PAGBASA GIKAN SA UNANG SULAT NI SAN PEDRO
1 Pt. 5:5b-14
Pagpaubos kamong tanan ug pag-alagad sa usag-usa kay ang Kasulatan nag-ingon, "Kontra sa Dios ang mga garboso, apan maluoy siya sa mga mapaubsanon." Busa pagpailalom kamo sa gahum sa Dios, aron siya magtuboy kaninyo sa panahon nga iyang gitagal. Itugyan kaniya ang tanan ninyong kabalaka kay siya nag-atiman kaninyo. Pagbantay ug pagtukaw kamo kay ang inyong kaaway nga mao ang Yawa naglibotlibot kaninyo sama sa liyon nga nagdahunog, nangita og tukbonon. Lig-ona ang inyong pagtoo ug suklii siya, kay nasayod kamo nga ang inyong isigkamagtotoo sa tibuok kalibutan gisulayan sa samang alantuson. Apan human sa inyong pag-antos sa mubong panahon, ang Dios nga tinubdan sa tanang grasya ug maoy nagtawag kaninyo sa pagpakig-ambit sa iyang walay katapusang himaya uban kang Cristo, maghingpit ug maghatag kaninyo og kalig-on, kusog, ug sukaranan nga dili matarog. Iya ang gahum hangtud sa kahangturan! Amen. Sa pagsulat ko niining mubong sulat, gitabangan ako ni Silvano nga giisip kong buotang igsuon. Dasigon ko kamo sa pagsalig niini kay kini mao ang grasya sa Dios. Ang inyong igsuong simbahan didto sa Babilonia, nga pinili usab sa Dios, nangumosta kaninyo, ingon man si Marcos nga akong anak. Pagpangumostahay kamo uban sa halok sa Kristohanong gugma. Hinaut unta nga ang pakigdait mag-uban kaninyong tanang iya ni Cristo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 89:2-3, 6-7, 16-17
R. Sa gihapon awitan ko ang kaayo sa Ginoo. / R. Aleluya.
Ang mga kaayohan sa Ginoo akong awitan sa gihapon; latas sa tanang kaliwatan magsangyaw ang akong ba-ba sa imong kamatinud-anon. Kay nag-ingon ka, "Ang akong kaluoy nagabarug sa kahangturan"; diha sa langit imong gilig-on ang imong kamatinud-anon. (R)
Ang kalangitan nagasangyaw sa imong mga katingalahan, O Ginoo, ang imong kamatinud- anon, diha sa katilingban sa mga santos. Kay kinsa diha sa kapanganoran ang makalabaw sa Ginoo? Kinsa ang sama sa Ginoo diha sa mga anak sa Dios? (R)
Bulahan ang mga tawo nga nahibalo sa masadya nga singgit; diha sa kahayag sa imong nawong, O Ginoo, nagalakaw sila. Sa imong ngalan nagsadya sila sa tibuok adlaw, ug pinaagi sa imong katarong gibayaw sila. (R)
BERSO SA DILI PA ANG EBANGHELYO
1 Cor. 1:23a-24b
Aleluya! Nagsangyaw kami kang Cristo nga gilansang sa krus, mao ang gahum ug ang kaalam sa Dios. Aleluya!
PAGBASA SA SANTOS NGA EBANGHELYO SUMALA NI SAN MARKOS
Mk. 16:15-20
Si Jesus miingon sa iyang mga tinun-an," Panglakaw kamo sa tibuok kalibutan ug isangyaw kining Maayong Balita ngadto sa tanang mga tawo. Ang motoo ug magpabunyag maluwas. Apan ang dili motoo, silotan. Ug kini ang mga timaan sa gahum nga mabatonan nila nga motoo: sa akong ngalan maghingilin sila'g mga yawa ug manulti sila'g lainlaing sinultihan; kon makakupot sila'g mga halas o makainom sila'g hilo, dili sila maunsa, itapion nila ang ilang mga kamut sa mga masakiton ug mangaayo sila." Human makigsulti kanila ang Ginoong Jesus, gidala siya ngadto sa langit ug milingkod sa tuo sa Dios. Ug nanlakaw ang mga tinun-an ug nagsangyaw sa Maayong Balita sa tanang dapit. Ang mitabang gayod kanila mao ang Ginoo, ug midason sa katinuod sa ilang giwali pinaagi sa paghatag kanila sa mga timaan sa gahum.
ANG EBANGHELYO SA GINOO.
DAYGON IKAW, O KRISTO.
