PAGBASA GIKAN SA MGA BUHAT SA MGA APOSTOLES
Acts 13:13-25
Si Pablo ug ang iyang mga kauban milawig gikan sa Papos ug miabot sa Perga sa kayutaan sa Pampilya; apan si Juan Marcos mibulag kanila didto ug mibalik sa Jerusalem. Gikan sa Perga miadto sila sa Antioquia sa Pisidia; ug sa Adlaw'ng Igpapahulay misulod sila sa sinagoga ug milingkod didto. Human sa pagbasa sa usa ka bahin sa Balaod ni Moises ug sa sinulat sa mga propeta, gipasugoan sila sa mga kadagkoan sa sinagoga, nga nag-ingon, "Mga igsuon, kon aduna kamoy mensahe nga makadasig niining mga tawo, mahimong isulti ninyo karon." Mitindog si Pablo, ug gisinyasan niya sila sa iyang kamut, ug giingnan, "Mga igsuong Israelita ug tanang dili Judio nga nagtuo sa Dios: pamati kamo! Ang Dios niining nasud sa Israel nagpili sa atong mga katigulangan ug naghimo kanila nga dakung nasud sa panahon sa pagpuyo nila nga mga langyaw sa yuta sa Ehipto. Pinaagi sa iyang dakung gahum, ang Dios nagpagawas kanila gikan sa Ehipto, ug sulod sa kap-atan ka tuig siya nagpailob kanila didto sa kamingawan. Gilaglag niya ang pito ka nasud sa yuta sa Canaan, ug gihatag kini kanila ug gipanag-iya nila kini sulod sa upat ka gatos ug kalim-an ka mga tuig. "Human niini, gihatagan niya silag mga maghuhukom hangtud sa panahon ni propeta Samuel. Ug sa diha nga nangayo silag hari, gihatag sa Dios kanila si Saulo, ang anak ni Cis, sa banay ni Benjamin, aron maoy maghari kanila sulod sa kap-atan ka tuig. Sa dihang gipapahawa siya sa trono, si David gihimo sa Dios nga ilang hari. Kini ang giingon sa Dios mahitungod kaniya: 'Nakita ko nga si David anak ni Isai, nakapahimuot kanako, ug magbuhat sa tanan nga isugo ko kaniya. Si Jesus nga kaliwat ni David mao ang gipili sa Dios aron magluwas sa katawhan sa Israel sumala sa iyang gisaad. Sa wala pa moanhi si Jesus, nagwali si Juan ngadto sa tanang mga tawo sa Israel nga kinahanglan maghinulsol sila ug magpabunyag. Ug sa hapit na si Juan mamatay, miingon siya sa katawhan, 'Kinsa ba ako sa inyong hunahuna? Dili ako ang inyong gipaabot. Apan sunod kanako may moanhi, ug dili ako takus bisan gani paghubo sa iyang sandalyas.'"
ANG PULONG SA GINOO.
SALAMAT SA DIOS.
SALMO RESPONSORYO
Ps. 89:2-3, 2 1-22, 25, 27
R. Hangtud sa kahangturan awiton ko ang kaayo sa Ginoo. / R. Aleluya.
Ang mga kaayohan sa Ginoo awiton ko sa gihapon; latas sa tanang kaliwatan magsangyaw ang akong ba-ba sa imong kamatinud-anon. Kay nag-ingon ka, "Ang akong kaluoy nagabarog sa kahangturan"; sa langit imong gilig-on ang imong kamatinud-anon. (R)
Hikaplagan ko si David, akong sulugoon; sa akong balaan nga lana ako siyang gidihogan, Aron ang akong kamut mag-uban kaniya kanunay ug ang akong bukton magalig-on kaniya. (R)
Ang akong kamatinud-anon ug akong kaluoy mag-uban kaniya, ug sa akong ngalan mabayaw ang iyang gahom. "Moingon siya kanako, 'Ikaw ang akong amahan, ang akong Dios, akong Bato, akong manluluwas" (R)
BERSO SA DILI PA ANG EBANGHELYO
Rv. 1:5ab
Aleluya! JesuCristo, ang kasaligang saksi, ang unang gibanhaw. Gihigugma kita niya ug pinaagi sa iyang kamatayon giluwas kita niya sa atong mga sala. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 13:16-20
Human si Jesus makahugas sa tiil sa iyang mga tinun-an miingon siya: "Sultihan ko kamo: walay ulipon nga labaw sa iyang agalon; ug walay sinugo nga labaw sa nagsugo kaniya. Karon nga nasayod na kamo sa maong kamatuoran, bulahan kamo kon inyo kining buhaton!" "Wala ako magsulti mahitungod kaninyong tanan, nakaila ako sa akong gipili. Apan kinahanglan matuman ang Kasulatan nga nag-ingon, 'Ang tawo nga misalo kanako sa pagkaon nahimo nga akong kaaway.' Gisultihan ko kamo niini sa wala pa kini mahitabo aron inigkahitabo na niini, motuo kamo nga 'Ako mao Ako'. Sultihan ko kamo: ang modawat kang bisan kinsa nga akong ipadala, modawat usab kanako; ug ang modawat kanako, modawat usab sa nagpadala kanako."
ANG EBANGHELYO SA GINOO.
DAYGON IKAW, O KRISTO.
