PAGBASA GIKAN SA MGA BUHAT SA MGA APOSTOLES
Acts 17:15, 22-18:1
Ang mga tawo nga naghatod kang Pablo mikuyog kaniya hangtud sa siyudad sa Atenas. Unya namalik sila sa Berea uban sa tugon ni Pablo nga paagpason sila si Silas ug si Timoteo sa Iabing madali. Unya si Pablo mitindog atubangan sa konseho sa Areopago ug miingon, "Mga taga-Atenas! Nakita ko nga kamo mga relihiyosa kaayo. Kay sa akong pagsuroy suroy sa inyong siyudad ug sa pagtan-aw ko sa mga dapit nga inyong gisimbahan, nakita ko ang altar nga gikulitan niining mga pulonga, 'Alang sa Dios nga Wala Hiilhi.' Kanang inyong gisimba bisan wala ninyo hiilhi, mao karon ang akong gipaila kaninyo. Ang Dios nga nagbuhat sa kalibutan ug sa tanan nga ania niini mao ang Ginoo sa langit ug sa yuta ug wala magpuyo sa mga templo nga binuhat sa mga tawo. Ug wala usab siya magkinahanglan bisag unsa gikan sa tawo kay siya man mismo ang naghatag sa tawo ug kinabuhi ug sa tanang butang. Gikan sa usa ka tawo gibuhat niya ang tanang bulok sa katawhan, ug gipapuyo sila sa tibuok kalibutan. Daan na niyang gilatid ang mga panahon ug ang mga utlanan sa mga dapit nga ilang puy-an aron mangita sila kaniya pamasin nga siya ilang makaplagan. Apan ang tinuod mao nga ang Dios dili layo kanato, kay 'Diha kaniya kita may kinabuhi ug naglihok ug nahimong mao kita.' Ingon sa gisulti sa pipila sa inyong mga magbabalak, 'Kita usab iyang mga anak.' Ug sanglit kita mga anak man sa Dios, dili nato hunahunaon nga ang Dios sama'g dagway sa larawan nga bulawan o plata o bato nga gikulit pinaagi sa kahanas sa tawo. Kaniadto, sa wala pa mahibalo ang tawo, wala baliha sa Dios kining mga butanga; apan karon nagsugo siya sa tanang mga tawo sa paghinulsol. Kay nagtagal siya'g adlaw nga hukman niya ang tibuok kalibutan pinasubay sa hustisya, pinaagi sa tawo nga iyang gipili. Ug gimatuod niya kini sa tanang katawhan pinaagi sa pagbanhaw kaniya." Pagkadungog nila nga si Pablo nagsulti mahitungod sa pagkabanhaw, may pipila kanila nga mibugalbugal kaniya, apan ang uban miingon, "Gusto kaming mamati kanimo pag-usab mahitungod niini." Unya si Pablo mibiya sa tigum. Pipila sa mga tawo mitipon kaniya ug mituo; usa kanila mao si Dionisio nga sakop sa konseho sa Areopago, ingon man si Damaris nga usa ka babaye, ug uban pa. Human niini mibiya si Pablo sa Atenas ug miadto sa Corinto.
ANG PULONG SA GINOO.
SALAMAT SA DIOS.
SALMO RESPONSORYO
Ps. 148:1-2, 11-12, 13, 14
R. Ang langit ug ang yuta napuno sa lmong himaya. / R. Aleluya.
Dayga ang Ginoo gikan sa kalangitan, dayga siya diha sa kahitas-an; Dayga siya, kamong tanan niyang mga anghel, dayga siya, kamong tanan niyang kagahuman. (R)
Mga hari sa yuta ug tanang kanasuran, mga prinsipe ug tanang maghuhukom sa yuta, Mga batan-on usab, ug mga dalaga, mga tigulang ug mga kabataan. (R)
Dayga ang ngalan sa Ginoo, kay ang iyang ngalan lamang maoy gibayaw; Ang iyang kahalangdon labaw sa langit ug sa yuta. (R)
Iyang gibayaw ang gahom sa iyang Iungsod; mao unta kini ang iyang pagdayeg gikan sa tanan niyang mga buotan nga alagad. Gikan sa mga anak ni Israel, ang katawhan nga suod kaniya. Aleluya. (R)
BERSO SA DILI PA ANG EBANGHELYO
Jn. 14:16
Aleluya! Mangayo ako sa Amahan, ug hatagan kamo niyag laing Manlalaban, ang Espiritu sa kamatuoran, aron makig-uban kaninyo hangtod sa kahangtoran. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 16:12-15
Si Jesus miingon sa iyang mga tinun-an, "Daghan pa unta kaayo akog isulti kaninyo, apan karon dili pa kamo makatugkad niini. Apan inig-abot sa Espiritu sa kamatuoran, tultolan kamo niya sa tibuok kamatuoran. Dili siya magsulti sa iyang kaugalingong pagbuot, kondili sultihan kamo niya sa iyang nadungog ingon man sa mga butang umaabot. Himayaon ako niya, kay ang ania kanako maoy iyang isulti kaninyo. Ang tanan nga iya sa Amahan akoa; busa giingon ko nga dawaton sa Espiritu ang ihatag ko kaniya ug isugilon niya kini kaninyo.
ANG EBANGHELYO SA GINOO.
DAYGON IKAW, O KRISTO.
