ANTIPONA SA PAGSUGOD
O Ginoo, tan-awa ug kaloy-i ako, kay alaut ako ug nag-inusara. Tan-awa ang akong mga kalisud ug ang akong kakabus, ug pasayloa ang tanan kong mga sala.
PAGBASA GIKAN SA IKADUHANG SULAT NI SAN PABLO NGADTO KANG TIMOTEO
2 Tm. 2: 8-15
Hinumdomi si Jesucristo nga gibanhaw, nga kaliwat ni David, sumala sa Maayong Balita nga akong giwali. Nag-antos ako ug gigapos gani og kadena sa kama sa usa ka kriminal tungod kay nagwali man ako sa Maayong Balita. Apan ang pulong sa Dios dili ginapos, busa giantos ko ang tanan tungod sa piniling katawhan sa Dios, aron makabaton usab sila sa kaluwasan nga anaa kang Cristo Jesus, inubanan sa himayang dayon. Matuod gayod ang giingon: "Kon namatay kita uban kaniya, mabanhaw usab kita uban kaniya; Kon molahutay kita, maghari usab kita uban kaniya; Kon ilimod ta siya, ilimod usab kita niya; Kon kita dili magmatinumanon, magpabilin siyang matinumanon, Kay matinud-anon man siya." Pahinumdomi niini ang katawhan ug pahimangnoi sila atubangan sa Ginoo sa dili pagpakiglantugi bahin ug mga pulong, kay dili kini makaayo kondili makadaot lamang sa namati. Paningkamuti pag-ayo nga ang Dios mahimuot kanimo ingon nga alagad nga walay angay ikaulaw, ug nagtudlo sa kamatuoran sa hustong paagi.
ANG PULONG SA GINOO.
SALMO RESPONSORYO
Ps. 25: 4-5. 8-9. 10. 14
T. Tudloi ako sa imong mga dalan, O Ginoo.
Ang imong mga paagi, O Ginoo, ipahibalo kanako. Tudloi ako sa imong mga agianan, Agaka ako diha sa imong kamatuoran ug tudloi ako, kay ikaw man ang Dios nga akong Manluluwas.
T. Tudloi ako sa imong mga dalan, O Ginoo.
Maayo ug matarong ang Ginoo; sa ingon niini iyang gipakitaan sa dalan ang makasasala. Iyang giagak ang mapaubsanon ngadto sa katarong, iyang gitudloan ang mapaubsanon sa iyang dalan.
T. Tudloi ako sa imong mga dalan, O Ginoo.
Ang tanang mga dalan sa Ginoo kalooy ug kamakanunayon kanila nga nagaamping sa iyang kasabotan ug sa iyang mga gimbut-an. Ang Ginoo makighigala kanila nga mahadlokon kaniya, ug ang iyang kasabotan, alang sa pagtudlo kanila.
T. Tudloi ako sa imong mga dalan, O Ginoo.
BERSO SA DILI PA ANG EBANGHELYO
Aleluya! Tudlo-i ako sa dalan sa imong mga balaod, ug palandungon ko ang tanan mong mga katingalahan. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 12: 28-34
Didtoy usa ka magtutudlo sa Balaod nga nakabati sa panaglalis nila. Nakita niya nga maayo ang pagkatubag ni Jesus sa mga Saduseo; busa miduol siya kaniya ug nangutana, "Unsa mang sugoa ang labing hinungdanon sa tanan?" Mitubag si Jesus: "Mao kini ang labing hinungdanong sugo: 'Pamati, Israel! Ang Ginoo nga atong Dios mao ra gayod ang Ginoo. Kinahanglan mahalon mo ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabotan, ug sa tibuok mong kusog.' Ang sunod mao kini: 'Higugmaa ang imong isigkatawo sama sa imong kaugalingon.' Wala nay sugo nga labi pang hinungdanon kay niining duha." Ang magtutudlo sa Balaod miingon kang Jesus: "Husto kana, Magtutudlo! Tinuod ang imong gisulti nga ang Ginoo lamang maoy Dios, ug nga wala nay laing Dios gawas kaniya. Ug busa ang tawo kinahanglang magmahal sa Dios sa tibuok niyang kasingkasing, ug sa tibuok niyang salabotan, ug sa tibuok niyang kusog; ug kinahanglang higugmaon niya ang iyang isigkatawo ingon sa iyang kaugalingon. Mas maayo ang pagtuman niining duha ka sugo kay sa pagdala og mga mananap nga sunogon ibabaw sa halaran ug paghatag og ubang mga halad ngadto sa Dios." Nakaalinggat si Jesus nga maalamon kaayo ang iyang tubag, busa siya miingon kaniya: "Dili ka halayo sa Gingharian sa Dios." Ug wala na gayoy nangahas pagpangutana kaniya.
ANG EBANGHELYO SA GINOO.
ANTIPONA SA PANGALAWAT
Nagsampit ako kanimo, O Dios, kay tagdon mo man ako; patalinghogi ako ug dungga ang akong pag-ampo.