahuman ni Jesus og sulti niining mga butanga, ang mga tawo natingala sa iyang pagtulon-an, kay giubanan mag gahom ang iyang pagtudlo, ug dili sama sa ilang mga magtutudlo sa Balaod.
ANG EBANGHELYO SA GINOO.
ANTIPONA SA PANGALAWAT
Ang mga mata sa tanan, nagtan-aw kanimo, ug gihatagan mo sila og kalan-on sa hustong panahon.