PAGBASA GIKAN SA MGA BUHAT SA MGA APOSTOLES
Acts 28:16-20, 30-31
Pag-abot namo sa Roma, gitugotan si Pablo pagpuyo nga siya ra, apan giguwardiyahan ug usa ka sundalo. Unya tapos sa tulo ka adlaw nakigtigom si Pablo sa mga kadagkoan sa mga Judio sa maong dapit. Ug sa diha na sila, miingon siya, "Mga igsuon, bisag wala akoy nabuhat batok sa atong katawhan o sa mga batasan nga atong nasunod gikan sa atong mga katigulangan, gipreso ako didto sa Jerusalem ug gitugyan ngadto sa mga Romanhon. Gisukitsukit nila ako ug ila unta akong buhian kay nakita man nila nga wala akoy nabuhat nga angay silotan sa kamatayon. Apan sa dihang misupak ang mga Judio, napugos ako pag-apilar sa Emperador, bisan tuod wala akoy ikasumbong batok sa akong katawhan. Kini ang hinungdan nga mihangyo ako sa pagpakigsulti kaninyo; kay ako karon nabilanggo tungod kaniya nga maoy paglaum sa katawhan sa Israel." Sulod sa duha ka tuig nagpuyo si Pablo didto sa usa ka dapit nga iyang giabangan, ug giabiabi niya ang tanan nga miduaw kaniya. Giwali niya ang Gingharian sa Dios ug nagtudlo mahitungod sa Ginoong JesuCristo. Gihimo niya kini sa dakong kaisog ug kasayon.
ANG PULONG SA GINOO.
SALAMAT SA DIOS.
SALMO RESPONSORYO
Ps. 11:4, 5, 7
R. Ang matarong mosud-ong sa imong nawong, O Ginoo. / R. Aleluya.
Ang Ginoo anaa sa iyang balaang templo; ang trono sa Ginoo anaa sa langit. Ang iyang mausisahong paglantaw anaa sa katawhan. (R)
Ang Ginoo nagasusi sa matarong ug sa dautan; ang mahigugmaon sa kagubot iyang kaaway. Kay ang Ginoo matarong, mahigugmaon siya sa matarong nga mga buhat; ang matarong mosud-ong sa iyang nawong. (R)
BERSO SA DILI PA ANG EBANGHELYO
Jn. 16:7, 13
Aleluya! Padad-an ko kamo sa Espiritu sa kamatuoran, nag-ingon ang Ginoo; siya ang magtudlo kaninyo sa tibuok nga kamatuoran. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 21:20-25
Milingi si Pedro ug nakita niya nga misunod kanila ang tinun-an nga pinangga ni Jesus. Siya kadtong nagpau-raray sa dughan ni Jesus sa ilang pagpanihapon ug nangutana, "Ginoo, kinsa ba ang magbudhi kanimo?" Sa pagkakita ni Pedro kaniya, miingon siya kang Jesus, "Ginoo, unsa may dangatan niining tawhana?" Si Jesus mitubag, "Kon buot ko nga siya magpabiling buhi hangtud sa akong pagbalik, unsa may labot mo? Sunod lamang kanako!" Busa mikaylap ang balita diha sa mga sumusunod ni Jesus nga dili mamatay ang maong tinun-an. Apan wala moingon si Jesus nga ang tinun-an dili mamatay; igo lamang siyang miingon, "Kon buot ko nga siya magpabiling buhi hangtud sa akong pagbalik, unsa may Iabot mo?" Kini siya mao ang tinun-an nga nagmatuod ug nagsulat niining mga butanga; ug nasayod kami nga tinuod ang iyang gisulti. Daghan pa kaayong mga butang nga gibuhat ni Jesus, ug kon gisulat pa ang tanan, nagtoo ako nga ang tibuok kalibotan dili gayod paigo nga kasudlan sa mga sinulat.
ANG EBANGHELYO SA GINOO.
DAYGON IKAW, O KRISTO.
