Biyernes sa Ikawalong Semana sa Tuig

PAGBASA GIKAN SA UNANG SULAT NI SAN PEDRO

1 Pt. 4:7-13

Duol na ang katapusan sa tanang butang. Busa pagpugong ug pagbantay kamo sa inyong kaugalingon aron makaampo kamo. Labaw sa tanan, paghigugmaay kamo sa kinasingkasing gayod, kay ang gugma nagtabon sa daghang mga sala. Batasana ninyo ang pag-abi-abi sa usag-usa diha sa inyong panimalay sa walay pagbagulbol. Ingon nga maayong piniyalan sa nagkalainlaing mga gasa sa Dios, ang tagsatagsa kinahanglan maggamit sa talagsaong gasa nga iyang nadawat gikan sa Dios alang sa kaayohan sa uban. Ang nagawali kinahanglan magwali sa pulong sa Dios; ug ang nag-alagad kinahanglan mag-alagad sumala sa kusog nga gihatag kaniya sa Dios, aron nga sa tanang butang daygon ang Dios pinaagi kang Jesucristo, kay iya ang tanang dungog ug gahom hangtod sa kahangturan! Amen. Mga minahal kong igsuon, ayaw kamo kahibulong sa mga mapait nga pagsulay nga inyong giantos; ayaw isipa nga kini talagsaong butang nga mahitabo kaninyo. Hinonoa, paglipay nga nakaambit kamo sa mga pag-antos ni Cristo, aron kamo magmalipayon inigpadayag na sa iyang himaya.

SALMO RESPONSORYO

Ps. 96:10, 11-12, 13

T. Moabot ang Ginoo aron maghukom sa yuta.

Isulti diha sa kanasuran: Ang Ginoo hari. Gihimo niya ang kalibotan nga malig-on aron dili gayod matarog; nagadumala siya sa iyang lungsod uban sa kaangayan.

T. Moabot ang Ginoo aron maghukom sa yuta.

Maglipay ang kalangitan ug magsadya ang yuta; molanog ang dagat ug ang nagpuno niini; magsadya ang kapatagan ug ang tanan nga anaa kanila.

T. Moabot ang Ginoo aron maghukom sa yuta.

Manglukso sila sa kasadya atubangan sa Ginoo kay nag-abot siya; Nagaabot siya aron maghari sa yuta. Maghari siya sa kalibutan uban sa katarong ug sa kalungsoran uban sa iyang kamakanunayon.

T. Moabot ang Ginoo aron maghukom sa yuta.

BERSO SA DILI PA ANG EBANGHELYO

Jn. 8:12

Aleluya! Ako mao ang kahayag sa kalibutan, nag-ingon ang Ginoo; ang tawo nga magsunod sa akong kabubut-on makabaton sa kahayag sa kinabuhi. Aleluya!

PAGBASA SA SANTOS NGA EBANGHELYO SUMALA NI SAN MARKOS

Mk. 11:11-26

Misulod si Jesus sa Jerusalem, unya miadto sa Templo ug mitan-aw sa mga butang niini, apan kay hapon na man, miadto siya sa Betania kinuyogan na sa napulog-duha ka tinun-an. Sa sunod nga adlaw, samtang namalik sila gikan sa Betania, gigutom si Jesus. Nakita niya sa layo ang usa ka kahoyng igera nga nanahon pag-ayo. Miduol siya sa kahoy aron pagsusi kon may bunga ba kini; apan sa pag-abot niya, mga dahon lamang ang iyang hikaplagan, kay dili pa man tingbunga. Miingon si Jesus sa igera: "Sukad karon wala nay makakaon sa imong bunga!" Ug nakadungog niini ang iyang mga tinun-an. Sa pag-abot nila sa Jerusalem, misulod si Jesus sa Templo ug giabog ang tanan nga namalit ug namaligya didto. Gitikwang niya ang mga lamesa sa mga mangingilis og salapi, ug ang mga lingkoranan sa mga namaligyag salampati. Ug wala siya mutugot nga adunay magdala bisag unsa latas sa tugkaran sa Templo. Unya gitudloan niya ang mga tawo: "Nag-ingon ang Dios diha sa Kasulatan, 'Paganganlan ang akong balay og balay sa pag-ampo alang sa tanang mga tawo.' Apan gihimo ninyo kini nga tagoanan sa mga tulisan." Nakabalita niini ang kadagkoan sa mga pari ug ang mga magtutudlo sa Balaod, busa misugod sila pagpangitag paagi sa pagpatay kang Jesus. Nangahadlok sila kaniya, kay nadani man sa iyang pagtulun-an ang tibuok panon sa mga tawo. Sa pagkasawomsom na, si Jesus ug ang iyang mga tinun-an mibiya sa siyudad. Sayo sa pagkabuntag, samtang naglakaw sila sa dalan nakita nila ang kahoyng igera. Kini nalaya na gikan sa kinatumyan ngadto sa mga gamot. Ug nahinumdom si Pedro sa pagtunglo ni Jesus sa kahoyng igera ug siya miingon kaniya, "Magtutudlo, tan-awa ra, namatay ang kahoyng igera nga imong gitunglo!" Miingon si Jesus kanila: "Timan-i kini: kon kamo may pagtuo sa Dios, makasugo kamo niining bungtora, 'Maalsa ka ug layat ngadto sa dagat.' Kon kamo walay pagduhaduha sulod sa inyong kasingkasing, kondili nagtuo kamo nga mahimo ang inyong gisulti, mahimo gayod kini. Tungod niini, mag-ingon ako kaninyo nga kon kamo mag-ampo ug mangayo og usa ka butang, tuohi nga madawat ninyo kini, ug mainyo gayod kini. Inigtindog ninyo aron pag-ampo, kon aduna kamoy kayugot batok kang bisan kinsa, pasayloa una siya aron ang inyong Amahan nga atua sa langit mopasaylo usab kaninyo."