⚪ Lunes sa Ikaupat nga Semana sa Pasko sa Pagkabanhaw

PAGBASA GIKAN SA MGA BUHAT SA MGA APOSTOLES

Acts 11:1-18

Nakabalita ang mga apostoles ug ang mga kaigsuonan sa tibuok Judea nga ang mga dili Judio midawat usab sa pulong sa Dios. Sa pag-adto ni Pedro sa Jerusalem, ang pundok sa mga Judio nga uyon nga ang mga dili Judio padawaton sa seremonyas sa pagtuli misaway kaniya sa pag-ingon, "Nganong miadto ka man sa mga dili Judio nga wala pa matuli ug nakigsalo kanila?" Busa gisaysay ni Pedro kanila ang tanan nga nahitabo sukad gayod sa sinugdan. Siya miingon, "Nag-ampo ako didto sa siyudad sa Jope ug nakakita ako'g panan-awon. Nakita ko sa maong panan-awon ang ingon sa usa ka dakung panapton nga pinaagi sa upat ka eskina niini gitonton gikan sa langit ug mihunong kini sa tungod nako. Akong gisusi pag-ayo ang sulod niini ug nakita ko ang mga mananap nga tag-upat ug tiil, mga hayop, ug mananap nga nagkamang, ug ihalas nga mga langgam. Unya nakadungog ako'g tingog nga nag-ingon, 'Pedro, tindog; pag-ihaw ug kaon!" Apan mitubag ako, 'Dili ko, Ginoo, kay sukad masukad wala ako makakaon og bisan unsa nga mahugaw.' Ang tingog misulti na usab gikan sa langit, 'Ayaw isipa nga mahugaw ang giila sa Dios nga malinis.' Makatulo kini mahitabo ug unya ang panapton lakip ang tanang sulod niini gibalik ngadto sa langit. Ug niadto gayong higayona tulo ka tawo gikan sa Cesarea nga gisugo sa pagkuha kanako miabot sa balay nga akong giabotan. Ang Espiritu misulti kanako sa pagkuyog kanila sa walay pagpanuko. Kining unom ka igsuon nga taga-Jope mikuyog usab kanako ngadto sa Cesarea, ug kaming tanan midayon sa balay ni Cornelio. Unya iyang gisuginlan kami mahitungod sa anghel nga nakita niya nga nagtindog sulod sa iyang balay ug miingon kaniya, 'Pagsugo og mga tawo ngadto sa Jope ug ipakuha si Simon nga giangga-ag Pedro. Siya may mensahe nga makaluwas kanimo ug sa imong panimalay.' Ug sa pagsugod nako'g sulti mikunsad kanila ang Espiritu Santo sama sa pagkunsad niya kanato sa sinugdan. Unya nahinumdoman ko ang giingon sa Ginoo, 'Si Juan nagbunyag pinaagi sa tubig, apan bunyagan kamo pinaagi sa Espiritu Santo!" Tataw kaayo nga ang Dios naghatag sa mga dili Judio sa samang gasa nga iyang gihatag kanato sa atong pagtuo kang JesuCristo; nan kinsa man ako nga magpugong sa Dios?" Sa ilang pagkadungog niini, mihunong sila pagsaway ug gidayeg nila ang Dios sa pag-ingon, "Ang Dios naghatag usab diay ngadto sa mga dili Judio sa higayon sa paghinulsol aron sila maluwas!"

SALMO RESPONSORYO

Ps. 42:2-3, 43:3-4

R. Giuhaw ang akong kalag sa buhi nga Dios. / R. Aleluya.

Sama sa lagsaw nga nangandoy sa nagadagan nga mga tubig, ang akong kalag nangandoy kanimo, O Dios. Giuhaw ang akong kalag sa Dios, sa buhi nga Dios. Kanus-a man ako moadto ug motan-aw sa nawong sa Dios? (R)

Ipadala ang Imong kahayag ug ang Imong kamatinumanon; sila ang magtultol kanako, ug magdala kanako ngadto sa Imong balaang bukid, ngadto sa Imong puloy-anan. (R)

Unya moadto ako sulod sa altar sa Dios, sa Dios sa akong kalipay ug kasadya; unya magpasalamat ako Kanimo diha sa alpa, O Dios, akong Dios. (R)

BERSO SA DILI PA ANG EBANGHELYO

John 10:14

Aleluya! Padad-an ko kamo sa Espiritu sa kamatuoran, nag-ingon ang Ginoo; siya ang magtudlo kanimo sa tibuok nga kamatuoran. Aleluya!

PAGBASA SA SANTOS NGA EBANGHELYO SUMALA NI SAN JUAN

Jn. 10:11-18

Si Jesus miingon, "Ako ang maayong magbalantay sa mga karnero. Ang maayong maayong magbalantay andam sa pagpakamatay alang sa mga karnero. Ang sinuholan lamang modagan inigkakita niya sa lobo nga nagpaingon na kanila, kay dili man siya maayong magbalantay ug tag-iya sa mga karnero; busa tukbon sila sa lobo ug patibulaagon. Ang sinuholan modagan sanglit sinuholan man lamang ug walay pagtagad sa mga karnero. Ako ang maayong magbalantay sa mga karnero. Ingon nga ang Amahan nakaila kanako ug ako nakaila sa Amahan, nakaila usab ako sa akong mga karnero ug sila nakaila kanako. Ug ako andam sa pagpakamatay alang kanila. Ako adunay ubang mga karnero nga wala mahisakop niining torila. Kinahanglan dad-on ko usab sila nganhi ug mamati sila sa akong tingog ug mahimo silang usa na lamang ka panon ubos sa usa ka magbalantay. "Ang Amahan nahigugma kanako kay ako andam man pagtugyan sa akong kinabuhi aron madawat ko kini pagbalik. Walay makahimo pagpatay kanako; magpakamatay ako sa kaugalingon kong pagbuot. May gahom ako sa paghalad sa akong kinabuhi ug may gahom usab ako pagbawi niini. Kini ang gisugo kanako sa akong Amahan."