PAGBASA GIKAN SA MGA BUHAT SA MGA APOSTOLES
Acts 8:5-8, 14-17
Miadto si Felipe sa usa ka siyudad sa Samaria ug didto giwalihan niya ang katawhan mahitungod sa Mesiyas. Naghiusa ang mga tawo pagpaminaw sa gisulti ni Felipe sa dihang nakabati sila kaniya ug nakakita sa mga milagro nga iyang gibuhat. Nanggula ang mga yawa gikan sa daghang mga tawo ug naninggit pagkusog, ug daghan usab ang mga paralitiko ug mga bakol nga nangaayo. Busa nalipay pag-ayo ang tibuok Samaria. Ang mga apostoles nga didto sa Jerusalem nakadungog nga ang mga taga-Samaria midawat sa pulong sa Dios, busa ilang gipadala si Pedro ug si Juan ngadto kanila. Sa pag-abot nila, nag-ampo sila nga ang mga magtutuo makadawat unta sa Espiritu Santo, kay ang Espiritu Santo wala pa man mokunsad bisan sa usa kanila. Nabunyagan lamang sila sa ngalan sa Ginoong Jesus. Unya si Pedro ug si Juan mipandong kanila sa ilang mga kamut ug nakadawat sila sa Espiritu Santo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 66:1-3, 4-5, 6-7, 16, 20
R. Pasinggita ang tibuok yuta ngadto sa Dios uban sa kasadya. / R. Aleluya.
Singgit kamo nga malipayon ngadto sa Dios, kamong tanan diha sa yuta, awitig pagdayeg alang sa himaya sa iyang ngalan; isangyaw ang iyang mahimayaong kadayganan. Ingna ang Dios, "Pagkamakataha sa imong mga buhat!" (R)
"Pasimbaha ang tibuok yuta ug paawita og pagdayeg ngadto kanimo, paawita og mga pagdayeg alang sa imong ngalan." Umari kamo ug tan-awa ang mga buhat sa Dios, ang iyang makataha nga mga buhat sa taliwala sa mga tawo. (R)
Gihimo niya ang yuta nga mamala ug ang kadagatan latas sa suba nanglakaw sila; busa magsadya kita diha kaniya. Nagahari siya pinaagi sa iyang gahum hangtud sa kahangturan. (R)
Pamati karon, kamong tanang mahadlokon sa dios, samtang ipahayag ko unsa ang iyang gibuhat kanako. Dalaygon ang Dios nga wala magtungina kanako sa akong pangayo sa iyang kaluoy. (R)
PAGBASA GIKAN SA UNANG SULAT NI SAN PEDRO
1 Pt. 3:15-18
Hinonoa pasidunggi ninyo si Cristo diha sa inyong mga kasingkasing ug himoa siya nga inyong Ginoo. Pangandam kamo kanunay pagtubag kang bisan kinsa nga magpakisayod kaninyo mahitungod sa inyong paglaum. Apan buhata kini sa kalumo ug pagtahod. Batoni ang malinis nga konsensiya aron nga kon kamo bugalbugalan, kadtong nagsaway sa inyong maayong pamatasan ingon nga mga sumusunod kang Cristo maulawan tungod sa ilang gipanulti. Kay mas maayo pa ang pag-antos tungod sa pagbuhat sa maayo kon kini kabubut-on man sa Dios, kay sa pagbuhat sa dautan. Kay si Cristo mismo namatay sa makausa lamang tungod sa atong mga sala, ang matarong alang sa mga dili matarong, aron pagdala kanato ngadto sa Dios. Gipatay siya ingon nga tawo, apan gibanhaw ingon nga espiritu.
ANG PULONG SA GINOO.
SALAMAT SA DIOS.
BERSO SA DILI PA ANG EBANGHELYO
Jn. 14:23
Aleluya! Kon kinsay mahigugma kanako, magbantay siya sa akong mga Pulong, ug ang akong Amahan mahigugma kaniya, ug moadto kami aron pagpuyo uban kaniya. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 14:15-21
Si Jesus miingon sa iyang mga tinun-an, "Kon nahigugma kamo kanako, tumana ninyo ang akong mga sugo. Mangayo ako sa Amahan, ug hatagan kamo niyag laing Manlalaban, ang Espiritu sa kamatuoran, aron makig-uban kaninyo hangtod sa kahangturan. Ang kalibutan dili makadawat kaniya, kay dili man kini makakita ni makaila kaniya. Apan nakaila kamo kaniya, kay nag-uban siya ug nagpuyo diha kaninyo. "Dili ko kamo pasagdan nga mag-inusara; mobalik ako. Sa dili madugay ang kalibutan dili na makakita kanako, apan makakita kamo kanako; ug kay ako buhi man, mabuhi usab kamo. Inig-abot niadtong adlawa, mahibalo kamo nga ako anaa sa Amahan ug kamo ania kanako, ingon nga ako anaa usab kaninyo. "Ang modawat sa akong mga sugo ug magtuman niini mao ang nahigugma kanako. Ang akong Amahan mahigugma kaniya nga nahigugma kanako; ako usab mahigugma kaniya ug magpaila sa akong kaugalingon ngadto kaniya."
ANG EBANGHELYO SA GINOO.
DAYGON IKAW, O KRISTO.
