ANTIPONA SA PAGSUGOD
Ang Ginoo mao ang akong kahayag ug akong kaluwasan, kinsay akong kahadlokan? Ang Ginoo maoy tigpanalipod sa akong kinabuhi, kinsa pa may akong kurugan?
PAGBASA GIKAN SA UNANG BASAHON SA MGA HARI
1 Kgs. 17: 1-6
Si propeta Elias nga taga-Tisbe sa Galaad miingon kang Acab, "Samtang buhi ang Ginoo, ang Dios sa Israel nga akong gialagaran walay yamog ni ulan nga moabot sulod sa pipila ka tuig gawas kon akong paulanon." Ug giingnan sa Ginoo si Elias, "Pahawa dinhi ug lakaw ngadto sa silangan ug tago didto sa Sapa sa Kerit, sa silangan sa Jordan. Adto ka didto mag-imnanan sa sapa ug sugoon ko ang mga uwak sa pagdala kanimog pagkaon." Busa miadto siya ug gituman niya ang gisulti sa Ginoo. Mipuyo siya daplin sa Sapa sa Kerit. Ug ang mga uwak nagdala kaniyag pan ug sud-an buntag ug hapon; ug didto siya mag-imnanan sa sapa.
ANG PULONG SA GINOO.
SALMO RESPONSORYO
Ps. 121: 1-2. 3-4. 5-6. 7-8
T. Ang atong hinabang gikan sa Ginoo, nga nagabuhat sa langit ug sa yuta.
Giyahat ko ang akong mga mata ngadto sa kabukiran; diin maggikan ang hinabang alang kanako. Ang akong hinabang gikan sa Ginoo, nga nagbuhat sa langit ug sa yuta.
T. Ang atong hinabang gikan sa Ginoo, nga nagabuhat sa langit ug sa yuta.
Dili unta siya motugot nga ikaw mahadakin-as; Dili unta siya matagpilaw nga nagabantay kanimo. Sa tinuoray wala siya matagpilaw ni matulog, ang magbalantay sa Israel.
T. Ang atong hinabang gikan sa Ginoo, nga nagabuhat sa langit ug sa yuta.
Ang Ginoo mao ang imong magbalantay; ang Ginoo mao ang imong panalipod. Tupad siya kanimo sa imong kamot nga tuo. Ang adlaw dili magdagmal kanimo sa adlaw ni ang bulan sa gabii.
T. Ang atong hinabang gikan sa Ginoo, nga nagabuhat sa langit ug sa yuta.
Ang Ginoo magbantay kanimo sa tanang dautan, magbantay siya sa imong kinabuhi. Ang Ginoo magbantay sa imong pag-abot ug sa imong paggikan. Karon ug hangtod sa kahangturan.
T. Ang atong hinabang gikan sa Ginoo, nga nagabuhat sa langit ug sa yuta.
BERSO SA DILI PA ANG EBANGHELYO
Aleluya! Ang imong pulong suga alang sa akong mga tiil, ug kahayag sa akong dalan. Aleluya!
PAGBASA SA SANTOS NGA EBANGHELYO SUMALA NI SAN MATEO
Mt. 5: 1-12
Sa pagkakita ni Jesus sa katawhan, mitungas siya sa bungtod ug milingkod didto. Unya mialirong kaniya ang iyang mga tinun-an, ug gitudloan niya sila chum grom gue niining mosunod: "Bulahan ang miila nga sila kabus sa mga butang espirituhanon, kay ila ang Gingharian sa langit!" "Bulahan ang nagsubo kay lipayon sila sa Dios!" "Bulahan ang mapaubsanon kay makadawat sila sa gisaad niya!" "Bulahan ang nagtinguha sa pag-tuman sa kabubut-on sa Dios, kay tagbawon niya sila!" "Bulahan ang maluluy-on, kay kaloy-an sila sa Dios!" "Bulahan ang putli og kasingkasing, kay makakita sila sa Dios!" "Bulahan ang naningkamot nga managdait ang katawhan, kay isipon sila sa Dios nga iyang mga anak!" "Bulahan ang gilutos tungod sa ilang pagsunod sa kabubut-on sa Dios, kay ila ang Gingharian sa langit!" "Bulahan kamo kon bugalbugalan ug daugdaogon sa mga tawo, ug butang-butangan sa tanang matang sa kadaotan tungod kanako. Paglipay ug pagmaya kamo, kay dako ang ganti nga gitagana kaninyo didto sa langit. Giingon usab nila niini pagpasipala ang mga propeta nga nahiuna kaninyo."
ANG EBANGHELYO SA GINOO.
ANTIPONA SA PANGALAWAT
Makasalig ako sa Ginoo; siya ang naghatag kanako sa akong kagawasan, O Dios ko, anaa ka kanunay aron pagtabang kanako.