ANTIPONA SA PAGSUGOD
O Ginoo, patalinghugi ang akong tingog sa akong pagsangpit kanimo. Ikaw ang akong hinabang, ayaw ako isalikway. Ayaw ako biyai, Dios ko nga Manunubos.
PAGBASA GIKAN SA UNANG BASAHON SA MGA HARI
1 Kgs. 21: 17-29
Unya miingon ang Ginoo kang Elias nga taga-Tisbe, "Lakaw, adtoa si Acab, ang hari sa Israel, nga anaa sa Samaria; anaa siya sa parasan ni Nabot aron iyang panag-iyahon kini. Ingna siya nga nag-ingon ang Ginoo, 'Human mo patya ang tag-iya giilog mo pa gayod ang iyang yuta.' Ug sultihi usab siya nga nag-ingon ang Ginoo, 'Sa dapit diin gitilaan sa mga iro ang dugo ni Nabot, tilaan usab sa mga iro ang imong dugo." Sa pagkakita ni Acab kang Elias miingon siya, "Nasakpan mo na gayod ako, o kaaway ko!" Mitubag si Elias, "Nasakpan ko ikaw kay gibuhat mo man ang dautan atubangan sa Ginoo. Miingon ang Ginoo, 'Ipahamtang ko kanimo ang katalagman; patyon ko ikaw lakip ang tanan mong kaliwat nga lalaki diha sa Israel, mga ulipon ug dili ulipon. Silotan ko ang imong panimalay sama sa pagsilot ko sa panimalay ni Jeroboam nga anak ni Nebat, ug sa panimalay ni Hari Baasa nga anak ni Ahias, kay gihagit mo man ang akong kasuko ug gidaldal mo ang Israel sa pagpakasala." Ug bahin kang Jezabel ang Ginoo miingon, 'Kan-on sa mga iro si Jezabel dinhi sa Jezrael!' Ug bisan kinsa nga paryenti ni Jezabel nga namatay diha sa siyudad kan-on sa mga iro; ug ang mamatay diha sa kapatagan, kan-on sa mga langgam." (Wala pay tawo nga sama kadaotan ni Acab atubangan sa Ginoo, tungod kay gisibahan man siya sa iyang asawa nga si Jezabel. Gihimo niya ang salawayong buhat sa iyang pagsimba ug pag-alagad sa mga dios, ingon sa gihimo sa mga Amorihanon nga gihinginlan sa Ginoo sa pag-abot sa mga Israelita.) Sa pagkabati ni Acab sa gisulti ni Elias, gigisi niya ang iyang bisti; ug nagsul-ob siyag bisting sako, ug nagpuasa ug nagmasulob-on pag-ayo. Ug giingnan sa Ginoo si propeta Elias, "Nakita mo ba si Acab nga nagpaubos pag-ayo sa akong atubangan? Ug tungod kay nagpaubos man siya, dili ko ipahamtang ang katalagman sa iyang banay samtang buhi pa siya; apan ipahamtang ko kini sa iyang panimalay kon ang iyang anak mao nay maghari.
ANG PULONG SA GINOO.
SALMO RESPONSORYO
Ps. 51: 3-4. 5-6. 11. 16
T. Kaloy-i kami, Ginoo, kay nakasala kami.
Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan. Hugasi akog maayo sa akong kasaypanan ug linisi ako sa akong kasal-anan.
T. Kaloy-i kami, Ginoo, kay nakasala kami.
Kay giila ko ang akong kalapasan, ug ang akong sala kanunayng ania sa akong atubangan: "Kanimo lamang nakasala ako, ug nakabuhat og dautan sa imong atubangan."
T. Kaloy-i kami, Ginoo, kay nakasala kami.
Ilingiw ang imong nawong sa akong kasal-anan, ug wagtanga ang tanan kong kalapasan. Luwasa ako sa kasal-anan sa dugo, O Dios, akong manluluwas nga Dios; unya ang akong dila magsaysay sa imong katarong.
T. Kaloy-i kami, Ginoo, kay nakasala kami.
BERSO SA DILI PA ANG EBANGHELYO
Aleluya! Ipadan-ag ang imong nawong ngari sa imong sulugoon, ug tudlo-i ako sa imong mga balaod. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 5: 43-48
Si Jesus miingon sa iyang mga tinun-an, "Nakadungog kamo nga giingon kaniadto, 'Higugmaa ang imong mga higala, ug dumti ang imong mga kaaway.' Apan karon sultihan ko kamo: higugmaa ang inyong mga kaaway, ug pag-ampo kamo alang sa mga tawo nga nagpasipala kaninyo, aron mahimo kamong mga anak sa inyong Amahan nga atua sa langit. Kay siya, sa walay pagpili, nagpadan-ag sa iyang adlaw ug naghatag og ulan ngadto sa mga matarong ug sa mga makasasala. Nganong magpaabot man kamo nga mobalos kaninyo ang Dios, kon kamo nahigugma lamang sa mga tawo nga nahigugma kaninyo? Bisan gani ang mga kobrador sa buhis nagbuhat man niana! Kon kamo makighimamat lamang sa inyong mga higala, unsa may nahimo ninyo nga labaw sa kasagaran? Bisan gani ang mga tawo nga wala motuo sa Dios nagbuhat man niana! Kinahanglan magmahingpit kamo ingon nga hingpit ang inyong Amahan nga atua sa langit."
ANG EBANGHELYO SA GINOO.
ANTIPONA SA PANGALAWAT
Usa ang akong gipangandoy: ang pagpuyo diha sa balay sa Ginoo sa tanang mga adlaw sa akong kinabuhi.