ANTIPONA SA PAGSUGOD
Ang Dios mao ang kusog sa iyang katawhan. Diha kaniya, kita nga iyang mga pinili, nagpuyo nga walay kahadlokan. Luwasa kami, O Ginoo, nga nagaambit sa imong kinabuhi ug hatagi kami sa imong panalangin; pagpakahimo nga among magbalantay hangtod sa kahangturan.
PAGBASA GIKAN SA IKADUHANG BASAHON SA MGA HARI
2 Kgs. 19: 9-11. 14-21. 31-35. 36
Unya nakabalita ang hari sa Asiria nga si Terhaca, ang hari sa Etiopia, nagpaingon na sa Asiria aron pagsulong kaniya. Sa pagkabalita niya niini, nagsugo siyag mga tawo sa pagsulti kang Ezequias: "Ayaw palingla nianang imong Dios nga nagsaad kanimo nga ang Jerusalem dili gayod mailog nako. Nasayod ka na sa gibuhat sa mga hari sa Asiria sa tanang nasod nga ilang gisulong; gilaglag gayod nila sa hingpit. Nagtuo ka ba nga may makaluwas kanimo? Nadawat ni Ezequias ang sulat gikan sa mga sinugo sa hari sa Asiria ug iya kining gibasa. Unya miadto siya sa Templo sa Ginoo ug iya kining gihikyad sa atubangan sa Ginoo. Unya nag-ampo siya, "O Ginoong Dios sa Israel, nga anaa maglingkod sa trono ibabaw sa mga kerubin: Ikaw lamang ang Dios nga naghari sa tibuok kalibutan, ug maoy nagbuhat sa langit ug sa yuta. Pamati-a intawon ako, O Ginoo, ug tan-awa ako. Pamati-a ang mga pulong ni Senakerib nga ania niining sulat nga iyang gipadala kanako agig pagbiaybiay kanimo. Tinuod, O Ginoo, nga gipanglaglag sa mga hari sa Asiria ang ubang mga nasod, ug gipanunog nila ang mga dios sa maong mga nasod, kay dili man sila tinuod nga Dios, kondili mga binuhat lamang sa tawo gikan sa kahoy ug bato, ug nangaugdaw ang maong mga dios. Busa karon, O Ginoo, nga among Dios, luwasa intawon kami sa hari sa Asiria aron masayod ang tanang gingharian sa kalibutan nga ikaw lamang gayod, O Ginoo, mao ang Dios." Unya gipasugoan ni Isaias si Hari Ezequias nga agig tubag sa pag-ampo sa hari ang Ginoo miingon, "Gibiaybiay ka sa katawhan sa Sion ug gikataw-an ka nila." Kay sa Jerusalem may mga tawo nga mahibilin, ug sa Bukid sa Sion may mga tawo usab nga magpabiling buhi. Buhaton gayod kini sa Ginoo tungod sa iyang gugma. "Kini ang giingon sa Ginoo bahin sa hari sa Asiria, "Dili siya makasulod ni makaduol niining siyudara, ni makahigayon siya sa paggamit sa iyang pana. Mopauli siya sa iyang nasod agi sa dalan nga iyang giagian sa iyang pagpaingon nganhi; dili siya makasulod sa Jerusalem. Kay panalipdan ko kining siyudara tungod ug alang kanako ug sa akong alagad nga si David." Ug niadtong gabhiona miadto ang anghel sa Ginoo sa kampo sa kasundalohan sa Asiria, ug gipatay niya ang usa ka gatos ug kawaloag-lima ka libo ka sundalo; sa pagmata sa taga-Asiria sa pagkabuntag, nakita nila ang maong mga sundalo nga patay na. Busa si Senakerib, ang hari sa Asiria, mipauli sa ila ug didto puyo sa Ninibe.
ANG PULONG SA GINOO.
SALMO RESPONSORYO
Ps. 48: 2-3. 3-4. 10-11
T. Ang Dios nagasagang sa iyang siyudad hangtod sa kahangturan.
Halangdon ang Ginoo ug angayng daygon diha sa siyudad sa atong Dios. Ang iyang balaang bukid, labing matahom sa kabukiran, mao ang kalipay sa tibuok nga kalibutan.
T. Ang Dios nagasagang sa iyang siyudad hangtod sa kahangturan.
Ang bukid sa Sion, "Ang kinalay-an sa Amihanan," mao ang siyudad sa dakong Hari. Ang Dios anaa sa iyang mga kota; gibantog siya sa pagkadalangpanan.
T. Ang Dios nagasagang sa iyang siyudad hangtod sa kahangturan.
O Dios, gipalandong namo ang imong gugma sulod sa imong templo. Sumala sa imong ngalan, O Dios, mao usab ang imong kadayganan. Nagaabot ngadto sa kautlanan sa yuta; Sa katarong puno ang imong kamut.
T. Ang Dios nagasagang sa iyang siyudad hangtod sa kahangturan.
BERSO SA DILI PA ANG EBANGHELYO
Aleluya! Tanduga ang akong kasingkasing aron magtuman ako sa imong kabubut-on; tudlo-i ako sa imong balaod, O Dios. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 7: 6. 12-14
Si Jesus miingon sa iyang mga tinun-an, "Ayaw ihatag ang butang balaan ngadto sa mga iro, kay tingalig mosumbalik sila ug mopaak kaninyo. Ug ayaw iitsa ang mga perlas ngadto sa mga baboy, kay kini tamaktamakan lamang nila." "Buhata sa uban ang buot ninyo nga buhaton nila kaninyo: kini ang kahulugan sa Balaod ni Moises ug sa pagtulon-an sa mga propeta." "Sulod kamo sa sigpit nga ganghaan, kay lapad ang pultahan ug sayon ang dalan paingon sa impiyerno, ug kini ang gisubay sa kadaghanan. Apan masigpit ang ganghaan ug malisod ang dalan paingon sa kinabuhing dayon, ug diyotay ra ang nakakaplag niini."
ANG EBANGHELYO SA GINOO.
ANTIPONA SA PANGALAWAT
Ang mga mata sa tanan, nagtan-aw kanimo, ug gihatagan mo sila og kalan-on sa hustong panahon.