PAGBASA GIKAN SA BASAHON SA GENESIS
Gn. 3:9-15, 20
Apan ang lalaki gitawag sa Ginoong Dios, "Hain ka ba?" Ang lalaki mitubag, "Nadungog ko ang imong paglakaw sa tanaman ug giabot akog kahadlok ug mitago ako kay hubo man ako." "Kinsay nagsulti kanimo nga hubo ka? " nangutana ang Dios. "Mikaon ka ba sa bunga sa kahoy nga gidili ko kanimo?" Ang lalaki mitubag, "Ang babaye nga gihatag mo kanako maoy naghatag kanako sa bunga sa maong kahoy ug mikaon ako niini." Ang Ginoong Dios nangutana sa babaye, "Nganong gibuhat mo man kini?" Ang babaye mitubag, "Gilansisan ako sa bitin, busa mikaon ako niini." Ug ang Ginoong Dios miingon sa bitin "Tungod niini silotan ka; ikaw lamang sa tanang mananap ang mahiagom niining tungloha: sukad karon magkamang ka na pinaagi sa imong tiyan, ug magkaon ka nag abog, sa tanang adlaw sa imong kinabuhi. Himoon kong magdinumtanay ikaw ug ang babaye; mahimong kaaway ang tawo ug ang bitin, ug mahimong kaaway ang imong kaliwat ug ang iyang kaliwat. Dugmokon niya ang imong ulo ug paakon mo usab ang iyang tikod." Ginganlan sa lalaki ang iyang asawa og Eva kay siya man ang inahan sa tanang tawo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 87:1-3, 4-5, 6-7
R. Mahimayaon ang mga butang nga ilang gisulti bahin kanimo, O Siyudad sa Dios.
Gitukod sa Dios ang iyang siyudad diha sa balaang kabunturan; gihigugma niya ang siyudad sa Jerusalem labaw kay sa ubang dapit sa Israel. (R)
Pamati siyudad sa Dios, sa katingalahang mga butang nga gisulti niya diha kanimo. Bahin sa Sion ikaingon unya nga ang tanang kanasoran sakop niini, ug himoon siyang malig-on sa Labing Halangdon. (R)
Matngonan nila, diha nga magpalista ang tawo; "Kining tawhana natawo didto." Ug ang tanang mag- awit diha sa ilang masadya nga sayaw: "Ang akong puloy-anan anaa sa sulod kanimo." (R)
BERSO SA DILI PA ANG EBANGHELYO
Aleluya! O malipayong Birhen, nga nanganak sa Ginoo; O bulahang Inahan sa Simbahan, nga nag-amuma kanamo sa Espiritu sa imong Anak nga si Hesukristo. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 19:25-27
Duol sa Krus ni Jesus nagbarog ang Iyang inahan ug ang igsoon sa iyang inahan, si Maria nga asawa ni Cleofas ug si Maria Magdalena. Sa pagkakita ni Jesus sa Iyang inahan ug sa tinun-an nga Iyang gimahal nga nagbarog didto, miingon siya sa iyang inahan, "Babaye, Siya ang imong Anak." Unya miingon Siya sa tinun-an, "Ania ang imong inahan." Sukad niadto gipatipon si Maria sa tinun-an.
ANG EBANGHELYO SA GINOO.
DAYGON IKAW, O KRISTO.
