PAGBASA GIKAN SA MGA BUHAT SA MGA APOSTOLES
Acts 20:28-38
Bantayi ninyo ang inyong kaugalingon ug ang tanang mga magtutuo nga gitugyan sa Espiritu Santo kaninyo. Atimana usab ang simbahan sa Dios nga naiya pinaagi sa kamatayon sa iyang Anak. Nahibalo ako nga inigbiya ko kaninyo, anhaon kamo sa mapintas nga lobo, ug wala silay sayloan sa panon sa mga magtutudlo. May pipila unya ka mga tawo diha sa inyong pundok nga manudlog bakak aron pagdani sa mga magtutuo sa pagsunod kanila. Busa pagbantay gayod kamo ug hinumdomi nga uban sa mga luha gitambagan ko ang matag usa kaninyo sa adlaw ug sa gabii sulod sa tulo ka tuig. "Ug karon itugyan ko kamo sa kamut sa Dios ug sa mensahe sa iyang grasya. Makalig-on siya ug makahatag kaninyo sa mga panalangin nga gitagana alang sa tanan niyang katawhan. Wala ako maibog sa salapi o bulawan o saput ni bisan kinsa. Kamo mismo nasayod nga kining akong mga kamut naghago pagsangkap sa tanan nga gikinahanglan ko ug sa akong mga kauban. Diha sa tanan nga akong gihimo gipakita ko kaninyo nga kinahanglan kita maghago aron pagtabang sa mga maluyahon uban ang paghinumdom sa giingon sa Ginoong Jesus, 'Mas bulahan ang paghatag kay sa pagdawat.'" Human kini isulti ni Pablo, siya ug ang tanan niyang kauban miluhod ug nag-ampo. Nanghilak silang tanan ug migakos ug mihalok kaniya sa pagpanamilit. Nasubo sila pag-ayo tungod sa gisulti ni Pablo nga dili na sila magkita pag-usab. Unya gihatud nila siya ngadto sa sakayan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 68:29-30, 33-35, 35-36
R. Awiti ang Dios, O mga gingharian sa yuta. / R. Aleluya.
Ipakita, O Dios, ang imong gahum, ang gahom, O Dios, nga imong gigamit alang kanamo; Alang sa imong templo didto sa Jerusalem ang mga hari magdala unta kanimo og mga gasa. (R)
Kamong mga gingharian sa yuta, awiti ang Dios, awiti og pagdayeg ang Ginoo nga nagahari gikan sa kahitas-an sa karaang kalangitan. Ania nagalanog ang iyang tingog, ang tingog sa gahum: "Ilha ang gahom sa Dios." (R)
Diha sa Israel anaa ang iyang kahalangdon; ang iyang gahum anaa sa kapanganuran. Makataha diha sa iyang santuwaryo ang Dios, ang Dios ni Israel; siya ang nagahatag sa gahom ug kusog ngadto sa iyang lungsod. (R)
BERSO SA DILI PA ANG EBANGHELYO
Jn. 17:17b, 17a
Aleluya! Ang imong pulong kamatuoran, himoa silang imo gayod pinaagi sa kamatuoran. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 17:11-19
Si Jesus miyahat sa langit ug nag-ampo, "Balaan nga Amahan, ug karon moanha ako kanimo: dili na ako magdugay dinhi sa kalibutan, apan magpabilin sila dinhi. Balaang Amahan, bantayi sila diha sa gahom sa imong ngalan—ang ngalan nga imong gihatag kanako, aron sila mausa ingon nga ikaw ug ako usa lamang! Samtang ako uban pa kanila gibantayan ko sila pinaagi sa gahom sa imong ngalan, ang ngalan nga imong gihatag kanako. Gibantayan ko sila ug walay usa kanila nga nawala, gawas niadtong tawo nga mawala gayud—aron matuman ang Kasulatan. Ug karon moanha ako kanimo, ug gisulti ko kining mga butanga dinhi sa kalibutan aron malipay sila pag-ayo duyog kanako. Gihatag ko kanila ang imong mensahe ug gikasilagan sila sa kalibutan, kay dili man sila iya sa kalibutan ingon nga ako dili iya sa kalibutan. Wala ako maghangyo kanimo nga kuhaon mo sila gikan sa kalibutan, kondili nga bantayan mo hinoon sila batok sa Yawa. Ingon nga ako dili iya sa kalibutan, dili usab sila iya sa kalibutan. Himoa silang imo gayud pinaagi sa kamatuoran; ang imong pulong kamatuoran. Gipadala ko sila sa kalibutan ingon nga ako imong gipadala nganhi sa kalibutan. Ug tungod kanila gitugyan ko ang akong kaugalingon nganha kanimo aron maimo usab sila."
ANG EBANGHELYO SA GINOO.
DAYGON IKAW, O KRISTO.
