PAGBASA GIKAN SA MGA BUHAT SA MGA APOSTOLES
Acts 16:11-15
Busa mibiya kami sa Troas sakay sa sakayan ug midiritso sa Samotrasia, ug sa pagkasunod adlaw ngadto sa Neapolis. Gikan didto miadto kami sa Filipos, ang kinadak-ang siyudad sa unang distrito sa Macedonia; kolonya usab kini sa Roma. Nagpabilin kami'g pipila ka adlaw niadtong siyudara. Sa Adlaw'ng Igpapahulay migawas kami sa siyudad ug miadto sa daplin sa suba, kay naghunahuna man kami nga didto may tigomanan sa mga Judio alang sa pag-ampo. Nanglingkod kami ug nakigsulti sa mga babaye nga nagtigum didto. Usa niadtong namati kanamo mao si Lydia nga taga-Tiatira, nga namaligyag panapton nga dagtom-pula. Mahadlokon siya sa Dios ug ang Ginoo nag-abli sa iyang kasingkasing aron pagdawat sa mensahe ni Pablo. Gibunyagan siya ug ang tibuok niyang panimalay. Unya iya kaming gidapit, "Diri kamo abot sa akong balay kon giisip ninyo ako nga tinuod nga magtutuo sa Ginoo." Ug wala gayod siya pabalibad.
ANG PULONG SA GINOO.
SALAMAT SA DIOS.
SALMO RESPONSORYO
Ps. 149:1-2, 3-4, 5-6, 9
R. Ang Ginoo nalipay sa iyang lungsod. / R. Aleluya.
Awiti ang Ginoo og usa ka bag-ong awit sa pagdayeg diha sa katilingban sa mga nagtuo kaniya. Papalipaya ang Israel diha sa Iyang magbubuhat, (R)
Padayga sila sa Iyang ngalan diha sa sayaw sa pangilin, paawita sila og pagdayeg ngadto kaniya dinuyugan sa piyangpiyang ug alpa. Kay ang Ginoo nahigugma sa Iyang lungsod ug gidayanan niya ang mapaubsanon og kadaugan. Ang Ginoo nalipay sa iyang lungsod. Pasadyaa ang nagtuo kaniya diha sa himayaa; paawita sila tungod sa kalipay diha sa ilang mga higdaanan; Ang tag-as nga mga pagdayeg sa Dios maanaa sa ilang mga tutonlan. Mao kini ang himaya sa tanan nga nagtuo kaniya. Aleluya. (R)
BERSO SA DILI PA ANG EBANGHELYO
Jn. 15:26b, 27a
Aleluya! Ang Espiritu sa kamatuoran magsaksi mahitungod kanako, nag-ingon ang Ginoo, ug magsaksi usab kamo mahitungod kanako. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 15:26-16:4
Si Jesus miingon sa iyang mga tinun-an, "Moanhi ang Manlalaban—ang Espiritu sa kamatuoran, nga gikan sa Amahan. Ipadala ko siya gikan sa Amahan ug magsaksi siya mahitungod kanako. Ug magsaksi usab kamo mahitungod kanako, kay kamo uban man kanako sukad pa sa sinugdan." "Gisulti ko kini kaninyo aron dili kamo maluya sa inyong pagtuo. Hinginlan kamo nila gikan sa ilang mga sinagoga, ug moabot ang panahon nga ang magpatay kaninyo magtuo nga nagbuhat siya sa kabubut-on sa Dios. Kini ilang buhaton kaninyo kay wala man sila makaila sa Amahan ni makaila kanako. Apan gisultihan ko kamo niini aron nga inigbuhat nila niini, inyong hinumdoman ang gisulti ko kaninyo."
ANG EBANGHELYO SA GINOO.
DAYGON IKAW, O KRISTO.
