PAGBASA GIKAN SA MGA BUHAT SA MGA APOSTOLES
Acts 9:1-20
Niadtong higayona, nagpadayon si Saulo sa mapintas nga panghulga sa pagpatay sa mga tinun-an sa Ginoo. Miadto siya sa Pangulong Pari, ug nangayo'g mga sulat nga magpaila kaniya sa mga sinagoga sa Damasco nga gitugotan siya pagdakop sa mga sumusunod sa Dalan nga iyang makit-an didto, lalaki ug babaye, ug pagdala kanila balik sa Jerusalem. Sa iyang pagpaingon sa Damasco, ug sa duol na siya sa siyudad, sa kalit may kahayag gikan sa langit nga midan-ag libot kaniya. Natumba siya ug nadungog niya ang tingog nga nag-ingon, "Saulo, Saulo! Nganong gilutos mo man ako?" "Kinsa ka ba, Ginoo?" nangutana siya. Ang tingog miingon, "Ako si Jesus nga imong gilutos. Apan bangon ug lakaw ngadto sa siyudad ug didto sultihan ka kon unsay imong buhaton." Ang mga tawo nga kauban ni Saulo nanghunong nga wala makatingog; nadungog nila ang tingog apan wala silay tawo nga nakita. Mibangon si Saulo ug gibuka niya ang iyang mata, apan dili na siya makakita. Busa ila siyang giagak ug gidala ngadto sa Damasco. Sulod sa tulo ka adlaw dili siya makakita ug niining panahona wala siya mokaon ni moinom. Didto sa Damasco may usa ka tinun-an nga ginganla'g Ananias. Pinaagi sa panan-awon giingnan siya sa Ginoo, "Ananias!" Ug mitubag siya, "Ania ako, Ginoo." Ang Ginoo miingon kaniya, "Lakaw ngadto sa daIan nga ginganla'g TuI-id nga Dalan, ug pangitaa didto sa balay ni Judas ang usa ka tawo nga taga-Tarso nga ginganla'g Saulo. Nag-ampo siya, ug sa panan-awon nakita ni Saulo ang usa ka tawo nga ginganla'g Ananias nga misulod ug unya mipandong kaniya sa iyang kamut aron makakita siya pag-usab." Si Ananias mitubag, "Ginoo, daghan ang nagsulti kanako mahitungod kaniya ug sa mangilngi'g nga mga butang nga iyang gibuhat batok sa imong katawhan didto sa Jerusalem. Ug karon ania siya sa Damasco ug gihataga'g gahum sa mga kadagkoan sa mga pari pagdakop sa tanan nga nag-sangpit sa imong ngalan." Ang Ginoo miingon kaniya, "Adtoa siya kay gipili ko siya aron mag-alagad kanako, ug sa pagpaila sa akong ngalan ngadto sa mga dili Judio ug sa mga hari ingon man sa katawhan sa Israel. Ug ipakita ko kaniya ang tanan nga iyang paga-antuson tungod kanako." Busa miadto si Ananias sa balay ug gipandong niya kang Saulo ang iyang mga kamut. Unya miingon siya, "Igsuong Saulo, ang Ginoong Jesus nga nagpakita kanimo didto sa dalan sa imong pagpaingon nganhi nagpadala kanako aron makakita ka pag-usab ug mapuno sa Espiritu Santo." Dihadiha may nangahulog na daw mga himbis sa isda gikan sa mata ni Saulo ug nakakita siya pag-usab. Mitindog siya ug gibunyagan, ug human siya makakaon, nabaskog siya. Nagpabilin si Saulo sa Damasco sulod sa pipila ka adlaw uban sa mga tinun-an. Miadto siya sa mga sinagoga ug nagsangyaw nga si Jesus mao ang Anak sa Dios.
ANG PULONG SA GINOO.
SALAMAT SA DIOS.
SALMO RESPONSORYO
Ps. 117:1, 2
R. Panglakaw kamo sa tibuok kalibutan, ug isangyaw ang Maayong Balita. / R. Aleluya.
Dayga ang Ginoo, kamong tanang mga nasod; himayaa siya, kamong tanang katawhan. (R)
Kay makanunayon ang iyang kaluoy alang kanato, ug ang kamatinud-anon sa Ginoo nagalungtad sa kahangturan. (R)
BERSO SA DILI PA ANG EBANGHELYO
Jn. 6:56
Aleluya! Ang mokaon sa akong unod ug moinom sa akong dugo magpuyo dinhi kanako ug ako diha kaniya. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 6:52-59
Nakahaling kini ug mainit nga panaglalisay sa mga Judio. "Unsaon man niining tawhana paghatag kanato sa iyang lawas aron kan-on?" nangutana sila. Si Jesus miingon kanila, "Sultihan ko kamo: kon dili kamo mokaon sa unod sa Anak sa Tawo ug dili moinom sa iyang dugo, dili kamo makabaton og kinabuhi. Ang mokaon sa akong unod ug moinom sa akong dugo may kinabuhing walay katapusan ug banhawon ko siya sa katapusang adlaw. Kay ang akong unod mao ang matuod nga kalan-on, ug ang akong dugo mao ang matuod nga ilimnom. Ang mokaon sa akong unod ug moinom sa akong dugo magpuyo dinhi kanako ug ako diha kaniya. Ang buhing Amahan maoy nagpadala kanako ug tungod kaniya nabuhi usab ako. Sa samang pagkaagi, ang mokaon kanako mabuhi tungod kanako. Busa kini mao ang pan nga gikan sa langit; dili kini sama sa pan nga gikaon sa inyong mga katigulangan ug unya nangamatay gihapon. Ang mokaon niining maong pan mabuhi sa dayon." Gisulti kini ni Jesus samtang nagtudlo siya didto sa sinagoga sa Capernaum.
ANG EBANGHELYO SA GINOO.
DAYGON IKAW, O KRISTO.
