PAGBASA GIKAN SA BASAHON SA EXODO
Εx. 34:4-6, 8-9
Busa nagtabas si Moises og duha ka papan nga bato, sama sa unang duha ka papan, ug sayo pagkasunod buntag, mitungas siya sa Bukid sa Sinai, ug gidala niya ang duha ka papan nga bato, sumala sa gisugo sa Ginoo kaniya. Unya mikunsad ang Ginoo nga gilimisan sa panganod, ug nagbarog didto uban ni Moises, ug gilitok niya ang iyang ngalan, ang Ginoo. Miagi ang Ginoo sa atubangan ni Moises ug miingon, "Ako ang Ginoo, ang Dios nga maluluy-on. Dili ako daling masuko ug hupong sa gugmang walay paglubad ug matinumanon." Mihapa dayon sa yuta si Moises ug misimba. Miingon siya, "Kon tinuod gayod nga nahimuot ka kanako hangyoon ko ikaw, Ginoo, sa pag-uban kanamo. Tig-a kaayog kasingkasing kining maong katawhan, apan pasayloa ang among pagkadautan ug ang among kasal-anan ug dawata kami ingon nga imo na."
ANG PULONG SA GINOO.
SALMO RESPONSORYO
Dn. 3:52, 53, 54, 55, 56
T. Himaya ug pagdayeg hangtod sa kahangturan!
Daygon ikaw, O Ginoo, Dios sa among mga katigulangan, angay ikawng daygon ug bayawon labaw sa tanan sa kahangturan; Ug daygon ang imong balaan ug mahimayaong ngalan, angayng daygon ug bayawon labaw sa tanan sa tanang katuigan.
T. Himaya ug pagdayeg hangtod sa kahangturan!
Daygon ikaw diha sa templo sa imong balaang himaya. Angay ikawng daygon ug bayawon labaw sa tanan sa kahangturan.
T. Himaya ug pagdayeg hangtod sa kahangturan!
Daygon ikaw diha sa trono sa imong gingharian, angay ikawng daygon ug bayawon labaw sa tanan sa kahangturan.
T. Himaya ug pagdayeg hangtod sa kahangturan!
Daygon ikaw nga nagadung-aw ngadto sa mga kahiladman gikan sa imong trono diha sa mga kerubin, angay ikawng daygon ug bayawon labaw sa tanan—sa kahangturan.
T. Himaya ug pagdayeg hangtod sa kahangturan!
Daygon ikaw diha sa ali sa kalangitan, angay ikawng daygon ug bayawon labaw sa tanan sa kahangturan.
T. Himaya ug pagdayeg hangtod sa kahangturan!
PAGBASA GIKAN SA IKADUHANG SULAT NI SAN PABLO NGADTO SA TAGA-CORINTO
2 Cor. 13:11-13
Karon, mga igsuon, manamilit na ako! Paningkamuti ninyo nga mahingpit kamo; pamati-a ang akong mga hangyo; paghiusa kamo ug pagmakigdaiton. Mag-uban unta kaninyo ang Dios sa gugma ug kalinaw. Pagpangumostahay kamo uban sa halok nga inigsuon. Nangumusta kaninyo ang tanang katawhan sa Dios. Mag-uban unta kaninyong tanan ang grasya sa Ginoong Jesucristo, ang gugma sa Dios, ug ang pagpakig-ambit sa Espiritu Santo.
ANG PULONG SA GINOO.
BERSO SA DILI PA ANG EBANGHELYO
Rv. 1:8
Aleluya! "Ako ang Alpa ug ang Omega," nag-ingon ang Ginoong Dios nga Labing Gamhanan, ang Dios karon, kaniadto ug ang moanhi. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 3:16-18
Si Jesus miingon kang Nicodemo, "Kay gihigugma pag-ayo sa Dios ang kalibutan ug tungod niini gihatag niya ang iyang Bugtong Anak, aron ang tanan nga motuo kaniya dili mamatay, kondili makabaton hinoon sa kinabuhing dayon. Kay wala ipadala sa Dios ang iyang Anak nganhi sa kalibutan aron pagsilot kondili aron pagluwas niini." "Ang tanan nga motuo sa Anak dili silotan, apan kadtong dili motuo kaniya gisilotan na, kay wala man siya motuo sa Bugtong Anak sa Dios."
ANG EBANGHELYO SA GINOO.