ANTIPONA SA PAGSUGOD
Ang Dios mao ang kusog sa iyang katawhan. Diha kaniya, kita nga iyang mga pinili, nagpuyo nga walay kahadlokan. Luwasa kami, O Ginoo, nga nagaambit sa imong kinabuhi ug hatagi kami sa imong panalangin; pagpakahimo nga among magbalantay hangtod sa kahangturan.
PAGBASA GIKAN SA BASAHON NI PROPETA JEREMIAS
Jer. 20: 10-13
Nabati ko ang hagawhaw sa katawhan. Gianggaan ako nilag, "Ang Gikalisangan sa Tanang Dapit!" Miingon sila, "Ato siyang pakaulawan!" Bisan ang suod kong mga higala nagtinguha nga mapukan ako. Matod nila, "Basin pag malingla ta siya aron ato siyang madakop ug makapanimalos kita kaniya." Apan ikaw, Ginoo, dapig kanako ug gamhanan kaayo; mangapukan ug mangapakyas gayod sila nga naglutos kanako, ug dili gayod modaog, maulawan sila pag-ayo kay dili man sila molampos. Ug ang ilang kaulawan walay katapusan ug dili gayod hikalimtan. Apan ikaw, Labing Gamhanang Ginoo, matarong ang pagsulay mo sa mga tawo, kay nasayod ka man sa ilang kasingkasing ug hunahuna. Busa pakit-a ako sa imong pagpanimalos sa akong mga kaaway, kay gitugyan ko ang akong mga mulo sa imong mga kamut. Pag-awit ug dayga ang Ginoo! giluwas niya ang mga dinaugdaog gikan sa mga tawong dautan.
ANG PULONG SA GINOO.
SALMO RESPONSORYO
Ps. 69: 8-10. 14. 17. 33-35
T. Ginoo, sa imong dakong gugma, tubaga ako.
Tungod kanimo giantus ko ang insulto, ug nalumos ang akong nawong sa kaulaw. Nahimo akong sinalikway sa akong mga igsuon, usa ka langyaw alang sa mga anak sa akong inahan, Kay ang gugma ko sa imong templo nagadilaab daw kalayo, ug ang mga insulto kanila nga nangulipas kanimo natingob diri kanako.
T. Ginoo, sa imong dakong gugma, tubaga ako.
Nangamuyo ako kanimo, O Ginoo, nga imo ako nga kaloy-an, O Dios! Sa imong dakong gugma tubaga ako uban sa imong makanunayong panabang. Tubaga ako, O Ginoo, kay dako man ang imong kaayo; diha sa imong dakong kaluoy lingia ako.
T. Ginoo, sa imong dakong gugma, tubaga ako.
"Tan-awa, kamong mga mapaubsanon, ug pagsadya; kamo nga nangita sa Ginoo malipay unta ang inyong mga kasingkasing. Kay ang Ginoo magpatalinghug sa mga kabus, ug ang mga iyaha nga gibilanggo dili niya tamayon. Magdayeg unta kaniya ang mga langit ug ang yuta, ang kadagatan ug ang nagalihok diha kanila."
T. Ginoo, sa imong dakong gugma, tubaga ako.
PAGBASA GIKAN SA SULAT NI SAN PABLO NGADTO SA TAGA-ROMA
Rom. 5: 12-15
Nakasulod sa kalibutan ang sala pinaagi sa usa ka tawo, ug ang sala nagdalag kamatayon. Busa mikaylap ang kamatayon ngadto sa tanang katawhan kay nakasala man ang tanang tawo. Dinhi na sa kalibutan ang sala sa wala pa gani ihatag ang Balaod; apan sanglit wala may balaod, wala isipa ang mga sala. Apan sukad sa panahon ni Adan hangtod sa panahon ni Moises ang tanang tawo gigamhan sa kamatayon, lakip kadtong wala makasala sama sa pagpakasala ni Adan sa iyang paglapas sa sugo sa Dios. Naghulagway si Adan sa usa ka tawong umaabot. Apan dili managsama silang duha; kay dili sama sa sala ni Adan ang gasa sa Dios. Kay kon daghan ang nangamatay tungod sa pagpakasala sa usa ka tawo, labi pang dako ang grasya ug ang gasa sa Dios nga mabatonan sa daghang tawo pinaagi sa usa ka tawo nga mao si Jesucristo.
ANG PULONG SA GINOO.
BERSO SA DILI PA ANG EBANGHELYO
Aleluya! Sulti, Ginoo, kay namati ang imong sulugoon; anaa kanimo ang mga pulong sa kinabuhing walay katapusan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 10: 26-33
Si Jesus miingon sa iyang mga tinun-an, "Busa ayaw kamo kahadlok sa mga tawo. Walay tinagoan nga dili mahibaw-an ug walay sekreto nga dili mabutyag. Ang gisulti ko kaninyo diha sa ngitngit kinahanglan isulti ninyo diha sa hayag, ug kadtong kamo ray nakabati kinahanglan isinggit ninyo didto sa mga atop. Ayaw kamo kahadlok niadtong mopatay sa lawas apan dili makapatay sa kalag; hinonona, kahadloki ninyo ang Dios nga makalaglag sa lawas ug sa kalag didto sa impiyerno. Sa usa ka dako, makapalit kamog duha ka langgam nga sayaw, apan bisan pa niana walay usa kanila nga mahulog sa yuta kon walay pagtugot sa inyong Amahan. Ug bahin kaninyo, bisan gani ang tanang buhok sa inyong ulo giihap. Busa ayaw kamo kahadlok kay labaw pa kamo kaayog bili kay sa mga sayaw!" "Ang moangkon atubangan sa mga tawo nga siya akoa, angkonon ko usab atubangan sa akong Amahan didto sa langit. Apan ang dili moangkon nga siya akoa, dili ko usab angkonon atubangan sa akong Amahan didto sa langit."
ANG EBANGHELYO SA GINOO.
ANTIPONA SA PANGALAWAT
Ang mga mata sa tanan, nagtan-aw kanimo, ug gihatagan mo sila og kalan-on sa hustong panahon.