ANTIPONA SA PAGSUGOD
Ang mga laraw sa iyang Kasingkasing gikan sa kaliwatan ngadto sa kaliwatan: mao ang pagluwas kanila sa kamatayon ug pagpakaon kanila sa tinggutom.
PAGBASA GIKAN SA BASAHON SA DEUTEROΝΟΜΙΟ
Dt. 7: 6-11
Kay kamo balaang katawhan ug iya kamo sa Ginoo. Sa tanang katawhan kamo ang gipili sa Ginoo nga inyong Dios aron maiyang kaugalingong katawhan. "Gipili kamo sa Ginoo ug gimahal niya dili tungod kay mas daghan kamo kay sa ubang katawhan—gani kamo may labing diyotay. Apan gipili kamo niya kay iya man kamong gimahal ug gituman niya ang iyang gisaad sa inyong katigulangan. Busa gikuha kamo niya pinaagi sa iyang gahom ug giluwas gikan sa kaulipnan, gikan sa gahom sa hari sa Ehipto. Makasalig kamo nga ang Ginoo nga inyong Dios, Dios gayod. Kasaligan siya sa pagtuman sa kasabotan ug ang iyang gugma walay paglubad niadtong dili maihap nga mga kaliwatan nga nahigugma kaniya ug nagtuman sa iyang mga sugo. Apan silotan niya sa walay langan kadtong nagsalikway kaniya. Busa tumana gayod ang tanang mga balaod nga gihatag ko kaninyo karon."
ANG PULONG SA GINOO.
SALMO RESPONSORYO
Ps. 103: 1-2. 3-4. 6-7. 8. 10
T. Ang kaluoy sa Ginoo walay katapusan alang kanila nga mahadlokon kaniya.
Dayga ang Ginoo, kalag ko; ug ang tibuok kong kaugalingon, dayga ang iyang balaang ngalan. Dayga ang Ginoo, kalag ko, ug ayaw hikalimti ang tanang mga kaayohan niya.
T. Ang kaluoy sa Ginoo walay katapusan alang kanila nga mahadlokon kaniya.
Gipasaylo niya ang tanan mong kadautan, gibulong niya ang tanan mong kasakitan. Giluwas niya ang imong kinabuhi sa kalaglagan; gilibutan ka niya sa kaayo ug kaluoy.
T. Ang kaluoy sa Ginoo walay katapusan alang kanila nga mahadlokon kaniya.
Maluluy-on ug mahigugmaon ang Ginoo, dugayng masuko ug hupong sa kaayo. Iya kitang gidumala dili sumala sa atong kasal-anan, ni mibalos siya kanato sumala sa atong mga kalapasan.
T. Ang kaluoy sa Ginoo walay katapusan alang kanila nga mahadlokon kaniya.
PAGBASA GIKAN SA UNANG SULAT NI SAN JUAN
1 Jn. 4: 7-16
Mga igsuon, maghigugmaay kita kay ang gugma naggikan sa Dios. Ang nahigugma sa iyang isigkatawo anak sa Dios ug nakaila sa Dios. Ang wala mahigugma sa iyang isigkatawo wala makaila sa Dios, kay ang Dios gugma man. Gipadayag sa Dios ang iyang gugma kanato pinaagi sa pagpadala sa iyang Bugtong Anak nganhi sa kalibutan, aron makabaton kita sa kinabuhing walay katapusan pinaagi kaniya. Ang matuod nga gugma mao kini: dili kita maoy unang nahigugma sa Dios, kondili siya maoy unang nahigugma kanato, ug gipadala niya ang iyang Anak aron pinaagi kaniya mapasaylo ang atong mga sala. Mga igsuon, kon ingon niini ang paghigugma sa Dios kanato, nan maghigugmaay kita. Wala pay tawo nga nakakita sa Dios; apan kon maghigugmaay kita, magpuyo kanato ang Dios ug mahingpit dinhi kanato ang iyang gugma. Masiguro nato nga anaa kita sa Dios ug anaa kanato ang Dios kay gihatag na man niya kanato ang iyang Espiritu. Nakita nato ug gisugilon sa uban nga gipadala sa Amahan ang iyang Anak aron pagluwas sa kalibutan. Ang magpahayag nga si Jesus mao ang Anak sa Dios, anaa sa Dios ug ang Dios anaa kaniya. Ug nasayod kita ug nagtuo nga gihigugma kita sa Dios. Ang Dios gugma ug ang nagkinabuhi subay sa gugma anaa sa Dios ug ang Dios anaa kaniya.
ANG PULONG SA GINOO.
BERSO SA DILI PA ANG EBANGHELYO
Aleluya! Isangon ninyo ang akong yugo, ug tudloan ko kamo, kay ako maaghop ug mapaubsanon sa Kasingkasing. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 11: 25-30
Si Jesus mihayat sa langit ug nag-ampo, "O Amahan, Ginoo sa langit ug sa yuta! Nagpasalamat ako kanimo kay gipadayag mo man ngadto sa mga walay kahibalo ang imong gililong sa maalamon ug sa mga makinaadmanon. Oo, Amahan, natuman kini kay mao may imong gusto ug pagbuot. "Ang akong Amahan naghatag kanako sa tanang butang. Walay nakaila sa Anak gawas sa Amahan, ug walay nakaila sa Amahan gawas sa anak ug kadtong mga tawo nga buot sa Anak nga makaila sa Amahan." "Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo. Isangon ang akong yugo ug sunda ninyo ako, kay malumo ako ug mapaubsanon sa espiritu, ug makapahulay kamo. Sayon ang yugo nga akong ihatag kaninyo, ug gaan ang ipapas-an ko kaninyo."
ANG EBANGHELYO SA GINOO.
ANTIPONA SA PANGALAWAT
Nag-ingon ang Ginoo: ang giuhaw kinahanglan moari kanako ug moinom. Gikan sa kasingkasing niya nga motuo kanako magdagayday ang mga sapa sa tubig nga naghatag og kinabuhi.