ANTIPONA SA PAGSUGOD
Gipakaon sila sa labing maayong trigo, ug gibusog sila og dugos gikan sa bato.
PAGBASA GIKAN SA BASAHON SA DEUTERONOMIO
Dt. 8: 2-3. 14-16
Si Moises miingon sa katawhan, "Hinumdomi nga gigiyahan kamo sa Ginoo nga inyong Dios sa tibuok ninyong panaw sulod sa kap-atan ka tuig didto sa kamingawan. Gilisodlisod kamo niya aron pagsulay kon tumanon ba gayod ninyo ang iyang mga sugo. Gilisodlisod kamo niya ug gipasagdan nga kabsan og pagkaon, unya gihatagan kamo niyag mana—pagkaon nga wala pa gayod ninyo matilawi ug sa inyong katigulangan sukad masukad. Gibuhat niya kini aron kamo makaila nga ang tawo dili mabuhi sa pagkaon lamang kondili sa matag pulong sa Ginoo." "Ayaw gayod kamo pagpagarbo. Ayaw kalimti ang Ginoo nga inyong Dios nga maoy nagkuha kaninyo gikan sa Ehipto, diin naulipon kamo. Siya ang nagtultol kaninyo latas niadtong hilabihang dakoa ug makalilisang nga kamingawan nga gipuy-an sa daghang malalang bitin ug tanga. Yuta kadto nga walay tubig, apan nagpabuhagay siyag tubig gikan sa batong bantilis aron inyong mainom. Siya ang naghatag kaninyog mana aron inyong kan-on—pagkaon nga wala pa gayod matilawi sa inyong katigulangan. Gibuhat niya kini aron pagputol sa inyong garbo ug sa pagsulay kaninyo alang sa inyong kabulahanan."
ANG PULONG SA GINOO.
SALMO RESPONSORYO
Ps. 147: 12-13. 14-15. 19-20
T. Dayga ang Ginoo, Jerusalem.
Dayga ang Ginoo, O Jerusalem; dayga ang imong Dios, O Sion. Kay iyang gilig-on ang mga trangka sa imong mga ganghaan; iyang gipanalanginan ang imong mga anak sulod kanimo.
T. Dayga ang Ginoo, Jerusalem.
Gitugot niya ang kalinaw sulod sa imong mga utlanan; gibuhong ikaw niya sa labing maayong trigo. Gipadala niya ang iyang sugo ngadto sa yuta; makusog ang pagdagan sa iyang pulong.
T. Dayga ang Ginoo, Jerusalem.
Iyang gisangyaw ang iyang pulong ngadto kang Jacob, ang iyang mga balaod ug mga gimbut-an ngadto kang Israel. Wala siya maghimo sa ingon sa laing nasod; wala niya ipahibalo ang iyang mga kasugoan ngadto kanila. Aleluya.
T. Dayga ang Ginoo, Jerusalem.
PAGBASA GIKAN SA UNANG SULAT NI SAN PABLO NGADTO SA TAGA-CORINTO
1 Cor. 10: 16-17
Ang kopa sa panalangin nga tungod niini gipasalamatan nato ang Dios—dili ba kini pakig-ambit man nato sa dugo ni Cristo inig-inom nato gikan niining kopa? Ug dili ba pakig-ambit man nato sa lawas ni Cristo inigkaon nato niining pan nga atong gipikaspikas? Sanglit may usa lamang ka pan, kitang tanan bisan daghan, usa lamang ka lawas; kay nakig-ambit man kita sa usa lamang ka pan.
ANG PULONG SA GINOO.
