PAGBASA GIKAN SA UNANG SULAT NI SAN PEDRO
1 Pt. 1:10-16
Ang mga propeta nagsusi ug nagpakisayod mahitungod niining maong kaluwasan, ug nanagna sila mahitungod niining gasa nga ihatag sa Dios kaninyo. Nagpakisusi sila kon anus-a ug sa unsang paagi moabot kini. Kining panahona maoy gitudlo sa Espiritu ni Cristo nga diha kanila sumala sa gitagna sa Espiritu mahitungod sa mga pag-antos Cristo ug sa himaya nga mosunod niini. Gipadayag sa Diyos sa maong mga propeta nga ang gihisgotan nila dili alang sa ilang kaugalingong kaayohan kondili alang kaninyo. Kining mga butanga nadungog ninyo gikan sa mga magwawali sa Maayong Balita pinaagi sa gahom sa Espiritu Santo nga gipadala gikan sa langit. Kini ang mga butang nga buot sabton bisan gani sa mga anghel. Busa andama ang inyong salabotan; pagmaugdang kamo ug ibutang gayod ang inyong paglaom diha sa grasya nga ihatag kaninyo sa panahon nga mapadayag na si Jesu-Cristo. Pagmasinugtanon kamo sa Dios ug ayaw ninyo ipahiuyon ang inyong kinabuhi sa mga tinguha nga inyong gihuptan kaniadto sa wala pa kamo masayod sa kamatuoran. Hinunoa, pagkinabuhi kamo nga balaan ingon nga balaan ang Dios nga nagtawag kaninyo. Ang kasulatan nag-ingon, "Pagbalaan kamo kay ako balaan man."
ANG PULONG SA GINOO.
SALAMAT SA DIOS.
SALMO RESPONSORYO
Ps. 98:1, 2-3, 3-4
R. Ang Ginoo nagpahibalo sa iyang kaluwasan.
Awiti ang Ginoo og bag-ong awit, kay naghimo siya og katingalahang mga buhat; ang iyang tuong kamut nakadangat og kadaugan alang kaniya ang iyang balaang bukton. (R)
Ang Ginoo nagpahibalo sa iyang kaluwasan: Sa atubangan sa kansuran iyang gipahayag ang iyang katarong. Nahinumdom siya sa iyang kaluoy ug sa iyang kamatinud-anon alang sa balay ni Israel. (R)
Ang tanang kautlanan sa yuta nakakita sa kaluwasan nga gihimo sa atong Dios. Awiti nga malipayon ang Ginoo, kamong tanang kayutaan; singgit kamo sa pag-awit; awita ang pagdayeg. (R)
BERSO SA DILI PA ANG EBANGHELYO
Mt. 11:25
Aleluya! Dalaygon ikaw, Amahan, Ginoo sa langit ug yuta; kay imong gipadayag sa mga gagmay ang mga misteryo sa gingharian. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 10:28-31
Unya misulti si Pedro kang Jesus, "Nasayod ka nga gibiyaan namo ang tanan ug misunod kamo kanimo." Miingon si Jesus kanila, "Tinuod ka na, ug sultihan ko kamo nga ang mobiya sa iyang panimalay o sa mga igsuon, o sa inahan, o sa amahan, o sa mga anak, o sa mga uma tungod kanako ug tungod sa Maayong Balita, makadawat og labi pang daghan niining kinabuhia. Makadawat siyag ginatos ka mga balay, mga igsuon, mga inahan, mga anak ug mga uma-bisan tuod og lutoson siya; ug sa umaabot nga kalibutan makadawat siya sa kinabuhing dayon. Apan daghan karon nga nahiuna, maulahi; daghan karon nga naulahi, mahiuna."
ANG EBANGHELYO SA GINOO.
DAYGON IKAW, O KRISTO.
