PAGBASA GIKAN SA MGA BUHAT SA MGA APOSTOLES
Acts 7:51-8:1
Si Esteban miingon ngadto sa katawhan, sa mga kadagkoan ug sa mga Escriba, "Pagkagahi ninyog ulo! Pagkatig-a sa inyong kasingkasing! Nganong dili man kamo mamati sa mensahe sa Dios? Sama gayod kamo sa inyong mga katigulangan: gisupak ninyo kanunay ang Espiritu Santo! May propeta ba nga wala lutosa sa inyong mga katigulangan? Gipatay nila ang mga sinugo sa Dios nga kaniadto nagpahibalo sa pag-anhi sa iyang matarong nga Sulugoon. Ug inyo siyang gibudhian ug gipatay. Kamo ang nakadawat sa kasugoan sa Dios nga gihatag pinaagi sa mga anghel, apan wala ninyo tumana kini!" Samtang ang mga sakop sa Labawng Hukmanan namati kang Esteban, nangasuko sila pag-ayo ug nagpangagot sila sa ilang kapungot kaniya. Apan si Esteban nga puno sa Espiritu Santo, mihangad sa langit ug nakita niya ang himaya sa Dios ug si Jesus nga nagtindog sa tuo sa Dios! Miingon siya, "Tan-awa ang langit nga naabli ug ang Anak sa Tawo nga nagtindog sa tuo sa Dios!" Apan naninggit sila ug nanampong sa ilang mga dalunggan, ug nagdungan silang tanan paghasmag kaniya. Unya gitaral nila siya ngadto sa gawas sa siyudad ug gibato. Ug gipabantayan sa mga saksi ang ilang mga kupo sa usa ka batan-on nga ginganlag Saulo. Ug samtang gibato nila si Esteban, nag-ampo siya sa Ginoo, nga nag-ingon, "Ginoong Jesus, dawata ang akong espiritu." Unya miluhod siya ug misinggit pagkusog, "Ginoo! ayaw sila pakasad-a sa ilang gibuhat!" Tapus niya isulti kini, namatay siya. Giuyonan ni Saulo ang pagpatay kang Esteban. Niana gayong adlawa nagsugod ang mapintas nga paglutos batok sa Simbahan sa Jerusalem. Ang tanang mga nagtutuo, gawas sa mga apostoles, magkatibulaag sa mga lalawigan sa Judea ug sa Samaria.
ANG PULONG SA GINOO.
SALAMAT SA DIOS.
SALMO RESPONSORYO
Ps. 31.3-4, 6, 7, 8, 17, 21
R. Sa imong mga kamut, O Ginoo, akong gitugyan ang akong espiritu. / R. Aleluya.
Pagpakahimong akong bato nga dalangpanan, usa ka kota nga maghatag kanakog kasiguroan. Ikaw ang akong bato ug akong salipdanan; tungod sa imong ngalan imo akong dad-on ug tultolan. (R)
Sa imong mga kamut gitugyan ko ang akong espiritu: imo akong luwason, O Ginoo, O matinud-anong Dios. Ang akong pagsalig anaa sa Ginoo, magsadya ako ug maglipay bahin sa imong kaayo. (R)
Padan-aga ang imong nawong ngari sa imong sulugoon; luwasa ako diha sa imong kaayo. Gitagoan mo sila diha sa landong sa imong presensiya gikan sa gikasabutan sa mga tawo. (R)
BERSO SA DILI PA ANG EBANGHELYO
John 6:35ab
Aleluya! Ang Espiritu Santo magtudlo kaninyo sa tanang mga butang, ug magpahinumdum kaninyo sa tanan nga akong gisulti kaninyo. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 6:30-35
Ang katawhan miingon ngadto kang Jesus, "Unsa mang milagroha ang imong ipakita kanamo aron manuo kami kanimo? Unsa may imong himoon? Ang among mga katigulangan nangaon og mana didto sa kamingawan, sumala gayod sa giingon sa Kasulatan: 'Gihatagan niya silag pan gikan sa langit."' Si Jesus miingon, "Sultihan ko kamo: ang gihatag ni Moises kaninyo dili mao ang pan gikan sa langit; ang akong Amahan ang naghatag kaninyo sa matuod nga kalan-on gikan sa langit. Kay ang pan nga gihatag sa Dios mao siya nga nanaog gikan sa langit ug naghatag og kinabuhi sa kalibutan." "Sir," sila miingon kaniya, hatagi kami kanunay niining maong pan." Si Jesus miingon kanila, "Ako mao ang pan nga naghatag sa kinabuhi. Ang moari kanako dili na gayod gutomon; ang motuo kanako dili na gayod uhawon.
ANG EBANGHELYO SA GINOO.
DAYGON IKAW, O KRISTO.
