PAGBASA GIKAN SA MGA BUHAT SA MGA APOSTOLES
Acts 13:26-33
Mga igsuon nga kaliwat ni Abraham, ug kamong tanang dili Judio nga nagtuo sa Dios: kita mao ang gipadad-an niining mensahe sa kaluwasan! Kay ang mga tawo sa Jerusalem ug ang ilang mga pangulo wala mahibalo nga siya mao ang Manluluwas, ni hisabtan nila ang mga pulong sa mga propeta nga gibasa matag Adlawng Igpapahulay. Apan sa dihang gisilotan nila si Jesus, natuman nila ang mga pulong sa mga propeta. Ug bisan wala silay nakitang katarongan sa pagsilot kang Jesus sa kamatayon, ilang gipangayo ni Pilato nga patyon si Jesus. Ug human nila mabuhat ang tanang gisulti sa Kasulatan mahitungod kaniya, gikuha nila siya sa krus ug gilubong. Apan gibanhaw siya sa Dios, ug sulod sa daghang mga adlaw nagpakita siya niadtong miuban kaniya gikan sa Galilea ngadto sa Jerusalem. Sila karon mao ang iyang mga saksi ngadto sa katawhan sa Israel. Ug mianhi kami aron pagdala kaninyo sa Maayong Balita: ang gisaad sa Dios ngadto sa atong mga katigulangan nga iyang buhaton, gibuhat niya karon alang kanato nga ilang mga kaliwat, pinaagi sa pagbanhaw kang Jesus. Sumala sa nasulat sa ikaduhang Salmo, 'Ikaw ang akong Anak; Karong adlawa nahimo ako nga imong Amahan.'
ANG PULONG SA GINOO.
SALAMAT SA DIOS.
SALMO RESPONSORYO
Ps. 2:6-7, 8-9, 10-11
R. Ikaw ang akong Anak; karong adlawa gianak ko ikaw. / R. Aleluya.
"Nagbutang ako sa akong hari didto sa Sion, ang akong balaang bukid." Isangyaw ko ang sugo sa Ginoo; Ang Ginoo miingon kanako, "Ikaw ang akong anak; karong adlawa gianak ko ikaw." (R)
Pangayo kanako ug hatagan ko ikaw sa kanasuran aron maimong kabilin ug sa kautlanan sa yuta aron maimong katigayunan. Magmando ikaw kanila sa baston nga puthaw; buk-on mo sila ingon og kolon nga yuta." (R)
Ug karon, O mga hari, pamati kamo; pagmatngon kamo, mga nagmando sa yuta. Alagari ang Ginoo uban sa kahadlok ug pagsadya kamo diha sa iyang atubangan; uban sa pagkurong simbaha ninyo siya. (R)
BERSO SA DILI PA ANG EBANGHELYO
Jn. 14:6
Aleluya! Si Jesus mitubag, "Ako ang dalan, ang kamatuoran, ug ang kinabuhi; walay makaadto sa Amahan kon dili moagi kanako. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 14:1-6
Si Jesus miingon sa iyang mga tinun-an, "Ayaw kamog kaguol. Salig kamo sa Dios ug salig usab kanako. Sa balay sa akong Amahan adunay daghang mga lawak, ug moadto ako aron pag-andam og dapit alang kaninyo. Kon dili pa kini tinuod, dili ko unta kamo sultihan niini. Ug kon atua na ako didto ug makaandam nag dapit alang kaninyo, mobalik ako ug kuhaon ko kamo aron bisag asa ako, atua usab kamo. Nahibalo kamo unsaon pag-adto sa dapit nga akong adtoan." Apan si Tomas miingon kaniya, "Ginoo, wala kami mahibalo kon asa ka paingon, busa unsaon man namo pagkatultol sa dalan?" Si Jesus mitubag, "Ako ang dalan, ang kamatuoran, ug ang kinabuhi; walay makaadto sa Amahan kon dili moagi kanako."
ANG EBANGHELYO SA GINOO.
DAYGON IKAW, O KRISTO.
