PAGBASA GIKAN SA MGA BUHAT SA MGA APOSTOLES
Acts 6:8-15
Si Esteban, usa ka tawo nga puno sa grasya ug sa gahum, nagbuhat og dagkong mga milagro ug mga butang katingalahan atubangan sa katawhan. Apan may mga tawo nga misupak ug nakiglantugi kaniya; ug ang uban kanila mga Judio nga taga-Cirene ug Alejandria nga sakop sa sinagoga nga ginganlag Mga Tawong Libre, ug ang uban taga-Cilicia ug Asia. Apan gihatagan si Esteban sa Espiritu og kaalam ug tungod niini wala sila makabuntog kaniya sa lantugi. Busa nanuhol silag mga tawo aron pag-ingon, "Nakadungog kami kaniya nga nagpasipala kang Moises ug sa Dios!" Tungod niini nagubot ang mga tawo ug ang mga kadagkoan sa templo ug ang mga magtutudlo sa Balaod. Unya ilang gidakop si Esteban ug gidala nila ngadto sa Labawng Hukmanan. Unya ilang gipaatubang ang pipila ka mga tawo aron pagsaksig bakak batok kaniya. Miingon sila, "Kining tawhana kanunay nagpasipala sa atong balaang Templo ug sa Balaod ni Moises. Nadungog namo siya nga miingon nga kining Jesus nga Nazaretnon moguba sa Templo ug usbon niya ang mga tulomanon nga gibilin ni Moises kanato!" Ang tanang mga sakop sa Labawng Hukmanan mitutok kang Esteban ug nakita nila nga ang iyang nawong nahisama sa nawong sa usa ka anghel.
ANG PULONG SA GINOO.
SALAMAT SA DIOS.
SALMO RESPONSORYO
Ps. 119:23-24, 26-27, 29-30
R. Bulahan sila kansang kinabuhi walay ikapasangil. / R. Aleluya.
Bisan mga prinsipe managtigom ug magtabi batok kanako, ang imong sulugoon nagapalandong sa imong mga balaod. Oo, ang imong mga kasugoan mao ang akong kalipay; sila ang akong mga magtatambag. (R)
Gipahayag ko ang akong mga dalan, ug imo akong gitubag; tudloi ako sa imong mga kasugoan. Himoa nga makasabut ako sa dalan sa imong mga sugo, ug akong palandongon ang imong katinga-lahang mga buhat. (R)
Kuhaa gikan kanako ang dalan sa kabakakan, ug hatagi ako sa imong balaod. Ang dalan sa kamatuoran akong gipili; akong gipahimutang ang imong mga gimbut-an sa akong atubangan. (R)
BERSO SA DILI PA ANG EBANGHELYO
Mt. 4:4b
Aleluya! Dili mabuhi ang tawo sa pan lamang, kondili sa matag pulong usab nga isulti sa Dios. Aleluya!
PAGBASA SA SANTOS NGA EBANGHELYO SUMALA NI SAN JUAN
Jn. 6:22-29
Sa pagkasunod adlaw ang mga tawo nga nagpabilin sa tabok sa lanaw nakakita nga usa ra ka sakayan ang nahibilin didto. Nasayod sila nga si Jesus wala mosakay sa sakayan uban sa iyang mga tinun-an nga nanggikan nga sila ra. Hinoon didtoy ubang sakayan gikan sa Tiberias nga nanunggo duol sa dapit diin ang mga tawo mikaon sa pan, tapos makapasalamat ang Ginoo. Sa pagkakita sa mga tawo nga si Jesus wala didto ni ang iyang mga tinun-an, nanakay sila sa mga sakayan ug nangadto sa Capernaum aron pagpangita kaniya. Sa nakaplagan na nila si Jesus didto sa tabok sa lanaw, miingon sila kaniya, "Magtutudlo, kanus-a ka pa mahiabot dinhi?" Si Jesus mitubag, "Sultihan ko kamo: nangita kamo kanako kay nakakaon man kamo sa pan ug nangabusog ug dili tungod kay nakasabut kamo sa mga milagro nga akong nahimo. Ayaw kamo paghago alang sa kalan-on nga madunot, kondili sa kalan-on nga molungtad ngadto sa kinabuhing walay katapusan. Kining kalan-ona ihatag kaninyo sa Anak sa Tawo, kay gipatikan man siya sa Dios nga Amahan sa timaan sa iyang pag-uyon." Busa gipangutana nila siya, "Unsay among buhaton aron pagtuman sa gisugo sa Dios?" Si Jesus mitubag, "Kini ang buluhaton nga ipabuhat sa Dios kaninyo: nga motuo kamo sa iyang gipadala."
ANG EBANGHELYO SA GINOO.
DAYGON IKAW, O KRISTO.
