⚪ [S] Ang Pagsaka sa Langit sa Ginoo

PAGBASA GIKAN SA MGA BUHAT SA MGA APOSTOLES

Acts 1:1-11

Minahal kong Teofilo: Sa una kong sulat gihisgotan ko ang tanang butang nga gibuhat ug gitudlo ni Jesus, sukad sa pagsugod niya sa iyang buluhaton hangtud sa adlaw nga gibayaw siya ngadto sa langit. Sa wala pa siya bayawa, gipahimangnoan niya pinaagi sa Espiritu Santo ang mga tawo nga iyang gipili nga mga apostoles. Sulod sa kap-atan ka adlaw human siya mamatay, nagpakita siya kanila sa makadaghan, sa mga paagi nga nagmatuod nga buhi gayod siya. Nakita siya nila ug nakigsulti kanila mahitungod sa paghari sa Dios. Ug samtang si Jesus uban pa kanila gitugon niya sila, "Ayaw una kamo pagbiya sa Jerusalem; hulata ninyo ang gasa nga gisaad sa akong Amahan, sumala sa gisulti ko kaninyo. Kay si Juan namunyag pinaagi sa tubig, apan pipila na lamang ka adlaw gikan karon bunyagan kamo pinaagi sa Espiritu Santo." Sa pagkatigum nila, gipangutana nila si Jesus, "Ginoo, tukoron mo ba pag-usab niining panahona ang gingharian sa Israel?" Si Jesus mitubag kanila, "Ang mga panahon ug mga adlaw gilatid nang daan sa pagbuot sa akong Amahan; dili kamo angay magpakisayod kon kanus-a kini mahitabo. Apan kon mokunsad na kaninyo ang Espiritu Santo, makadawat kamo'g gahum ug mahimo kamong akong mga saksi sa Jerusalem, sa tibuok Judea ug Samaria, ug sa tibuok kalibutan." Human niya isulti kini, gibayaw siya ngadto sa langit samtang nagtan-aw sila kaniya, ug siya wala na nila makita kay gisalipdan man siya'g panganod. Samtang nagtutok sila sa langit sa pagkayab ni Jesus, may duha ka tawo nga nagbisti'g puti nga mitungha pagkalit ug mibarog tupad kanila. Miingon sila, "Mga taga-Galilea, nganong nagbarog man kamo dinhi ug nagsigig hangad sa langit? Si Jesus nga gibayaw ngadto sa langit mobalik sa samang paagi sa iyang pagkayab ngadto sa langit."

SALMO RESPONSORYO

Ps. 47:2-3, 6-7, 8-9

R. Misaka ang Dios sa Iyang trono uban sa mga singgit sa kalipay, usa ka tingog sa mga trumpeta alang sa Ginoo. / R. Aleluya.

Kamong tanang mga tawo, pamakpak kamo, singgit kamo ngadto sa Dios sa mga singgit sa kalipay, Kay ang Ginoo, ang Labing Halangdon, ang katahaan, dakung hari sa tibuok nga kalibutan. (R)

Kay hari sa tibuok yuta ang Dios; awiti siya'g mga imno sa pagdayeg. Maghari ang Dios diha sa kanasuran, magalingkod ang Dios diha sa Iyang balaang trono. (R)

PAGBASA GIKAN SA SULAT NI SAN PABLO NGADTO SA TAGA-EFESO

Eph. 1:17-23

Ug naghangyo ako sa Dios sa atong Ginoong JesuCristo, ang gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabutan aron masayod kamo unsa ang paglaum nga alang niini gitawag kamo. Ug hinaut usab unta nga masayod kamo sa kahupong sa mga panalangin nga gisaad niya sa Iyang katawhan. Dugang pa niini, gipanghinaut ko nga masayran ninyo ang kadaku sa Iyang gahum nga ania kanato nga nagtuo kaniya. Kining gahuma nga ania kanato mao ang gigamit niya pagbanhaw kang Cristo, ug pagpalingkod kaniya sa Iyang tuo didto sa langit. Didto naghari si Cristo labaw sa tanang mga hari, ug sa mga anaa sa gahum ug sa mga punoan ingon man sa mga kaginoohan; labaw siya sa tanan bisan unsa pa ang ilang katungdanan niining kalibutana ug sa sunod. Gibutang sa Dios ang tanan ubos sa pagmando ni Cristo, ug alang sa simbahan gihimo siyang pangulo nga labaw sa tanan. Ang simbahan mao ang lawas ni Cristo, ang kahingpitan niya nga mao ang naghingpit sa tanang butang.

BERSO SA DILI PA ANG EBANGHELYO

Mt. 28:19a, 20b

Aleluya! Busa panlakaw kamo ngadto sa tibuok kalibutan ug himoa silang akong mga tinun-an. Ug ako mag-uban kaninyo hangtud sa katapusan sa tibuok kalibutan. Aleluya!

PAGBASA SA SANTOS NGA EBANGHELYO SUMALA NI SAN LUKAS

Lk. 24:46-53

Ug miingon siya kanila, "Kini mao ang nahisulat: nga ang Mesiyas kinahanglan mag-antus ug unya mabanhaw sa ikatulong adlaw, ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isangyaw ngadto sa tanang mga nasud, sugod sa Jerusalem. Kamo mga saksi niining mga butanga. Ug ako mismo mao ang magpadala nganhi kaninyo sa gisaad sa akong Amahan. Apan kinahanglan maghulat kamo sa siyudad hangtod nga mokunsad kaninyo ang gahom gikan sa kahitas-an. Unya gidala niya sila ngadto sa gawas sa siyudad hangtod sa Betania, diin giisa niya ang iyang mga kamot ug gipanalanginan sila. Ug samtang siya nanalangin kanila, mibiya siya ug gibayaw ngadto sa langit. Gisimba nila siya ug unya mibalik sila sa Jerusalem nga malipayon kaayo. Nagkanunayan sila didto sa Templo ug nagpasalamat sa Dios.