ANTIPONA SA PAGSUGOD
O Ginoo, tan-awa ug kaloy-i ako, kay alaut ako ug nag-inusara. Tan-awa ang akong mga kalisud ug ang akong kakabus, ug pasayloa ang tanan kong mga sala.
PAGBASA GIKAN SA IKADUHANG SULAT NI SAN PEDRO
2 Pt. 3: 12-15. 17-18
Samtang maghulat kamo sa Adlaw sa Dios, buhata ninyo kutob sa inyong mahimo aron moabot pagdali ang Adlaw nga ang mga langit mosilaob ug maut-ot, ug ang mga planeta ug ang mga bituon sa kalangitan mangatunaw tungod sa kainit. Apan nagpaabot kita sa gisaad sa Dios nga mao ang bag-ong kalangitan ug ang bag-ong yuta diin maghari ang katarong. Busa, mga higala, samtang nagpaabot kamo niadtong Adlawa, paningkamot kamo pag-ayo nga mahimo kamong putli ug dili masaway sa Dios, ug may pakigdait kaniya. Ug isipa ang pagpailob sa atong Ginoo nga usa ka kahigayonan nga iyang gihatag kaninyo aron maluwas kamo, ingon nga ang atong minahal nga igsuon nga si Pablo nagsulat kaninyo ginamit ang kaalam nga gihatag sa Dios kaniya. Apan kamo, mga igsuon, nasayod na niini. Busa pagmatngon kamo aron dili kamo madaldal sa mga sayop sa mga malapason sa balaod ug mahulog gikan sa inyong lig-on nga baroganan. Hinonoa, padayon kamo sa pagtubo diha sa grasya ug kahibalo sa atong Ginoo ug Manluluwas nga si Jesucristo. Iya ang tanang dungog hangtod sa kahangturan! Amen.
ANG PULONG SA GINOO.
SALMO RESPONSORYO
Ps. 90: 2. 3-4. 10. 14. 16
T. Sa tanang panahon, O Ginoo, ikaw ang among dalangpanan.
Sa wala pa ihimogso ang kabukiran ug ang yuta ug ang kalibutan wala pa ianak, sukad sa kahangturan hangtod sa kahangturan ikaw mao na ang Dios.
T. Sa tanang panahon, O Ginoo, ikaw ang among dalangpanan.
Gipabalik mo ang tawo ngadto sa abog, nagaingon ka, "Balik, O mga anak sa mga tawo." Kay ang usa ka libo ka tuig diha sa imong atubangan ingon og kagahapon lamang, karon nga kadto milabay na, o ingon og usa ka pagbantay sa gabii.
T. Sa tanang panahon, O Ginoo, ikaw ang among dalangpanan.
Kapitoan ang gidaghanon sa among mga tuig, o kawaloan, kon baskog kini, ug kadaghanan nila walay bunga nga kahago, kay dali sila nga molabay ug maanod kini.
T. Sa tanang panahon, O Ginoo, ikaw ang among dalangpanan.
BERSO SA DILI PA ANG EBANGHELYO
Aleluya! Abliha ang akong mga mata, O Ginoo, aron makakita ako sa mga katingalahan sa imong balaod. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 12: 13-17
May pipila ka mga Pariseo ug mga sakop sa pundok ni Herodes nga gipadala ngadto kang Jesus aron pagbitik kaniya pinaagig mga pangutana. Miduol sila kaniya ug miingon, "Magtutudlo, nasayod kami nga ikaw mosulti gayod sa tinuod, ug dili ka mahasol sa gihunahuna sa mga tawo, kay dili ka man magsapayan sa kahimtang sa tawo. Nagtudlo ka sa matuod mahitungod sa pagbuot sa Dios alang sa tawo. Busa sultihi kami: supak ba sa atong Balaod ang pagbayad og buhis ngadto sa Emperador sa Roma o dili ba?" Apan nakasabut si Jesus sa ilang tuyo paglaang kaniya, busa nangutana siya, "Nganong naninguha man kamo sa pagbitik kanako? Dad-i akog salapi kay akong tan-awon." Busa gidad-an siya nila og salapi ug nangutana si Jesus kanila, "Kinsa man kining nawong ug ngalan nga gikulit dinhi?" Mitubag sila, "Sa Emperador." Miingon si Jesus, "Kon mao kana, ihatag ninyo ngadto sa Emperador ang iya sa Emperador, ug ngadto sa Dios ang iya sa Dios." Ug nahibulong sila pag-ayo kaniya.
ANG EBANGHELYO SA GINOO.
ANTIPONA SA PANGALAWAT
Nagsampit ako kanimo, O Dios, kay tagdon mo man ako; patalinghogi ako ug dungga ang akong pag-ampo.