ANTIPONA SA PAGSUGOD
Ang inosente og mga kamut ug limpyog kasingkasing makatungas sa bukid sa Ginoo, ug magbarog sa iyang santos nga dapit.
PAGBASA GIKAN SA IKADUHANG BASAHON SA MGA HARI
2 Kgs. 11: 1-4. 9-18. 20
Sa pagkakita ni Atalia, inahan ni Ahasias, nga patay na si Ahasias nga iyang anak, gipamatay niya ang tanang sakop sa harianong banay. Apan si Joas, usa sa mga anak ni Ahasias, giluwas ni Joseba nga iyaan sa bata ug gitagoan niya ang bata ug ang iyang yaya sa usa ka sekretong lawak sa Templo busa wala maapil pagpatay ang bata. Sulod sa unom ka tuig gitagoan ang bata uban sa iyang yaya didto sa Templo sa Ginoo, samtang maoy nagmando sa nasod si Atalia ingon nga rayna. Sa ikapitong tuig gipatawag ug gipaadto ni Joyada sa Templo sa Ginoo ang mga opisyal sa mga guwardiya sa hari, ug gipauyon niya sila sa laraw nga iyang buhaton. Gipakita niya sila sa anak sa hari nga si Joas. Gibuhat sa mga opisyal ang gisugo ni Joyada, ang pari, ug nagdala ang tagsatagsa kanila sa ilang mga tawo nga walay buhat sa Adlawng Igpapahulay, ug miadto sila kang Joyada. Gihatag ni Joyada ngadto sa mga opisyal ang mga bangkaw ug mga taming ni Hari David nga didto tipigi sa Templo sa Ginoo. Unya gipahiluna niya ang mga guwardiya libot sa sidlakang bahin sa Templo. Unya gidala niya sa gawas ang anak sa hari, ug gikoronahan niya, ug gihatagag kopya sa mga balaod bahin sa paghari. Unya iyang gidihogan ug gipaila nga hari na. Tapos niini namakpak sila ug miingon, "Mabuhi ang hari!" Sa pagkabati ni Atalia sa kabanha sa mga guwardiya ug sa mga tawo, misulod siya sa Templo. Nakita niya ang hari nga nagbarog duol sa haligi, sumala sa naandan ug diha tupad kaniya ang mga opisyal sa mga guwardiya ug ang mga trumpetero, ug nakita usab niya ang katawhan nga nanagmaya ug nagpatingog sa mga trumpeta. Gigisi niya ang iyang bisti ug misinggit sa pag-ingon, "Mabudhion! Mabudhion!" Gimandoan ni Joyada ang mga opisyal sa kasundalohan, "Dad-a niyo siya sa gawas, ug patya si bisan kinsa nga moluwas kaniya." Kay dili man gusto si Joyada nga patyon siya sulod sa Templo. Busa gidakop nila siya, ug gidala agi sa pultahan nga ginganlag Pultahan sa mga Kabayo ug gidala sa palasyo sa hari, ug didto gipatay siya. Unya gihimo ni Joyada ang usa ka kasabutan tali sa Ginoo ug sa hari ug sa katawhan, nga sila mao na ang katawhan sa Ginoo. May kasabutan usab nga gihimo tali sa hari ug sa mga tawo. Unya ang tanang mga tawo miadto sa templo ni Baal ug ilang giguba kini; gidugmok nila ang iyang halaran ug mga larawan, ug gipatay nila si Matan, ang pari ni Baal, atubangan sa mga halaran ug ang mga pari nagbutang ug guwardiya sa Templo sa Ginoo. Busa naglipay ang katawhan ug nagmalinawon ang siyudad tapos nila patya si Atalia didto sa palasyo sa hari.
ANG PULONG SA GINOO.
SALMO RESPONSORYO
Ps. 132: 11. 12. 13-14. 17-18
T. Ang Ginoo mipili sa Sion nga iyang puloy-anan.
Ang Ginoo nanumpa kang David, usa ka malig-ong saad nga dili niya bakwion: "Palingkoron ko sa imong trono ang imong kaugalingong anak."
T. Ang Ginoo mipili sa Sion nga iyang puloy-anan.
"Kon ang imong mga anak mag-amping sa akong kasabutan ug sa mga kasugoan nga akong itudlo kanila. Ang ila usab nga mga anak hangtod sa kahangturan molingkod sa imong trono."
T. Ang Ginoo mipili sa Sion nga iyang puloy-anan.
Kay ang Ginoo nagpili sa Sion; gipalabi siya alang sa iyang puloy-anan. "Kay ang Sion maoy akong pahulayanan sa kahangturan; diha kaniya magpuyo ako, kay gipalabi ko siya."
T. Ang Ginoo mipili sa Sion nga iyang puloy-anan.
"Diha kaniya patuboon ko ang gahom alang kang David; magbutang akog suga alang sa akong dinihog. Ang iyang mga kaaway sul-oban ko sa kaulaw, apan diha kaniya mosidlak ang akong korona."
T. Ang Ginoo mipili sa Sion nga iyang puloy-anan.
BERSO SA DILI PA ANG EBANGHELYO
Aleluya! Tudlo-i ako sa dalan sa imong mga balaod, ug palandungon ko ang tanan mong mga katingalahan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 6: 19-23
Si Jesus miingon sa iyang mga tinun-an, "Ayaw kamo pagtigom og mga bahandi dinhi sa yuta kay kutkuton lamang kini sa taya ug sa anay ug makawat usab sa mga kawatan. Pagtigom hinoon kamo og mga bahandi didto sa langit diin walay taya ug anay nga makakutkot niini, ug walay mga kawatan nga makakawat niini; kay hain gani ang inyong bahandi, atua usab didto ang inyong mga kasingkasing." "Ang mata maoy suga sa lawas: kon maayo ang imong mata, maputos sa kahayag ang tibuok mong lawas; apan kon daotan ang imong mata, maputos sa kangitngit ang imong lawas. Busa kon ang imong suga kangitngit diay, pagkangitngit gayod niini!"
ANG EBANGHELYO SA GINOO.
ANTIPONA SA PANGALAWAT
Usa ang akong gipangandoy: ang pagpuyo diha sa balay sa Ginoo sa tanang mga adlaw sa akong kinabuhi.