ANTIPONA SA PAGSUGOD
Maglipay ang akong kasingkasing tungod sa imong pagtubos kanako, awitan ko ang Ginoo, tungod sa iyang mga kaayohan alang kanako.
PAGBASA GIKAN SA BASAHON NI PROPETA ISAIAS
Is. 61: 9-11
Mahimong bantogan ang ilang kaliwatan sa tibuok kalibutan, ug ang tanan nga makakita kanila moila nga sila katawhan nga gipanalanginan sa Ginoo." Magmalipayon ako pag-ayo tungod sa nahimo sa Ginoo, ang kalag ko magmaya tungod sa akong Dios; kay gibistihan niya ako sa bisti sa kaluwasan, gikupoan niya ako sa kupo sa pagkamatarong, ingon sa pamanhonon nga nagkuwentas og mga bulak, ug sama sa pangasaw-onon nga nagdayandayan sa iyang kaugalingon og mga alahas. Kay ingon nga ang yuta mopaturok ug ingon nga ang tanaman mopaturok sa gipugas diha niini, paturokon usab sa Ginoong Dios ang katarong ug pagdayeg sa atubangan sa kanasuran.
ANG PULONG SA GINOO.
SALMO RESPONSORYO
1 Sm. 2: 1. 4-5. 6-7. 8
T. Ang akong kasingkasing nalipay diha sa Ginoo nga akong Manunubos.
Ang akong kasingkasing nalipay diha sa Ginoo, ang akong gahom gibayaw diha sa akong Dios. Akong gibuntog ang akong mga kaaway; Nalipay ako sa akong kadaugan.
T. Ang akong kasingkasing nalipay diha sa Ginoo nga akong Manunubos.
Ang mga pana sa gamhanan nangabali samtang ang mahuyang nagabakos og kusog. Ang mga busog nagpasuhol og pan samtang ang mga gutom nangahapla. Ang landay nga asawa nanganak og pito ka anak, samtang ang inahan sa daghan nagamingaw.
T. Ang akong kasingkasing nalipay diha sa Ginoo nga akong Manunubos.
Ang Ginoo nagpahamtang sa kamatayon ug nagahatag sa kinabuhi; nagabanlod siya ngadto sa kahiladman, ug nagabanhaw siya pag-usab. Ang Ginoo nagahimo sa kabus ug nagahimo sa dato. Siya nagabanlod sa ubos, ug siya usab ang nagabayaw.
T. Ang akong kasingkasing nalipay diha sa Ginoo nga akong Manunubos.
Iyang gibangon ang hangol gikan sa abog, gikan sa abog iyang giisa ang kabus, aron pagpalingkod kanila uban sa mga hamili, ug paghimo og mahimayaong trono sa ilang kabilin.
T. Ang akong kasingkasing nalipay diha sa Ginoo nga akong Manunubos.
BERSO SA DILI PA ANG EBANGHELYO
Aleluya! Nahinumdom si Maria niining tanan, ug namalandong siya pag-ayo mahitungod niining mga butanga. Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 2: 41-51
Matag tuig moadto sa Jerusalem ang mga ginikanan ni Jesus aron pagsaulog sa Pangilin sa Pagsaylo. Sa napulog-duha na ka tuig si Jesus, nangadto sila sa pangilin ingon sa naandan. Sa pagkatapos sa mga adlaw sa pangilin namauli sila, apan nagpabilin sa Jerusalem ang bata nga si Jesus. Wala mahibalo niini ang iyang mga ginikanan; nagtuo sila nga nahiuban si Jesus sa panon, ug sa nakalakat na silag usa ka adlaw, gipangita nila siya didto sa ilang mga paryenti ug mga higala. Apan wala siya nila hikaplagi, busa mibalik sila sa Jerusalem sa pagpangita kaniya. Sa ikatulo ka adlaw hikaplagan nila siya didto sa Templo, naglingkod uban sa mga magtutudlo, namati kanila ug nangutana. Ang tanan nga nakadungog kaniya nahibulong sa iyang maalamong mga tubag. Nahibulong ang iyang mga ginikanan sa pagkakita nila kaniya, ug miingon ang iyang inahan kaniya, "Anak, nganong gibuhat mo man kini kanamo? Ako ug ang imong amahan nabalaka pag-ayo nga nangita kanimo." Mitubag siya, "Nganong nangita pa man kamo kanako? Wala ba kamo masayod nga kinahanglang anhi gayod ako sa balay sa akong Amahan?" Apan wala sila makasabut sa iyang gisulti kanila. Mipauli si Jesus sa Nazaret uban kanila, ug nagmasinugtanon siya kanila. Kining tanan gitipigan sa iyang inahan sulod sa iyang kasingkasing.
ANG EBANGHELYO SA GINOO.
ANTIPONA SA PANGALAWAT
Giampingan ni Maria kining tanang mga pulong, gipalandong niya sulod sa iyang kasingkasing.