ANTIPONA SA PAGSUGOD
Ang Espiritu sa Ginoo ania kanako: tungod niana gidihogan ako, gipadala ako aron pagsangyaw sa Maayong Balita ngadto sa mga kabus ug aron pag-ayo sa mga mahinulsulon og kasingkasing.
PAGBASA GIKAN SA UNANG BASAHON SA MGA HARI
1 Kgs. 18: 41-46
Ug si Elias miingon kang Acab, "Tungas karon ug kaon ug inom kay may dinaguok sa ulan." Busa mitungas si Acab aron sa pagkaon. Ug mitungas si Elias ngadto sa tumoy sa Bukid sa Carmel, ug miyukbo siya sa yuta ug gibutang niya ang iyang nawong tungatunga sa iyang mga tuhod. Ug miingon siya sa iyang sulugoon, "Lakaw karon, tan-awa ngadto sa dagat," Milakaw siya ug mitan-aw ngadto sa dagat. Milakaw siya ug mitan-aw ug miingon, "Wala akoy nakita." Ug siya miingon, "Balik ngadto sa pito ka higayon." Ug sa ikapito ka higayon miingon siya, "May gamay nga dag-om nga ingon kadako sa kamut sa tawo nga misaka gikan sa dagat." Ug si Elias miingon, "Lakaw ug adtoa si Acab ug ipaandam ang iyang karwahe ug palugsonga siya kay tingalig hiabotan siya sa ulan." Ug wala madugay naitom ang kalangitan sa mga dag-om ug hangin, ug may kusog nga ulan. Ug misakay si Acab paingon sa Jezrael. Ug ang Ginoo nag-uban kang Elias, ug gibaksan niya ang iyang hawak ug midagan pag-una kang Acab ngadto sa ganghaan sa Jezrael.
ANG PULONG SA GINOO.
SALMO RESPONSORYO
Ps. 65: 10. 11. 12-13
T. Matarong ang pagdayeg kanimo diha sa Sion, O Dios.
Giduaw nimo ang yuta ug imo kining gibubuan; imo kining giabunohan pag-ayo. Napuno ang mga katubigan sa Dios; ug imong giandam ang binhi.
T. Matarong ang pagdayeg kanimo diha sa Sion, O Dios.
Ingon niini ang imong pag-andam sa yuta; gibubuan mo ang iyang mga tudling, gidugmok mo ang iyang mga bugon. Gihumok mo kini sa makusog nga ulan, gipanalanginan mo ang iyang abot.
T. Matarong ang pagdayeg kanimo diha sa Sion, O Dios.
Gipurongpurongan mo ang tuig sa imong manggihatagong kaayo, ug ang imong mga dalan nga nagasugwak sa abunda nga ani. Ang wala matikad nga kaumahan nagasugwak niini, ug ang kalipay nagtugob sa kabungtoran.
T. Matarong ang pagdayeg kanimo diha sa Sion, O Dios.
BERSO SA DILI PA ANG EBANGHELYO
Aleluya! Tudlo-i ako sa kahulugan sa imong balaod, O Ginoo ug ampingan ko kini sa tibuok kong kasingkasing. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 5: 20-26
Si Jesus miingon sa iyang mga tinun-an, "Busa mag-ingon ako kaninyo nga dili kamo makasulod sa Gingharian sa langit kon ang inyong pagtuman sa kabubut-on sa Dios sama lamang sa gihimo sa mga magtutudlo sa Balaod ug sa mga Pariseo." "Nasayod kamo nga ang mga tawo giingnan kaniadto, 'Ayaw pagpatay; ang makapatay taralon sa hukmanan.' Apan sultihan ko kamo nga ang masuko sa iyang isigkatawo dad-on ngadto sa maghuhukom, ug ang maghingalag kuwanggol sa iyang isigkatawo taralon ngadto sa Labawng Hukmanan, ug bisan kinsa nga moingon nga buang ang iyang isigkatawo malagmit nga mahiagom sa kalayo sa impiyerno. Busa inigdala na nimo sa imong halad sa Dios ngadto sa halaran ug didto mahinumdoman mo nga nasilo ang imong isigkatawo, biyai ang imong halad atubangan sa halaran, ug adtoa dayon ang imong isigkatawo, ug pakig-uli una kaniya. Unya balik sa halaran ug ihalad ang imong halad sa Dios." "Kon may mokiha kanimo ug dad-on ka niya sa hukmanan, pakighusay kaniya samtang may panahon pa ug wala pa kamo moabot didto; kay kon kamo moabot na sa hukmanan itugyan ka niya sa huwes, ug ang huwes motugyan kanimo sa polis, ug ibalhog ka sa bilanggoan. Ug timan-i: bilangguon ka didto hangtod kabayran mo sa hingpit ang imong multa."
ANG EBANGHELYO SA GINOO.
ANTIPONA SA PANGALAWAT
Dili na ako magtawag kaninyog mga sulugoon, tungod kay ang sulugoon wala masayod unsa ang gibuhat sa iyang agalon. Apan ako nagtawag kaninyong mga higala, tungod kay ang tanang nadungog ko gikan sa akong Amahan, akong gipaila kaninyo.