PAGBASA GIKAN SA MGA BUHAT SA MGA APOSTOLES
Acts 12:24-13:5
Ang pulong sa Dios nagpadayon pagkaylap. Si Bernabe ug si Saulo nakatapos sa ilang misyon ug namalik sila gikan sa Jerusalem, dala si Juan Marcos. Sa simbahan sa Antioquia dihay mga propeta ug mga magtutudlo nga si Bernabe, si Simon (nga gianggaag Negro), si Lucio (taga-Cirene), si Manaen (nga namatuto uban ni Gobernador Herodes), ug si Saulo. Usa ka adlaw niana, samtang nagsimba sila sa Ginoo ug nagpuasa, miingon kanila ang Espiritu Santo, "Igahin kanako si Bernabe ug si Saulo alang sa buhat nga maoy hinungdan sa pagtawag ko kanila." Busa nagpuasa sila ug nag-ampo ug gipandongan nila sa ilang mga kamut si Bernabe ug si Saulo ug unya gipalakaw sila. Sanglit mga sinugo man sa Espiritu Santo, si Bernabe ug si Saulo nangadto sa Seleucia ug gikan didto milawig sila ngadto sa pulo sa Cipre. Sa pag-abot nila sa Salamina, giwali nila ang pulong sa Dios sulod sa mga sinagoga. Kuyog kanila si Juan Marcos silbing katabang.
ANG PULONG SA GINOO.
SALAMAT SA DIOS.
SALMO RESPONSORYO
Ps. 67:2-3,5, 6, 8
R. O Dios, magdayeg unta kanimo ang tanang mga nasod. / R. Aleluya.
Kaloy-an unta kita sa Dios ug bendisyonan niya; ipadan-ag unta nganhi kanato ang iyang nawong. Mahibaw-an unta ang imong dalan dinhi sa yuta; diha sa tanang mga nasod, ang imong kaluwasan. (R)
Maglipay unta ang mga nasod ug magsadya tungod kay nagamando ka sa kanasuran diha sa katarong; ang mga nasod dinhi sa yuta imong agakon. (R)
Daygon unta ikaw sa katawhan, O Dios; ang tanang kalungsoran magdayeg unta kaniya. Panalanginan unta kita sa Dios, ug ang tanang kautlanan sa yuta mahadlok unta kaniya. (R)
BERSO SA DILI PA ANG EBANGHELYO
Jn. 8:12
Aleluya! Ako mao ang kahayag sa kalibotan, miingon ang Ginoo; ang mosunod kanako dili na gayod maglakaw diha sa kangitngit kondili makabaton hinuon sa kahayag sa kinabuhi. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 12:44-50
Unya si Jesus misultig kusog, "Ang nagtoo kanako wala lamang magtoo kanako kondili kaniya usab nga nagpadala kanako. Ang nakakita kanako nakakita usab kaniya nga nagpadala kanako. Mianhi ako nga kahayag sa kalibutan, aron ang tanan nga nagtoo kanako dili magpabilin sa kangitngit. Ang mamati sa akong mensahe ug dili magtuman niini dili ko hukman. Mianhi ako dili aron pagsilot sa kalibutan, kondili aron pagluwas niini. Adunay mosilot niadtong magsalikway kanako ug dili modawat sa akong mensahe. Ang pulong nga akong gisulti mao unya ang maghukom kaniya sa katapusang adlaw! Matuman gayod kini, kay wala man ako magsulti sa akong kaugalingong kabubut-on, kondili ang Amahan nga nagpadala kanako maoy nagsugo kanako kon unsay akong isulti. Ug nasayod ako nga ang iyang sugo naghatag og kinabuhing dayon. Busa ang akong gisulti mao ang gipasulti kanako sa Amahan."
ANG EBANGHELYO SA GINOO.
DAYGON IKAW, O KRISTO.
