PAGBASA GIKAN SA MGA BUHAT SA MGA APOSTOLES
Acts 16:22-34
Miapil ang mga tawo sa pagdagmal kanila, ug gigisi sa mga opisyal ang mga bisti ni Pablo ug ni Silas ug misugo nga latigohon sila. Human sila bunali pag-ayo, gibalhog sila sa karsel ug gisugo ang guwardiya nga kandadohan pag-ayo ang bilanggoan. Busa gibalhog sila sa guwardiya ngadto sa kinasuokang lawak ug gilugpitan sa giakob nga kahoy ang ilang mga tiil. Sa hapit na ang tungang gabii, si Pablo ug si Silas nag-ampo ug nag-awit ug mga pagdayeg ngadto sa Dios, ug namati kanila ang ubang mga binilanggo. Unya sa kalit milinog og kusog nga nakatay-og pag-ayo bisan sa sukaranan sa karsel, ug nangaabli ang tanang pultahan ug nangatangtang ang mga kadena sa tanang binilanggo. Nahigmata ang tinugyanan sa karsel, ug sa pagkakita niya nga nangaabli na ang mga pultahan, gipakaingon niyang nanglayas ang tanang preso; busa gilanit niya ang iyang espada aron maghikog. Apan misinggit si Pablo, "Ayaw paghikog! Ania ra kaming tanan!" Ang tinugyanan sa karsel nangayo'g suga, unya misulod siya nga nagdagan ug miluhod nga nagkurog sa tiilan ni Pablo ug ni Silas. Unya sila gipagawas niya ug gipangutana, "Sir, unsa may akong buhaton aron ako maluwas?" Sila mitubag, "Tuo sa Ginoong Jesus, ug maluwas ka lakip ang imong panimalay." Unya siya ug ang tanang sakop sa iyang panimalay giwalihan nila sa pulong sa Dios. Niadtong taknaa sa kagabhion gihunaran sa tinugyanan sa karsel ang ilang mga samad; ug gibunyagan dayon siya ug ang iyang panimalay. Unya gidala niya si Pablo ug si Silas sa iyang balay ug gipakaon. Nalipay siya ug ang iyang panimalay, kay siya mituo na man sa Dios.
ANG PULONG SA GINOO.
SALAMAT SA DIOS.
SALMO RESPONSORYO
Ps. 138:1-2, 2-3, 7-8
R. Ang imong tuong kamut nagtubos kanako, O Ginoo. / R. Aleluya.
Pasalamatan ko ikaw, O Ginoo, sa tibuok kong kasingkasing. (kay Imong gidungog ang mga pulong sa akong baba;) Sa atubangan sa mga anghel, awitan ko ang Imong kadayeganan; magasimba ako didto sa Imong balaang templo, ug pasalamatan ko ang Imong ngalan. (R)
Tungod sa Imong kaluoy ug sa Imong kamatuoran, Imong gihimong dako labaw sa tanang butang ang Imong ngalan ug ang Imong saad. Sa akong pagsangpit gipatalinghugan mo ako; Imo akong gilig-on sulod sa akong kaugalingon. (R)
Ang Imong tuong kamut nagtubos kanako. Ang Ginoo maghingpit sa Iyang gihimo kanako. Ang Imong kaluoy, O Ginoo, nagalungtad hangtud sa kahangturan; ayaw pagbiyai ang buhat sa Imong mga kamut. (R)
BERSO SA DILI PA ANG EBANGHELYO
Jn. 16:7, 13
Aleluya! Padad-an ko kamo sa Espiritu sa kamatuoran, nag-ingon ang Ginoo; siya ang magtudlo kaninyo sa tibuok nga kamatuoran. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 16:5-11
Si Jesus miingon sa iyang mga tinun-an, "Ug karon moadto ako sa nagpadala kanako, apan walay usa kaninyo nga nangutana kanako kon asa ako paingon. Ug karon nga gisultihan ko na kamo, nasubo kamo. Apan sultihan ko kamo: mas makaayo kaninyo nga biyaan ko kamo, kay kondili, dili moanhi kaninyo ang Manlalaban. Apan kon mobiya ako, ipadala ko siya kaninyo. Ug inig-abot niya, iyang pailhon ang mga tawo sa kalibutan mahitungod sa ilang sala, ug sa pagkamatarong, ug sa silot sa Dios. Pailhon sila sa ilang sala kay wala man sila motuo kanako; ug pailhon sila unsay matarong kay moadto man ako sa Amahan ug dili na kamo makakita kanako; ug pailhon sa silot, kay ang nagmando niining kalibutana gisilotan na man."
ANG EBANGHELYO SA GINOO.
DAYGON IKAW, O KRISTO.
