ANTIPONA SA PAGSUGOD
Siya mahimong dako sa atubangan sa Ginoo, ug mapuno sa Espiritu Santo samtang anaa pa sa tiyan sa iyang inahan, ug daghan ang malipay sa iyang pagkatawo.
PAGBASA GIKAN SA BASAHON NI PROPETA JEREMIAS
Jer. 1: 4-10
Ang Ginoo miingon kanako, "Sa wala ko pa gani ikaw lalanga, ug sa wala pa ikaw matawo, gipili ko na ikaw aron mahimong propeta alang sa kanasoran." Unya mitubag ako, "Ginoong Dios, dili ako mahibalong mosulti kay batan-on pa ako kaayo." Apan miingon ang Ginoo kanako, "Ayaw pag-ingon nga batan-on pa ikaw kaayo, apan suginli ang katawhan nga ako nagsugo kanimo sa pagsugilon kanila sa tanan nga gisugo ko kanimo. Ayaw kahadlok kanila, kay ubanan ug panalipdan ko ikaw. Ako, ang Ginoo, maoy nag-ingon niini!" Unya gihikap sa Ginoo ang akong mga ngabil, ug giingnan niya ako, "Ania ang pulong nga buot ko nga imong isangyaw. Karong adlawa, hatagan ko ikawg gahom sa pagbuot sa mga kanasoran ug sa mga gingharian, sa pag-ibot ug sa pagpukan, sa paglaglag ug paglumpag sa paglig-on ug pagpatindog."
ANG PULONG SA GINOO.
SALMO RESPONSORYO
Ps. 71: 1-2. 3-4. 5-6. 15. 17
T. Sukad sa tiyan sa akong inahan, Ikaw ang akong kusog.
Kanimo, O Ginoo, nagadangop ako; ayaw gayod itugot nga kaulawan ako. Sa imong katarong luwasa ako, ug palingkawasa ako; ipaabong ang imong dunggan kanako, ug luwasa ako.
T. Sukad sa tiyan sa akong inahan, Ikaw ang akong kusog.
Pagpakahimong akong matuod nga dalangpanan, usa ka kota nga manalipod kanako, kay ikaw ang akong bato ug akong kota. O Dios ko luwasa ako sa kamot sa daotan.
T. Sukad sa tiyan sa akong inahan, Ikaw ang akong kusog.
Kay ikaw ang akong kalauman, O Ginoo; ang akong gisaligan, O Dios, gikan sa akong kabatan-on. Kanimo nagasalig ako gikan sa akong pagkatawo gikan sa tiyan sa akong inahan, ikaw ang akong kusog.
T. Sukad sa tiyan sa akong inahan, Ikaw ang akong kusog.
Magsangyaw ang akong baba sa imong katarong adlaw-adlaw sa imong kaluwasan. O Dios, gitudloan mo ako sukad sa akong kabatan-on ug hangtod karon magasangyaw ako sa imong mga buhat nga katingalahan.
T. Sukad sa tiyan sa akong inahan, Ikaw ang akong kusog.
PAGBASA GIKAN SA UNANG SULAT NI SAN PEDRO
1 Pt. 1: 8-12
Tinuod nga gihigugma ninyo si JesuCristo bisan wala kamo makakita kaniya, ug nagtuo kamo kaniya bisag wala kamo makakita kaniya hangtod karon. Busa nalipay kamo pag-ayo sa kalipay nga dili malitok sa pulong, tungod kay nakadawat kamo sa bunga sa inyong pagtuo nga mao ang inyong kaluwasan. Ang mga propeta nagsusi ug nagpakisayod mahitungod niining maong kaluwasan, ug nanagna sila mahitungod niining gasa nga ihatag sa Dios kaninyo. Nagpakisusi sila kon anus-a ug sa unsang paagi moabot kini. Kining panahona maoy gitudlo sa Espiritu ni Cristo nga diha kanila sumala sa gitagna sa Espiritu mahitungod sa mga pag-antos ni Cristo ug sa himaya nga mosunod niini. Gipadayag sa Dios sa maong mga propeta nga ang gihisgotan nila dili alang sa ilang kaugalingong kaayohan kondili alang kaninyo, kining mga butanga nadungog ninyo gikan sa mga magwawali sa Maayong Balita pinaagi sa gahom sa Espiritu Santo nga gipadala gikan sa langit. Kini ang mga butang nga buot sabton bisan gani sa mga anghel.
ANG PULONG SA GINOO.
BERSO SA DILI PA ANG EBANGHELYO
Aleluya! Mianhi siya aron pagsaksi mahitungod sa kahayag, ug ang katawhan andamon niya alang sa Ginoo. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 1: 5-17
Sa panahon nga si Herodes maoy hari sa Judea, may usa ka pari nga ginganlag Zacarias nga sakop sa parianong laray ni Abias. Isabel ang ngalan sa iyang asawa nga sakop usab sa usa ka parianong banay. Silang duha nagpuyog dalaygong kinabuhi atubangan sa Dios, ug nagtuman pag-ayo sa tanang sugo ug balaod sa Ginoo. Wala silay anak kay dili na man makapanganak si Isabel, og siya ug si Zacarias tigulang na man kaayo. Usa ka adlaw niana, nagtuman si Zacarias sa iyang katungdanan pagkapari atubangan sa Dios diha sa bahin sa pag-alagad nga iyang angkon adlaw-adlaw. Sumala sa batasan nga gisunod sa mga pari, napili siya pinaagi sa ripa sa pagsunog sa insenso didto sa halaran. Busa misulod siya sa templo sa Ginoo, samtang nag-ampo ang panon sa mga tawo didto sa gawas sa takna nga gisunog ang insenso. Unya usa ka anghel sa Ginoo mipakita kaniya; nagtindog ang anghel sa tuo sa halaran diin gisunog ang insenso. Sa pagkakita ni Zacarias sa anghel, nalibog ug nahadlok siya; apan giingnan siya sa anghel: "Ayaw kahadlok, Zacarias! Gidungog sa Dios ang imong pag-ampo, ug ang imong asawa nga si Isabel moanak og lalaki. Nganli siya'g Juan. Inigkatawo niya, magmaya ka ug maglipay ingon man ang uban kay mahimo siyang dako atubangan sa Ginoo. Dili gayod siya moinom ug bino o maisog nga ilimnon. Sukad sa iyang pagkatawo, mapuno siya sa Espiritu Santo, ug daghang mga tawo sa Israel dad-on niya balik ngadto sa Ginoo nga ilang Dios. Mag-una siya sa Ginoo ug makabaton siya'g espirito ug gahum sama sa nabatonan ni Propeta Elias. Himoon niya nga mga amahan ug mga anak magkauli; ang mga masupilon iyang pabalikon sa matarong nga dalan: ug ang katawhan andamon niya alang sa Ginoo.
ANG EBANGHELYO SA GINOO.
ANTIPONA SA PANGALAWAT
Dalaygon ang Ginoong Dios sa Israel, kay iyang giduaw ug giluwas ang iyang katawhan.