ANTIPONA SA PAGSUGOD
May tawo nga gipadala gikan sa Dios, nga ginganlan og Juan. Kini siya miabut aron pagmatuod sa kahayag, ug pag-andam og katawhan nga hingpit alang sa Ginoo.
PAGBASA GIKAN SA BASAHON NI PROPETA ISAIAS
Is. 49: 1-6
Pamati kanako, O kapuloan, ug patalinghug, kamong katawhan nga atua sa layo. Gipili ako sa Ginoo didto pa sa tiyan sa akong inahan; gihatagan ako niya sa akong ngalan. Gihimo niya ang akong dila sama sa usa ka hait nga espada; gipanalipdan ako niya diha sa landong sa iyang kamut, gihimo ako niya nga usa ka talinis nga udyong ug gitagoan ako niya diha sa iyang sudlanag pana. Ug giingnan ako niya, "Israel, sulugoon ko ikaw, ug pasidunggan ako tungod kanimo." Apan miingon ako, "Kawang lamang ang akong kahago; gigamit ko ang akong kusog sa wala lamay hinungdan." Apan siya ang mohatag kanakog hustisya ug ang moganti kanako. Sa wala pa gani ako matawo gipili na ako sa Ginoo aron pagtigom sa nagkatibulaag nga katawhan sa Israel. Gipasidunggan ako niya ug gihatagag gahom. Miingon ang Ginoo kanako, "May mas dako pang buluhaton nga akong ipabuhat kanimoaron pagpatunhay sa mga banay ni Israel ug sa pagpahiuli sa nasalin niya; ug himoon ko ikaw nga kahayag sa kanasuran, aron ang akong kaluwasan modangat sa kinasuokan sa kalibutan."
ANG PULONG SA GINOO.
SALMO RESPONSORYO
Ps. 139: 1-3. 13-14. 14-15
T. Dayegon ko ikaw kay gibuhat ako nimo sa paaging katingalahan.
O Ginoo, gisulay mo ako ug nakaila ikaw kanako; nahibalo ikaw kanus-a ako molingkod ug anus-a ako motindog, nakasabot ka sa akong mga hunahuna gikan sa halayo. Imong giusisa ang akong mga pagpanaw ug ang akong pagpahulay, sinati ka sa tanan kong mga paagi.
T. Dayegon ko ikaw kay gibuhat ako nimo sa paaging katingalahan.
Sa pagkatinuod ikaw ang nag-umol kanako; imo ako nga gibuhat didto sa tiyan sa akong inahan. Pasalamatan ko ikaw nga ako gibuhat sa paagi nga makahahadlok ug katingalahan; kahibulongan ang imong mga buhat.
T. Dayegon ko ikaw kay gibuhat ako nimo sa paaging katingalahan.
Nakaila usab ikaw og maayo sa akong kalag; ang akong kabukogan wala malilong kanimo. Diha nga gibuhat ako sa tago, diha nga giumol ako sa kahiladman sa yuta.
T. Dayegon ko ikaw kay gibuhat ako nimo sa paaging katingalahan.
PAGBASA GIKAN SA MGA BUHAT SA MGA APOSTOLES
Acts 13: 22-26
Si Pablo miingon: "Sa dihang gipapahawa siya sa trono, si David gihimo sa Dios nga ilang hari. Kini ang giingon sa Dios mahitungod kaniya: 'Nakita ko nga si David, anak ni Isai, nakapahimuot kanako, ug magbuhat sa tanan nga isugo ko kaniya.' Si Jesus nga kaliwat ni David mao ang gipili sa Dios aron magluwas sa katawhan sa Israel sumala sa iyang gisaad. Sa wala pa moanhi si Jesus, nagwali si Juan ngadto sa tanang mga tawo sa Israel nga kinahanglan maghinulsol sila ug magpabunyag. Ug sa hapit na si Juan mamatay, miingon siya sa katawhan: 'Kinsa ba ako sa inyong hunahuna? Dili ako ang inyong gipaabot. Apan sunod kanako may moanhi, ug dili ako takus bisan gani paghubo sa iyang sandalyas." "Mga igsuon nga kaliwat ni Abraham ug kamong tanang dili Judio nga nagtuo sa Dios: kita mao ang gipadad-an niining mensahe sa kaluwasan!"
ANG PULONG SA GINOO.
BERSO SA DILI PA ANG EBANGHELYO
Aleluya! "Ug ikaw, anak ko, tawgon ka nga propeta sa Dios nga Labing Halangdon; Mag-una ka sa Ginoo, aron pag-andam sa iyang dalan." Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 1: 57-66. 80
Miabot ang panahon nga si Isabel manganak na, ug nanganak siyag lalaki. Nakadungog ang iyang mga silingan ug mga paryenti nga maayo gayod ang Ginoo kaniya, ug nangalipay silang tanan uban kaniya. Sa usa na ka semana ang bata, mianha sila aron paghimo sa seremonyas sa pagtuli. Ila na untang hinganlan siyag Zacarias, ang ngalan sa iyang amahan, apan miingon ang inahan, "Ayaw! Juan ang ingalan kaniya!" Miingon sila kaniya, "Apan wala man kamoy paryenti nga nagdala nianang ngalana!" Unya misinyas sila sa iyang amahan aron pagpangutana kaniya unsay gusto niyang ingalan sa bata. Nangayog sulatanan si Zacarias ug misulat, "Juan ang iyang ngalan". Ug nahibulong pag-ayo silang tanan! Dihadiha nakasulti si Zacarias ug gidayeg niya ang Dios. Nangahadlok ang mga silingan, ug mikaylap sa tanang kabungtoran sa Judea ang balita mahitungod niining mga butanga. Namalandong ang tanan nga nakabati niini ug nangutana, "Unsa kaha ang kaugmaon niining bataa?" Kay tataw kaayo nga ang gahom sa Ginoo nag-uban kaniya." Mitubo ang bata ug midako sa lawas ug sa espiritu. Nagpuyo siya didto sa dapit nga awaaw hangtod sa adlaw nga moatubang siya sa katawhan sa Israel.
ANG EBANGHELYO SA GINOO.
ANTIPONA SA PANGALAWAT
Ang atong Dios nga maluluy-on ug malumo mopadan-ag kanato sa banagbanag nga masanagon sa atong kaluwasan.