ANTIPONA SA PAGSUGOD
Ang Dios mao ang kusog sa iyang katawhan. Diha kaniya, kita nga iyang mga pinili, nagpuyo nga walay kahadlokan. Luwasa kami, O Ginoo, nga nagaambit sa imong kinabuhi ug hatagi kami sa imong panalangin; pagpakahimo nga among magbalantay hangtod sa kahangturan.
PAGBASA GIKAN SA IKADUHANG BASAHON SA MGA HARI
2 Kgs. 17: 5-8. 13-15. 18
Unya gisulong ni Salmanaser ang tibuok Israel ug gilikosan niya ang Samaria sulod sa tulo ka tuig. Sa ikasiyam ka tuig sa paghari ni Hosea, nailog sa hari sa Asiria ang Samaria ug gibihag niya ang mga Israelita ngadto sa Asiria, ug didto niya ang uban papuy-a sa Hala, ang uban duol sa Suba sa Habor sa kayutaan sa Gosan ug sa mga siyudad sa Media. Nahitabo kini tungod sa pagpakasala sa katawhan sa Israel batok sa Ginoo nga ilang Dios, ang nagluwas kanila gikan sa kaulipnan sa hari sa Ehipto ug tungod sa pag-alagad nila sa mga dios. Gisunod nila ang mga buhat sa ubang mga nasod nga giabog sa Ginoo, ug ang mga buhat sa mga hari sa Israel. Gipasidan-an sa Ginoo ang Israel ug ang Juda pinaagi sa mga propeta nga nag-ingon kanila, "Ayaw na kamo pagbuhat og dautan ug tumana ninyo ang akong mga sugo ug mga gimbut-an sumala sa balaod nga gipatuman ko sa inyong katigulangan pinaagi sa akong mga alagad, ang mga propeta." Apan wala gayod sila magpatalinghug tungod sa kagahi nilag ulo, sama sa ilang katigulangan nga wala motuo sa Ginoo nga ilang Dios. Gisalikway nila ang iyang mga lagda ug ang iyang kasabutan nga iyang gihimo uban sa ilang katigulangan ug ang iyang mga pasidaan kanila. Nagsimba sila sa mga diosdios ug nangahimo silang bakakon. Nanig-ingon sila sa mga nasod nga kasikbit nila bisan sa pasidaan sa Ginoo nga dili sila manig-ingon kanila. Busa naligutgot ang Ginoo sa Israel ug gisalikway sila niya gawas lamang sa banay ni Juda.
ANG PULONG SA GINOO.
SALMO RESPONSORYO
Ps. 60: 3. 4-5. 12-13
T. O Ginoo, tabangi kami sa imong tuong kamut, ug tubaga kami.
O Dios, gisalikway mo kami ug gigun-ob mo ang among panalipod; napungot ikaw; bangona kami!
T. O Ginoo, tabangi kami sa imong tuong kamut, ug tubaga kami.
Imong gitay-og ang yuta ug naabli kini; ayoha ang mga liki niini, kay hapit na kini matumba. Gihimo mo nga ang imong katawhan mobatig mga kalisod; gihatagan mo kami og makahubog nga bino.
T. O Ginoo, tabangi kami sa imong tuong kamut, ug tubaga kami.
O Dios wala ba kami nimo isalikway aron dili ka na mouban, O Dios, sa among kasundalohan? Tabangi kami batok sa kaaway, kay walay kapuslanan ang hinabang sa mga tawo.
T. O Ginoo, tabangi kami sa imong tuong kamut, ug tubaga kami.
BERSO SA DILI PA ANG EBANGHELYO
Aleluya! Dalaygon ikaw, O Amahan, Ginoo sa langit ug sa yuta, kay gipadayag nimo sa mga gagmay ang mga misteryo sa gingharian. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 7: 1-5
Si Jesus miingon sa iyang mga tinun-an, "Ayaw kamo paghukom sa uban, aron dili kamo hukman sa Dios. Kay hukman kamo sa Dios ingon sa paghukom ninyo sa uban, ug sukdon kamo niya sa samang sukdanan nga inyong gigamit sa uban. Nganong nagtan-aw ka man sa puling sa imong isigkatawo, apan wala mo tagda ang troso diha sa imong mata? Unsaon mo man pag-ingon sa imong isigkatawo, 'Abi, kuhaon ko kanang imong puling,' nga naa may troso sa imong mata? Maot! Kuhaa una ang troso nga anaa sa imong mata aron makakita ka pag-ayo ug makuha mo ang puling sa imong isigkatawo."
ANG EBANGHELYO SA GINOO.
ANTIPONA SA PANGALAWAT
Ang mga mata sa tanan, nagtan-aw kanimo, ug gihatagan mo sila og kalan-on sa hustong panahon.