PAGBASA GIKAN SA MGA BUHAT SA MGA APOSTOLES
Acts 8:1-8
Giuyonan ni Saulo ang pagpatay kang Esteban. Niana gayong adlawa nagsugod ang mapintas nga paglutos batok sa Simbahan sa Jerusalem. Ang tanang mga magtutuo, gawas sa mga apostoles, nagkatibulaag sa mga lalawigan sa Judea ug sa Samaria. Gilubong si Esteban sa pipila ka mga tawong diosnon, ug nagminatay sila pag-ayo tungod sa iyang kamatayon. Sa laing bahin naningkamut si Saulo paglaglag sa Simbahan; gipaniksik niya ang mga kabalayan ug gipanakop ang mga magtutuo, Ialaki ug babaye, ug gibalhog niya sa bilanggoan. Ang mga magtutuo nga nagkatibulaag nangadto sa nagkalainlaing dapit nag-sangyaw sa mensahe. Miadto si Felipe sa usa ka siyudad sa Samaria ug didto giwalihan niya ang katawhan mahitungod sa Mesiyas. Naghiusa ang mga tawo pagpaminaw sa gisulti ni Felipe sa dihang nakabati sila kaniya ug nakakita sa mga milagro nga iyang gibuhat. Nanggula ang mga yawa gikan sa daghang mga tawo ug naninggit pagkusog, ug daghan usab ang mga paralitiko ug mga bakol nga nangaayo. Busa nalipay pag-ayo ang tibuok Samaria.
ANG PULONG SA GINOO.
SALAMAT SA DIOS.
SALMO RESPONSORYO
Ps. 66:1-3, 4-5, 6-7
R. Ang tibuok kalibutan mosinggit unta sa kalipay ngadto sa Dios. / R. Aleluya.
Singgit kamo nga masadya ngadto sa Dios, kamong tanan dinhi sa yuta, awitig pagdayeg alang sa himaya sa iyang ngalan; isangyaw ang iyang mahimayaon nga kadayeganan ingna ang Dios, "Pagka-makataha sa imong mga buhat. (R)
Ang tibuok yuta magsimba unta ug mag-awit og pagdayeg kanimo, mag-awit unta sila og mga pagdayeg ngadto sa imong ngalan. Umari kamo ug tan-awa ang mga buhat sa Dios, ang iyang makataha nga mga buhat dinha sa katawhan. (R)
Iyang gihimo ang dagat nga yuta nga mamala; latas sa suba nangagi sila nga nagtiniil; busa magsadya kita diha kaniya. Nagamando siya pinaagi sa iyang gahum hangtud sa kahangturan. (R)
BERSO SA DILI PA ANG EBANGHELYO
Jn. 6:40
Aleluya! Kay kini mao ang kabubut-on sa akong Amahan, nga ang tanan nga makakita sa Anak ug motoo kaniya, makabaton sa kinabuhing walay katapusan ug banhawon ko sila sa katapusang adlaw." Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 6:35-40
Si Jesus miingon ngadto sa katawhan, "Ako mao ang pan nga naghatag sa kinabuhi. Ang moari kanako dili na gayod gutomon; ang motoo kanako dili na gayod uhawon. Giingon ko na kaninyo nga nakakita kamo kanako apan wala kamo mutuo. Ang tanan nga gihatag kanako sa akong Amahan moari kanako. Ug ang moari kanako dili ko gayod isalikway, kay nanaog ako gikan sa langit aron pagbuhat sa kabubut-on sa nagpadala kanako, ug dili sa kaugalingon kong kabubut-on. Kini mao ang kabubut-on sa nagpadala kanako: nga dili ako kawad-an bisag usa sa tanan nga iyang gihatag kanako, ug banhawon ko silang tanan sa katapusang adlaw. Kay kini mao ang kabubut-on sa akong Amahan, nga ang tanan nga makakita sa Anak ug motoo kaniya, makabaton sa kinabuhing walay katapusan ug banhawon ko sila sa katapusang adlaw."
ANG EBANGHELYO SA GINOO.
DAYGON IKAW, O KRISTO.
