PAGBASA GIKAN SA MGA BUHAT SA MGA APOSTOLES
Acts 19:1-8
Samtang didto si Apolos sa Corinto, mitadlas si Pablo sa lalawigan hangtod miabot siya sa Efeso. Didto gikahibalag niya ang pipila ka mga tinun-an, ug sila gipangutana niya, "Nakadawat ba kamo sa Espiritu Santo sa dihang mituo kamo?" Sila mitubag, "Wala gani kami mahibalo kon aduna bay Espiritu Santo. Unya si Pablo nangutana kanila "Unsa man diayng matanga sa bunyag ang inyong nadawat?" "Ang bunyag ni Juan," mitubag sila. Unya si Pablo miingon, "Ang bunyag ni Juan alang lamang niadtong naghinulsol; ug iyang gitudloan ang katawhan sa Israel nga kinahanglan motuo sila niadtong moanhi sunod kaniya nga mao si Jesus." Sa pagkadungog nila niini, gibunyagan sila sa ngalan sa Ginoong Jesus. Sa dihang gipandongan sila ni Pablo sa iyang kamut, mikunsad kanila ang Espiritu Santo; unya nagsulti silag lainlaing pinulongan ug nagwali usab sila sa pulong sa Dios. Mga napulog duha sila ka tawo. Unya miadto si Pablo sa sinagoga, ug sulod sa tulo ka bulan giwalihan niya ang katawhan sa walay kukahadlok, nakiglantugi ug naninguha pagpasabot kanila mahitungod sa gingharian sa Dios.
ANG PULONG SA GINOO.
SALAMAT SA DIOS.
SALMO RESPONSORYO
Ps. 68:2-3, 4-5, 6-7
R. Awiti ang Dios, O mga gingharian sa yuta. / R. Aleluya.
Ang Dios mitindog; ang iyang mga kaaway nagkatibulaag, ug sila nga nagdumot kaniya nanagan sa iyang atubangan. Maingon nga ang aso gipalid, mao usab sila; ingon sa talo nga milanay atubangan sa kalayo. (R)
Apan ang matarong nagasadya ug nagalukso sa kalipay atubangan sa Dios; nalipay sila ug nagsadya. Awiti ang Dios, awitig pagdayeg ang iyang ngalan; ang iyang ngalan mao ang Ginoo; lukso kamo sa kalipay sa iyang atubangan. (R)
Ang Amahan sa mga ilo ug tigpanalipod sa mga balo mao ang Dios diha sa iyang balaang puloy-anan. Ang Dios naghatag og puloy-anan sa mga biniyaan; gipagula niya ang mga binilanggo ngadto sa kagawasan. (R)
BERSO SA DILI PA ANG EBANGHELYO
Col. 3:1
Aleluya! Sanglit gibanhaw naman kamo uban ni Cristo, tinguhaa ang mga butang nga atoa sa langit diin naglingkod si Cristo sa iyang trono sa tuo sa Dios. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 16:29-33
Unya ang iyang mga tinun-an miingon kang Jesus, "Karon yano na gayod ang imong sulti ug dili na pinaagig mga sambingay. Nahibalo na kami karon nga nasayod ka sa tanang butang, ug wala ka magkinahanglan nga aduna pay mangutana kanimo. Busa mituo kami nga ikaw gikan gayod sa Dios." Si Jesus mitubag kanila, "Mituo naba kamo karon? Ang panahon moabot ug karon mao na, nga magkatibulaag kamong tanan; manguli kamo sa inyo ug inyo akong biyaan. Apan dili ako mag-inusara kay ang Amahan nag-uban man kanako. Gisulti ko kini kaninyo aron makabaton kamog kalinaw pinaagi sa inyong pagkahiusa kanako. Paan-tuson kamo sa kalibutan, apan ayaw kahadlok, kay gidaog ko na ang kalibutan!"
ANG EBANGHELYO SA GINOO.
DAYGON IKAW, O KRISTO.
