PAGBASA GIKAN SA MGA BUHAT SA MGA APOSTOLES
Acts 22:30; 23:6-11
Ang komandante buot motino kon unsa gayod ang sumbong sa mga Judio batok kang Pablo; busa pagkasunod adlaw gipatangtang niya ang mga kadena ni Pablo ug gipatigum niya ang mga kadagkoan sa mga pari ug ang tibuok Labawng Hukmanan. Unya gidala niya si Pablo ug gipaatubang kanila. Sa pagkasayod ni Pablo nga may mga Saduseo ug mga Pariseo didto, miingon siya sa kusog nga tingog ngadto sa Labawng Hukmanan, "Mga igsuon, ako Pariseo ug anak pa gayod sa usa ka Pariseo. Gipaatubang ako dinhi tungod kay nagtuo ako nga banhawon ang mga patay!" Sa pagsulti gayod niya niini, ang mga Pariseo ug ang mga Saduseo nagkalalis ug nabahin ang pundok. (Kay ang mga Saduseo god nag-ingon man nga ang mga patay dili banhawon ug nga walay mga anghel ug mga espiritu; apan ang mga Pariseo nagtuo niining tanan.) Misamot ang panaglalis ug ang pipila ka mga magtutudlo sa Balaod nga sakop sa pundok sa mga Pariseo mitindog ug mitutol pag-ayo nga nag-ingon, "Wala kami nakitang buhat nga dautan niining tawhana! Tingalig may espiritu o anghel nga nagsulti gayod kaniya!" Ang panaglalis miinit pag-ayo ug tungod niini ang komandante nahadlok nga kuniskunison nila si Pablo. Busa gipakanaog niya ang mga sundalo aron pagkuha kang Pablo ug pagdala kaniya ngadto sa kuwartel. Nianang pagkagabii, ang Ginoo mitungha tupad kang Pablo ug miingon, "Ayaw kahadlok! Ingon nga nagsaksi ka kanako dinhi sa Jerusalem, mosaksi ka usab kanako didto sa Roma."
ANG PULONG SA GINOO.
SALAMAT SA DIOS.
SALMO RESPONSORYO
Ps. 16:1-2, 5, 7-8, 9-10, 11
R. Bantayi ako, O Dios; kay ikaw ang akong gilauman. / R. Aleluya.
Bantayi ako O Dios, kay nagadangop ako kanimo; naga-ingon ako sa Ginoo, "Ikaw ang akong Ginoo." O Ginoo, ikaw ang akong bahin ug akong kopa ikaw ang nagalig-on sa akong suwerte. (R)
Daygon ko ang Ginoo nga nagatambag kanako bisan sa gabii nagapahimangno kanako ang akong kasingkasing. Gibutang ko ang Ginoo kanunay sa akong atubangan, kon anaa siya sa akong tuo, wala akoy kahadlokan. (R)
Busa ang akong kasingkasing nalipay ug ang akong kalag nagsadya, ang ako usab nga lawas nagapadayon diha sa pagsalig; Kay dili nimo biyaan ang akong kalag ngadto sa kahiladman, ni motugot ka nga ang imong buotang alagad madunot. (R)
Pakitaon mo ako sa dalan sa kinabuhi, sa bug-os nga kasadya diha sa imong atubangan, ang kalipayan sa imong kamut nga tuo hangtod sa kahangturan. (R)
BERSO SA DILI PA ANG EBANGHELYO
Jn. 17:21
Aleluya! Nag-ampo ako nga mausa unta sila. Amahan, mausa unta sila dinhi kanato ingon nga ikaw ania kanako ug ako anaa kanimo, aron motuo ang kalibutan nga ikaw maoy nagpadala kanako! Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 17:20-26
Si Jesus miyahat sa langit ug miingon, "Wala ako mag-ampo alang lamang kanila, kondili alang usab niadtong motuo kanako tungod sa ilang mensahe. Nag-ampo ako nga mausa unta sila. Amahan, mausa unta sila dinhi kanato ingon nga ikaw ania kanako ug ako anaa kanimo, aron motuo ang kalibutan nga ikaw maoy nagpadala kanako! Gihatagan ko sila sa samang dungog nga imong gihatag kanako aron sila mausa ingon nga ikaw ug ako usa ra. Ako anaa kanila ug ikaw ania kanako aron sila mausa gayod, ug sa ingon masayod ang kalibutan nga ikaw nagpadala kanako, ug nga nahigugma ka kanila ingon nga ikaw nahigugma kanako." "Amahan, gihatag mo sila kanako, ug buot ko nga bisan asa ako atua usab sila, aron makakita sila sa akong himaya, ang himaya nga imong gihatag kanako; kay nahigugma ka man kanako bisan sa wala pa buhata ang kalibutan! Amahan nga matarong, ang kalibutan wala makaila kanimo, apan nakaila ako kanimo ug kini sila nasayod nga ikaw ang nagpadala kanako. Gipaila ko ikaw kanila ug kini akong padayonon pagbuhat, aron mabatonan usab nila ang imong gugma alang kanako ug magpuyo usab ako diha kanila."
ANG EBANGHELYO SA GINOO.
DAYGON IKAW, O KRISTO.
