ANTIPONA SA PAGSUGOD
O Ginoo, patalinghugi ang akong tingog sa akong pagsangpit kanimo. Ikaw ang akong hinabang, ayaw ako isalikway. Ayaw ako biyai, Dios ko nga Manunubos.
PAGBASA GIKAN SA IKADUHANG BASAHON SA MGA HARI
2 Kgs. 2: 1. 6-14
Sa dihang hapit na bayawon sa Ginoo si Elias ngadto sa langit pinaagi sa usa ka alimpulos, nagpanaw si Elias ug si Eliseo gikan sa Gilgal. Unya si Elias miingon, "Hangyoon ko ikaw sa paghulat dinhi kay paadtuon ako sa Ginoo sa Suba sa Jordan." Apan si Eliseo miingon, "Samtang buhi ang Ginoo ug ikaw buhi usab, dili gayod ako mobulag kanimo." Busa nangadto silang duha. Kalim-an ka tawo sa pundok sa mga propeta nangadto usab ug mibarog sila halayo kang Elias ug kang Eliseo samtang silang duha nagtindog daplin sa Jordan. Unya gikuha ni Elias ang iyang kupo ug gipilo ug gihampak niya niini ang tubig, ug nabahin ang tubig ug milatas silang duha. Sa dihang nakalabang na sila, si Elias miingon kang Eliseo, "Unsa may buot mo nga akong buhaton kanimo sa dili pa ako kuhaon sa Ginoo?" Ug si Eliseo miingon, "Buot ko nga maako ang duha ka pilo sa imong gahom." Ug si Elias miingon, "Lisod kanang imong gipangayo, apan kon makakita ka kanako samtang kuhaon ako gikan kanimo, matuman kini. Kondili ka makakita kanako, dili kini matuman." Ug samtang nagpadayon sila paglakat ug pagsultihanay, sa kalit may karwahe nga kalayo nga giguyod ug mga kabayo nga kalayo usab mipataliwala kanila. Ug si Elias gibayaw ngadto sa langit pinaagi sa usa ka alimpulos. Nakakita niini si Eliseo ug misinggit siya, "Amahan ko! Amahan ko! Ania ang mga karwahe ug mga kabalyero sa Israel." Ug wala na niya makita si Elias. Unya gikuha niya ang iyang bisti ug gigisi niya kini sa duha ka bahin aron pagpakita sa kasubo. Gikuha usab niya ang kupo ni Elias nga nahulog ug mibalik siya pagbarog daplin sa Jordan. Unya gihampak niya ang tubig sa kupo ni Elias ug miingon siya, "Hain man ang Ginoo, ang Dios ni Elias?" Dihadiha nabahin ang tubig ug milabang niini si Eliseo.
ANG PULONG SA GINOO.
SALMO RESPONSORYO
Ps. 31: 20. 21. 24
T. Maglipay unta ang inyong mga kasingkasing, kamong tanan nga naglaum sa Ginoo.
Pagkadako sa kaayo, O Ginoo, nga imong gitagana alang kanila nga nahadlok kanimo, ug nga kanila nga nagadan-gop kanimo, imong gipakita sa atubangan sa mga tawo.
T. Maglipay unta ang inyong mga kasingkasing, kamong tanan nga naglaum sa Ginoo.
Gitagoan mo sila diha sa landong sa imong atubangan gikan sa dautang laraw sa mga matarong; gipanalipdan mo sila sulod sa imong puloy-anan gikan sa pangaway sa mga dila.
T. Maglipay unta ang inyong mga kasingkasing, kamong tanan nga naglaum sa Ginoo.
Higugmaa ang Ginoo, kamong maunongon kaniya. Ang Ginoo nagaamping sa tanan nga makanunayon, apan nagabalos kanila nga nagmahitas-on.
T. Maglipay unta ang inyong mga kasingkasing, kamong tanan nga naglaum sa Ginoo.
BERSO SA DILI PA ANG EBANGHELYO
Aleluya! Nagalaum ako sa Ginoo, nagasalig ako sa iyang Pulong. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 6: 1-6. 16-18
Si Jesus miingon sa iyang mga tinun-an, "Ayaw gayod ninyo buhata ang inyong mga tulomanon sa relihiyon aron lamang makita sa mga tawo. Kon ingnon ninyo niini pagbuhat, dili kamo makadawat og ganti gikan sa inyong Amahan nga atua sa langit." "Busa kon mohatag kamo sa tawong kabus, ayaw kini ipasigarbo ingon sa gibuhat sa mga hambugiro sulod sa mga sinagoga ug sa kadalanan. Nagbuhat sila niini aron daygon sa mga tawo. Apan sultihan ko kamo nga ang naghimo sa ingon gigantihan na. Kon ugaling motabang ka sa usa ka tawong kabus, himoa kini sa paagi nga bisan ang imong labing suod nga higala dili masayod niini. Himoa kini sa tago ug ang imong Amahan nga nagtan-aw sa imong gibuhat sa tago moganti kanimo.' "Ug kon mag-ampo ka, ayaw panig-ingon sa mga tigpakaaron-ingnon. Gusto silang magtindog nga mag-ampo sulod sa mga sinagoga ug diha sa mga eskina sa kadalanan aron makita sila sa mga tawo. Sultihan ko kamo nga gigantihan na sila. Apan kon mag-ampo ka, sulod ngadto sa imong lawak, unya takpi ang pultahan, ug pag-ampo sa imong Amahan nga dili makita. Ug gantihan ka sa imong Amahan nga nagtan-aw sa imong gibuhat sa tago." "Ug sa inyong pagpuasa, ayaw ipakita nga nagsubo kamo, sama sa gibuhat sa mga tigpakaaron-ingnon. Nagsuroysuroy sila nga gutom og panagway aron makita gayod nga nagpuasa sila. Sultihan ko kamo nga gigantihan na sila. Kon magpuasa ka, panghilam-os ug panudlay aron walay mahibalo nga nagpuasa ka, gawas sa imong Amahan nga dili makita. Ug gantihan ka sa imong Amahan nga nagtan-aw sa imong gibuhat sa tago."
ANG EBANGHELYO SA GINOO.
ANTIPONA SA PANGALAWAT
Usa ang akong gipangandoy: ang pagpuyo diha sa balay sa Ginoo sa tanang mga adlaw sa akong kinabuhi.