SEKWENSYA — Lauda Sion
Dayga, O Sion, ang imong Manunubos, dayga sa awit nga masadya, ang Ginoong Jesus, imong Hari ug Magbalantay. Kutob sa inyong makaya sa tanan niyang mga pinili, siya angay nga pasidunggan. Ang iyang kaugalingon gihalad aron ang tanan matubos ug mapalig-on sa hingpit. Kauban ang mga tinun-an sa Ginoong Mesiyas kansang halad mao ang kinabuhi sa tanan. Siya angay gayod halaran og pagdayeg ug pasidungog sa tanan niyang mga pinili. Karon atong hinumduman ang tugon sa Katapusan nga Panihapon sa Ginoo kanato. Dinhi natuman ang bag-ong kasabutan ug walay katapusan alang sa kaluwasan sa tanan. Ang daang pakigsaad misangpot sa pag-abli sa halad nga iyang giandam. Ang tanang gibuhat ni Jesus maoy tugon niyang sugo nga saulogon sa hingpit. Ang gihalad niyang pagkaon ug gihalad niyang ilimnon mao ang iyang lawas ug dugo. Iyang gitudlo kanato nga ang bino ug pan mao ang iyang dugo ug lawas. Mosalig kita nga tinuod kini bisan dili makita sa mga mata ang kausaban nga nahitabo. Ang pagkaon giilisan ni Kristo sa iyang lawas aron kita makaambit. Nailisan ang ilimnon sa dugo nga gihalad ni Jesus alang kanato. Ang atong gikalawat mao si Jesus nga Ginoong uyamot, walay minus, walay kulang. Bisan daghan o usa ra ang modawat kaniya, kanunayng igo, kanunayng paigo. Ang nakasala nagpasipala, apan ang maayo balaan sa pagduol aron mangalawat. Ang masupilon mag-antos, mabuhi ang maghinulsol inigdawat niya kang Kristo. Ang gipikaspikas nga pan alang sa mga nangalawat mao ang lawas sa buhi na Kristo nga iyang gihalad kanato. Sa tanan nga modawat, ang pagpikaspikas ginahimo apan buo, walay kulang ang Lawas sa Mesiyas. Pagkaon gikan sa langit, karon gihalad sa kalibutan. Halad nga madanihon nga dili gayod mahurot. Ang paghalad gipakita na sa paghalad kang Isaac, ang kordero nga nagluwas, ang mana sa mipanaw. Mahigugmaon namong Magbalantay, kaloy-i intawon kami, himoa kaming takos moambit sa pagkaon nga imong gihalad hangtod makab-ot ang langit. Mahimo nimo kining tanan aron kami maluwas, agda kami sa imong kumbira kaming tanan nimong mga tinun-an ngadto sa kinabuhi nimo nga walay katapusan. Amen. Aleluya.
BERSO SA DILI PA ANG EBANGHELYO
Aleluya! "Ako ang pan nga gikan sa langit nga naghatag sa kinabuhi", nag-ingon ang Ginoo: "Ang mokaon niining maong pan mabuhi sa dayon." Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 6: 51-58
Si Jesus miingon ngadto sa mga Judio, "Ako ang pan nga gikan sa langit nga naghatag sa kinabuhi. Ang mokaon niining pan dili gayod mamatay. Ug ang pan nga akong ihatag mao ang akong unod aron mabuhi ang kalibutan." Nakahaling kini og mainit nga paglalisay sa mga Judio. "Unsaon man niining tawhana paghatag kanato sa iyang lawas aron kan-on?" nangutana sila. Si Jesus miingon kanila, "Sultihan ko kamo: kon dili kamo mokaon sa unod sa Anak sa Tawo ug dili moinom sa iyang dugo, dili kamo makabaton og kinabuhi. Ang mokaon sa akong unod ug moinom sa akong dugo may kinabuhing walay katapusan ug banhawon ko siya sa katapusang adlaw. Kay ang akong unod mao ang matuod nga kalan-on, ug ang akong dugo mao ang matuod nga ilimnon. Ang mokaon sa akong unod ug moinom sa akong dugo magpuyo dinhi kanako ug ako diha kaniya. Ang buhing Amahan maoy nagpadala kanako ug tungod kaniya nabuhi usab ako. Sa samang pagkaagi, ang mokaon kanako mabuhi tungod kanako. Busa kini mao ang pan nga gikan sa langit; dili kini sama sa pan nga gikaon sa inyong mga katigulangan ug unya nangamatay gihapon. Ang mokaon niining maong pan mabuhi sa dayon."
ANG EBANGHELYO SA GINOO.
ANTIPONA SA PANGALAWAT
Ang nagkaon sa akong lawas ug moinom sa akong dugo, nagpabilin dinhi kanako, ug ako diha kaniya, nag-ingon ang Ginoo.