ANTIPONA SA PAGSUGOD
O Ginoo, tan-awa ug kaloy-i ako, kay alaut ako ug nag-inusara. Tan-awa ang akong mga kalisud ug ang akong kakabús, ug pasayloa ang tanan kong mga sala.
PAGBASA GIKAN SA IKADUHANG SULAT NI SAN PABLO NGADTO KANG TIMOTEO
2 Tm. 4: 1-8
Awhagon ko ikaw atubangan sa Dios ug ni Cristo Jesus nga maoy maghukom sa tanang tawo, buhi kon patay, nga tungod kay mobalik man siya ug tungod sa iyang Gingharian, pagkugi kanunay pagwali sa mensahe. Daniha, badlonga, dasiga ug tudloi nga mapailubon ang mga tawo. Moabot ang panahon nga ang mga tawo dili na mamati sa matuod nga pagtulon-an; hinonoa, ang ila na lamang gusto ang ilang sundon, ug magtawag silag daghang mga magtutudlo nga magsulti kanila sa buot nilang madungog. Dili na sila mamati sa kamatuoran kondili sa mga tinumotumo nga mga sugilanon. Apan kinahanglan nga magpugong ka kanunay sa imong kaugalingon; antosa ang mga kasakitan; buhata ang katungdanan sa usa ka magwawali sa Maayong Balita, ug tumana ang imong buluhaton ingon nga sulugoon sa Dios. Kay bahin kanako, miabot na ang takna nga iula ang akong dugo; panahon na nga mobiya ako ning kinabuhia. Gihimo ko kutob sa akong maabot ang pagpakiglumba, ug natapos ko gayod kini; giampingan ko ang akong pagtuo. Ug karon gitagana alang kanako ang ganti sa kadaogan, ang purongpurong sa pagkamatarong nga niadto unyang adlawa iganti kanako sa Ginoo, ang matarong nga Maghuhukom—ug dili kanako lamang kondili sa tanan gayod nga nagpaabot sa iyang pagpadayag.
ANG PULONG SA GINOO.
SALMO RESPONSORYO
Ps. 71: 8-9. 14-15. 16-17. 22
T. Awiton ko ang imong kaluwasan.
Ang akong ba-ba mapuno unta sa imong kadayganan, sa imong himaya adlaw-adlaw. Ayaw ako isalikway sa akong katigulangon diha nga magakawala ang akong kusog, ayaw ako pagbiyai.
T. Awiton ko ang imong kaluwasan.
Apan maglaum ako kanunay ug magdayeg ako kanimo hangtod sa kahangturan. Ang akong ba-ba magpahayag sa imong katarong, adlaw-adlaw sa imong kaluwasan.
T. Awiton ko ang imong kaluwasan.
Hisgotan ko ang gamhanang mga buhat sa Ginoo; O Dios, magsaysay ako sa imong linaing katarong, O Dios, gitudloan mo ako sukad sa akong kabatan-on, ug hangtod karon gisangyaw ko ang imong katingalahang mga buhat.
T. Awiton ko ang imong kaluwasan.
Busa pasalamatan ko ikaw sa honi diha sa lira tungod sa imong kamatinumanon, O Dios ko. Awiton ko ang imong kadayganan uban sa alpa; O Balaan sa Israel.
T. Awiton ko ang imong kaluwasan.
BERSO SA DILI PA ANG EBANGHELYO
Aleluya! Ang tanan nimong mga balaod malig-on, O Ginoo, gipabarog hangtod sa kahangturan. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 12: 38-44
Ang dakong panon sa mga tawo malipayon nga namati kang Jesus. Sa iyang pagtudlo kanila si Jesus miingon, "Pagbantay kamo sa mga magtutudlo sa Balaod nga gustong magsuroysuroy nga magsul-ob og mga bisting tag-as ug buot nga yukboan sulod sa mga merkado, nga nagpili sa mga lingkoranan nga linain sulod sa mga sinagoga, ug sa mga dapit nga labing maayo sa mga kombira. Nanlupig sila sa mga biyuda ug nangilog sa ilang mga katigayonan, ug unya nagpasundayag og tag-as nga mga pag-ampo atubangan sa mga tawo. Labi pang makalilisang ang ilang silot!" Samtang naglingkod si Jesus duol sa panudlanan sa Templo, naniid siya sa mga tawo nga nanghulog didto sa ilang mga halad. Daghang dato nga nanghulog og daghang kuwarta. Unya miduol sa hulganan sa halad ang usa ka biyudang kabus ug mihulog og duha ka dako. Gitawag ni Jesus ang iyang mga tinun-an ug giingnan, "Labaw pa sa gipanghulog sa uban ang gihulog niining kabus nga biyuda. Kay ang uban mihulog sa sobra sa ilang bahandi; apan siya bisan sa iyang kakabus mihatag sa tanan nga iya—gihatag niya ang tanan nga iyang gisaligan aron mabuhi."
ANG EBANGHELYO SA GINOO.
ANTIPONA SA PANGALAWAT
Nagsampit ako kanimo, O Dios, kay tagdon mo man ako; patalinghogi ako ug dungga ang akong pag-ampo.