PAGBASA GIKAN SA SULAT NI SAN JUDAS
Jude 17:20-25
Apan mga higala, hinumdomi ang giingon kaniadto sa mga apostoles sa atong Ginoong Jesucristo. Apan kamo, mga igsoon, padayon kamo paglig-on diha sa inyong labing balaang pagtuo. Pag-ampo kamo diha sa gahom sa Espiritu Santo, ug pagpabilin kamo sa gugma sa Dios samtang naghulat kamo sa atong Ginoong Jesucristo nga sa iyang kaluoy maghatag kaninyo sa kinabuhing walay kataposan. Kaloy-i kadtong nagduhaduha; luwasa sila pinaagi sa pagsakmit kanila gikan sa kalayo. Ug ang uban kaloy-i usab inubanan sa kahadlok; apan likayi bisan ang ilang bisti nga nabulingan sa daotang kailibgon. Kaniya nga may gahom sa pagpugong kaninyo aron dili kamo mapukan, ug sa pagtugyan kaninyo nga walay ikasaway ug malipayon sa iyang mahimayaong atubangan - ngadto sa bugtong Dios nga atong Manluluwas, pinaagi kang Jesucristo nga atong Ginoo, ang kahalangdon, gahom ug awtoridad, sukad pa kaniadto, karon ug hangtud sa kahangturan! Amen.
ANG PULONG SA GINOO.
SALMO RESPONSORYO
Ps. 63:2, 3-4, 5-6
T. Ang akong kalag giuhaw kanimo, O Ginoo, akong Dios.
O Dios, ikaw ang akong Dios nga akong gipangita; Kanimo nangandoy ang akong unod ug giuhaw ang akong kalag sama sa yuta nga uhaw, walay kinabuhi ug walay tubig.
T. Ang akong kalag giuhaw kanimo, O Ginoo, akong Dios.
Sa ingon nagsud-ong kanimo diha sa Santuwaryo aron pagtan-aw sa imong gahom ug sa imong himaya. Kay ang imong kalooy mas maayo kaysa kinabuhi; Ang akong mga ngabil maghimaya kanimo.
T. Ang akong kalag giuhaw kanimo, O Ginoo, akong Dios.
Sa ingon niini daygon ko ikaw samtang buhi pa ako, sa pagbayaw ko sa akong mga kamot, sangpiton ko ang imong ngalan. Ingon sa kabuhong sa usa ka bangkete mabusog ang akong kalag, ug sa masadya nga mga ngabil magdayeg kanimo ang akong baba.
T. Ang akong kalag giuhaw kanimo, O Ginoo, akong Dios.
BERSO SA DILI PA ANG EBANGHELYO
Lk. 8:15
Aleluya! Bulahan sila nga nagtuman sa pulong sa kasingkasing nga manggihatagon, ug nagahatag og abot gumikan sa pagpadayon. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 11:27-33
Unya namalik sila sa Jerusalem. Samtang naglakaw-lakaw si Jesus sulod sa Templo, nangadto kaniya ang kadagkoan sa mga pari ingon man ang mga magtutudlo sa Balaod ug ang mga punoan sa mga Judio, ug nangutana: "Unsa may imong katungod sa pagbuhat niini? Ug kinsa may naghatag kanimo sa maong katungod?" Miingon si Jesus kanila: "Mangutana ako kaninyo og usa lang ka pangutana og kon makatubag kamo, tug-anan ko kamo sa akong katungod pagbuhat niining mga butanga. Tug-ani ako, diin man gikan ang katungod ni Juan sa iyang pagpamunyag? Gikan ba sa Dios o gikan ba sa tawo?" Unya nagtimbang-timbang sila sa ilang itubag kaniya ug nag-ingnanay, "Unsa may atong isulti? Kon moingon kita nga gikan sa Dios, mosumbalik siya pagpangutana, 'Unya ngano man nga wala kamo motuo kang Juan? Apan kon motubag kita, 'Gikan sa tawo.'" (Nangahadlok sila sa mga tawo, kay ang tanan nagtuo man gayod nga si Juan tinuod nga propeta.) Busa mitubag sila kang Jesus, "Wala kami masayod." Ug miingon si Jesus kanila, "Nan, dili ko usab kamo tug-anan sa katungod ko pagbuhat niining mga butanga."
ANG EBANGHELYO SA GINOO.