ANTIPONA SA PAGSUGOD
Nakigbisog kining martir hangtod sa kamatayon, tungod sa balaod sa iyang Dios. Ug wala siya mahadlok sa mga pulong sa mga dautan, kay gipabarog man siya ibabaw sa malig-on nga bato.
ANG SINUGDANAN SA IKADUHANG SULAT NI SAN PABLO NGADTO KANG TIMOTEO
2 Tm. 1: 1-3. 6-12
Gikan ni Pablo, apostol ni Cristo Jesus tungod sa pagbuot sa Dios, ug gipadala aron magsangyaw sa gisaad nga kinabuhi nga atong nabatonan pinaagi sa pagkahiusa nato kang Cristo Jesus—Alang kang Timoteo, ang pinangga kong anak: Ang Dios nga Amahan ug si Cristo Jesus nga atong Ginoo maghatag unta kanimog grasya, kaluoy, ug kalinaw. Nagpasalamat ako sa Dios nga akong gialagaran sa malinis nga konsiyensya, sama sa pag-alagad sa akong mga katigulangan. Adlaw ug gabii nagpasalamat ako kaniya diha sa akong mga pag-ampo sa akong paghandom kanimo. Tungod niini, pahinumdoman ko ikaw sa paggamit sa gasa nga gihatag sa Dios kanimo sa dihang gipandongan ko ikaw sa akong mga kamut. Kay ang Espiritu nga gihatag sa Dios kanato dili espiritu sa katalaw, kondili Espiritu sa gahom ug gugma ug pagpugong sa kaugalingon. Busa ayaw kaulaw sa pagsaksi sa atong Ginoo, ug kanako nga iyang binilanggo. Hinonoa, pakig-ambit sa mga pag-antos tungod sa Maayong Balita, sumala sa kusog nga ihatag sa Dios kanimo. Giluwas kita niya ug gipili aron maiyang katawhan, dili tungod sa atong nabuhat kondili tungod sa iyang kaugalingong tuyo ug grasya. Gihatag niya kanato kining maong grasya diha kang Cristo Jesus sa wala pa magsugod ang panahon, apan karon gipakita na kanato pinaagi sa pag-abot sa atong Manluluwas nga si Cristo Jesus. Gibuntog niya ang gahom sa kamatayon, ug pinaagi sa Maayong Balita gipadayag niya ang kinabuhing walay katapusan. Gisugo ako sa Dios pagsangyaw sa Maayong Balita ingon nga apostol ug magtutudlo, ug nag-antos ako tungod niini. Apan wala ko kini ikaulaw kay nakaila ako sa akong gisaligan, ug siguro ako nga siya ra ang makaamping sa iyang gipiyal kanako hangtod niadtong Adlawa.
ANG PULONG SA GINOO.
SALMO RESPONSORYO
Ps. 123: 1-2. 2
T. Kanimo, O Ginoo, akong gitan-aw ang akong mga mata.
Kanimo akong gitan-aw ang akong mga mata. Kanimo nga nagalingkod sa trono diha sa langit. Ania, ingon nga ang mga mata sa mga sulugoon nga lalake nagabantay sa mga kamot sa ilang mga agalon.
T. Kanimo, O Ginoo, akong gitan-aw ang akong mga mata.
Maingon nga ang mga mata sa sulugoon nga babaye nagabantay sa mga kamot sa iyang agalon nga babaye. Maingon usab ang atong mga mata nagatan-aw sa Ginoo nga atong Dios hangtod nga malooy siya kanato.
T. Kanimo, O Ginoo, akong gitan-aw ang akong mga mata.
BERSO SA DILI PA ANG EBANGHELYO
Aleluya! Bulahan sila nga nagtuman sa pulong sa kasingkasing nga manggihatagon, ug nagahatag og abot gumikan sa pagpadayon. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 12: 18-27
Unya may mga Saduseo nga miduol kang Jesus. (Mao kini sila ang nag-ingon nga dili mabanhaw ang mga patay.) "Magtutudlo," miingon sila, "gisulat ni Moises kining balaora: 'Kon mamatay ang usa ka tawo ug magbilin og asawa, apan walay anak, ang iyang igsuon kinahanglan mangasawa sa biyuda aron sila manganak alang sa namatay.' May pito ka managsoon nga lalaki: ang kamagulangan naminyo ug namatay nga walay anak. Unya ang iyang manghod nangasawa sa biyuda, ug siya usab namatay nga walay liwat. Mao usab kini ang nahitabo sa ikatulo nga igsoon, ingon man sa nahibilin nga mga igsuon. Silang pito ka managsoon naminyo sa babaye ug nangamatay nga walay anak. Sa kataposan, namatay ang babaye. Karon, sa adlaw nga banhawon na ang mga patay, kang kinsa man siyang asawa nga silang pito nakapangasawa man kaniya?" Si Jesus mitubag: "Pagkasayop ninyo! Ug nasayod ba kamog ngano? Kay wala kamo makasabot sa Kasulatan o sa gahom sa Dios. Kay kon ang mga patay banhawon na, mahisama sila sa mga anghel sa langit, ug dili na magminyoay ang mga lalaki ug ang mga babaye." "Dugang pa niini, bahin sa mga patay nga banhawon, wala ba kamo makabasa sa basahon nga gisulat ni Moises mahitungod sa sampinit nga nagdilaab? Kay didto nahisulat nga miingon ang Dios kang Moises, 'Ako mao ang Dios ni Abraham, ang Dios ni Isaac, ug ang Dios ni Jacob.' Sa ato pa, siya mao ang Dios sa mga buhi, dili sa mga patay. Busa nasayop kamo!"
ANG EBANGHELYO SA GINOO.
ANTIPONA SA PANGALAWAT
Ihatag ko sa makadaug, nga makakaon siya sa kahoy sa kinabuhi, nga anaa sa paraiso sa akong Dios.